56
Kapakap en Likih Koht i TITLE NI MAHSEN EN IPRU: En Depit melkahka mwurin mehn Pilisdia ko ar salihedi nan Kad. 1 Sam. 21.13-15.
1 Maing Koht, komw ketin kupwurkalahngan ong ie,
pwe I patohwan milahr nan apwal laud;
ei imwintihti kan kin pwakipwakih ie ahnsou koaros.
2 Rahn ehu pwon ei imwintihti kan kin pelipelian ie.
Me ngeder me kin men peiong ie.
3 Maing KAUN, Wasa Lapalap, ni ei kin masepwehkada,
I kin patohwan likih komwi.
4 I kin likih Koht oh I sohte kin masak mehkot;
I patohwan kapingahki mehkoaros me e ketin inoukihda.
Dahme aramas kak wiahiong ie?
5 Rahn ehu pwon ei imwintihti kan kin kihong ie nan apwal;
re kin medemedewe ahnsou koaros duwen ar pahn kauweiehla!
6 Re kin pokonpene wasa rir kan
oh mwasamwasahn mehkoaros me I kin wia,
raparapahki ahnsou me re pahn kemeiehla.
7 Maing Koht, komw ketin kaloke irail pwehki ar tiahk suwed;
komw ketin kalowehkihdi aramas pwuko omwi engieng!
8 Komw mwahngih uwen apwal laud me I patopato loale;
komw ketin kileledier uwen tohtohn pilen mesei.
E seu ntingdier nan sapwellimomwi pwuhk?
9 Ni rahn me I pahn patohwan likwerih komwi,
ei imwintihti kan pahn wekidekte tangdoaui.
I patohwan ese met: me Koht kin ketin uhpalikinie—
10 I kin patohwan kapikapinga sapwellimen KAUN-O inou kan.
11 I kin likih, oh I sohte pahn masak mehkot.
Pwe dahme aramas kak wiahiong ie?
12 Maing Koht, I pahn patohwan meirongkihong komwi dahme I inoukidahr;
I pahn patohwandahng komwi ei meirong en kasapahlkalahngan,
13 pwehki omwi ketin kapitiehla sang mehla
oh ketin doareiesang pahn manaman en ei imwintihti kan.
Eri, I pahn patohwan weweid mwohn silangin Koht,
nan maraino me kin dakedaker me momour kan.