60
Kapakap en Kasaledkla m TITLE NI MAHSEN EN IPRU: En Depit melkahka, mehn wia padahk, ni ahnsou me e mahweniong mehn Aram me kohsang Naharaim oh sang Sopa, oh Sohap ahpw pwurala oh kemehla mehn Edom nen riekid nan Wahun Soahl. 2 Sam. 8.13; 1 Kron. 18.12.
1 Maing Koht, komw ketin soingkitalahr oh kaloweikitdier;
komw ketin engieng paht—ahpw met komw pwurehng ketin sapahldohng kiht.
2 Komw ketin kupwurehda pwe sampah en rerada, oh pwelen sampah en pwalpeseng;
komw ketin kamwahwihala ohla pwukat, pwe sahpwo nektehn mwerpeseng douluhl.
3 Apwal tohto komw ketin mweidohng sapwellimomwi kan en lokolongki mwuledek;
se kin sansasseli rasehng ma se sakaula.
4 Komw ketin panawiher irail kan me kin wauneki komwi,
pwe re en kak pitsang kauparail.
5 Komw ketin komourkinkitala sapwellimomwi manaman; komw ketin sapeng at tungoal kapakap,
pwe irail kan me komw kin ketin loalloale re en kapitipitla.
6 Koht ahpw ketin poahngok sang nan mwoale sarawio, mahsanih,
“Ni manaman en powehdi I pahn pwalangpeseng Sekem
oh nehkpeseng Wahun Sukot rehn nei aramas akan.
7 Ngehi me ahneki Kilead, oh pil Manase;
Epraim iei ei lisoarop en mahwen
oh Suda ei sokon en nanmwarki.
8 Ahpw I pahn doadoahngki Mohap duwehte nei dahl en epwinek,
I pahn kesehdiong pohn Edom ei suht,
kilel en eh uhdahn ahi.
Ia duwe tohn Pilisdia, re medemedewe me re pahn ngisingiski arail poweiehdi?”
9 Maing Koht, ihs me pahn kahreielahng nan kahnimw kehlailo?
Ihs me pahn waielahng Edom?
10 Ia duwe, mehlel me komw ketin soingkitalahr?
Komw sohte pahn ketin iang kahluwa at tungoal karis kan?
11 Komw ketin sewesei kiht pelian at tungoal imwintihti kan;
sawas en aramas me mwahl oh sokatepe.
12 Ma Koht pahn ketin ieiang kitail, kitail pahn powehdi;
ih me pahn ketin kalowehdi atail imwintihti kan.
m^ TITLE NI MAHSEN EN IPRU: En Depit melkahka, mehn wia padahk, ni ahnsou me e mahweniong mehn Aram me kohsang Naharaim oh sang Sopa, oh Sohap ahpw pwurala oh kemehla mehn Edom nen riekid nan Wahun Soahl.