14
Kapingpen Saimon
1 Nan pahr 172w PAHR 172: Sounpar wet pahrekiong pahr 140 mwohn Krais. Nanmwarki Demihtrius Keriemen ketin kapokonepene sapwellime karis oh ketilahng Media pwehn rapahki sawasepe ni eh pahn mahweniong Tripo.
2 Ni ahnsou me Arsakihs Kewenemen, nanmwarkien Persia oh Media karongehda me Demihtrius ketilongehr nin lime wehi, e ketin kadarala emen sapwellime lapalap en sounpei ko ianghki sounpei kei pwe re en poar mourihedi Demihtrius. 3 Re ahpw mahweniong oh kalowehdi sapwellimen Demihtrius kariso, irail eri salihedi Demihtrius oh walahng rehn Nanmwarki Arsakihs, ih eri kesehlong nan imweteng.
4 Wehin Sudia eri meleileidi erein Saimon eh momour. Nindokon eh kakaun, e doadoahngki sapwellime manaman pwehn wia kamwahu ong sapwellime aramas akan, oh aramas akan kin pereperenki ahnsou koaros eh wia arail kaun emen. 5 E pil kalaudehla eh adamwahu ni eh kalowehdi wasahn peidi en sohp nan Sopa ritingadahng irail ahl en pedolong ong ni deke kan en Krihs. 6 E sohte ketin kalaudelahte nin limarailo oh kalowediong pahn eh manaman wehio pwon, 7 ahpw e pil kapwurehdo me selidi nan mahwen kan oh pil kalowehdi Keser, Pedsur, oh kelen mahwen me mi nan Serusalem. E kamwakelehda kelen mahweno ong kaudok, oh sohla aramas emen me uhwong.
8 Mehn Suhs kan eri wie doadoahk nan sapwarailo ni popohl; sahpwo kapwarehda wahnsahpw oh tuhke kan pil weuwa. 9 Mwahnakapw akan popohnmwasohki ar likoun sounpei kan, oh ohl mah kan kin mwomwohdpene wasahn tuhpene kan koasoakoasoia duwen soahng kapwuriamwei kan me wiawiher. 10 Saimon nahkpene mwenge ong kahnimw kan oh tehtehn mahwen mehn wia poadoaroaparail. Eh ndand ahpw lohkseli wasa koaros. 11 E kahrehiong wehio popohl, oh en Israel peren solahr ese dahkot kehnaudok. 12 Aramas koaros momour meleilei nan pein arail mwetin wain kan oh tuhke pik kan, oh sohte emen me kamasak irail. 13 Ni ahnsou pwuko re kalowehdi nanmwarki kan me kin imwintihtiong irail, oh sohla emen nan wehio me pahn mahweniong irail. 14 Saimon pil rapahki elen sewese me semwehmwe kan en sapwellime aramas akan, oh mihmi pahn kaweidpen Kosonned en Moses, e kasohrehla aramas suwed me sohte peikiong kosonned kan. 15 E ketikihda dipwisou kaselel kei ong Tehnpas Sarawio oh pil katohtowehla dipwisou kan me re kin doadoahngki ni ahnsoun kaudok.
16 Ni ahnsou me rongen en Sonadan eh mehla eh lellohng Rom oh Saparta, e kahrehda pahtou laud. 17 Ahpw ni ahnsou me mehn Saparta kan rongada me Saimon wiliandi rie pwutako oh wiahla Samworo Lapalap, oh ih me kakaun wehio oh kahnimw kan, 18 re ahpw ntingihedi pohn prons ehu inou sapahl en kaminimin me re wiahiongehr rie pwutak Sudas oh Sonadan oh kadaralahng pronso. 1 Mak. 8.22. 19 Inowo eri wadawadohng pwihnen wiekupwur kan nan Serusalem. 20 Oh iet pelien kisinlikou me iang inowo sang mehn Saparta kan:
“Rahnmwahu sang mehn Saparta oh lapalap akan ong Samworo Lapalap Saimon, lapalap akan, oh samworo en mehn Suhs kan, oh pil ong riat mehn Suhs koaros. 21 Meninkeder kan me kumwail kadarodohng kiht koasoaiong kiht duwen amwail wahu oh ndand. Ara pas reht wia poahsoanen at peren, 22 oh duwen ara pas reht ntingdier nan pwuken wehi, nin duwe met: ‘Numenius, nein Antaiokus oh Antipater, nein Sason, wiliepe wahu en mehn Suhs kan, patohier mwoht pwe ira en onesapahl arail inou en kaminimin. 23 Pwihnen wiekupwur kan perenkihda ar kasamwo ohl pwukat ni wahu oh kihdiong pelien kisinlikou me ira wahdo nan wasahn nekinek en pwuken wehi, pwe mehn Saparta en kolokol ire wet nan pwuken wehi. Pelien kisinlikou en inou wet pil wiawidahr oh pekederlahngehr Samworo Lapalap Saimon.’ ”
24 Mwurin mwo, Saimon pil kadarala Numenius Rom iangahki eh kisakis mehn sansar kohl ehu me uwen toutouwih elep en ton, pwe en pwurehng onehda sapahl ar inoun minimin ong mehn Rom.
25 Ni mehn Israel kan ar rong duwen mepwukat, re ahpw mengimengloalki, “Ia duwen atail pahn kak kasalehda atail kapingkalahngan ong Saimon oh sapwellime pwutak kan? 26 Ih, iangahki rie ko, oh peneinei en seme koaros me wia poahsoan kehlail en atail wehi. Re mahweniongehr atail imwintihti kan oh kasaledekihala atail wehi.”
Eri, irail ntingihedi mepwukat ni prons oh kauwada ni uhr kei nin Nahna Saion. 27 Iet duwen me ntingdier:
“Ni rahn kaeisek waluh en sounpwong en Elul, nan pahr 172,x PAHR 172: Sounpar wet pahrekiong pahr 140 mwohn Krais. ni kesiluh en sounpar me Samworo Lapalap Saimon wiewia kaun emen, 28 pwihn lapalap en samworo kan, aramas akan, lapalap akan, oh kaunen wehi pokon kan kasaledahr ire pwukat: 29 Pak tohto ni mahwen eh kin wiawi nan wehiet, Saimon, nein Madadaias, samworo men sang ni peneinei en Sehoiarip, iangahki rie kan kin pangala ar mour pwe re en doare atail wehi, atail Tehnpas Sarawio, oh atail Kosonnedo sang atail imwintihti kan. Re kahredohr lingan lapalap ong atail wehi. 30 Sonadan kaminiminihpenehr tohn wehi oh wialahr Samworo Lapalap mwohn eh sipalla. 31 Imwintihtien mehn Suhs kan koasoanedier re en mahweniong atail wehi oh kasaminehla Tehnpas Sarawio. 32 Saimon eri wiahla kaun emen oh mahwenki eh wehi. E doadoahngkihla pein sapwellime mwohni pwehn pwainkihda tehtehn mahwen oh pwainki sounpei kan en wehi. 33 E kelepene kisin kahnimw kan en Sudia, ahpw mehlel Pedsur ni irepen wehio, wasa me imwintihti kan nahkpene ie arail tehtehn mahwen kan. E ketikihdiong sounpei kei wasao. 34 E kelepene wasahn peidien Sohp nan Sopa oh kahnimw en Keser ni irepen Asdod, wasa me imwintihti kan pil mihmihier ie. E ketikihdiong mehn suhs kei wasao oh ketikihong tohn kahnimwo soahng koaros me re anahne. 35 Ni aramas akan ar kilang duwen en Saimon eh poadidi oh duwen eh men kahredohng eh wehi lingan, re ahpw kasapwilada en wiahla arail kaun oh Samworo Lapalap. Re wiadahr met pwehki mehkan koaros me e wiadahr nan eh loalopwoat oh pwehki eh kahredohr pwuhng oh song ni ahl koaros en kahredohng eh wehi lingan.
36 “Mehn liki kan pekeus sang nan wehio ni ahnsou me e wiewia kaun men. Imwintihti sounpei kan pweksang wasa me re mihmi ie ni paliepeng en Tehnpas Sarawio, wasa re wiahda ie kelen mahweno, oh kin kohieisang wasao oh kohla kasaminehla Tehnpas Sarawio. 37 Saimon eri kihdiong mehn Suhs kei nan kelen mahweno, kakehlahda pwehn wia mehn poadoarepen wehio oh kahnimw en Serusalem, oh pil kailehda kehl kan en kahnimwo. 38 Pwehki wiewia pwukat, Nanmwarki Demihtrius kamanahla sapahl nan dewen Samworo Lapalap, 39 oh ketikihong en lengilengki “Kompoakepahn Nanmwarki,” oh kin wauneki mehlel. 40 Demihtrius wiadahr mepwukat pwehki eh karonge me mehn Rom kan kin wiahki mehn Suhs kan kompoakepahrail, iengarail, oh riarail oh re kasamwoier nein Saimon meninkeder kan ni wahu mehlel.
41 “Kahrehda, mehn Suhs akan oh arail samworo kan perenki Saimon oh kadaudoke kan ar pahn wiewia ar kaun oh Samworo Lapalap, lao emen soukohp mehlel pahn pwarada. 42 Saimon pahn kin kakaun ar wehi, apwahpwalih Tehnpas Sarawio, oh pil wiewia kaunen sounpei. E pahn kin apwahpwalih tehtehn mahwen kan, kakehlakahda kehl kan, oh wiewia doadoahk en wehi pokon. 43 Aramas akan uhdahn pahn peikiong ni mehkoaros. Doadoahk en wehi pokon koaros pahn wiawihda ni mware. E pahn ahneki pwung en mi nan likoun soupeidi oh kapwatki mehn kateng kohl en nanmwarki.
44 “Sohte aramas emen, de samworo men, pahn ahneki pwung en kauwehla de wekidala ehu en Saimon koasoandi pwukat, de wia ehu kapokon nan wehiet ni ar sohte ale mweimwei, de likawih likoun soupeidi iangahki mehn kateng kohl. 45 Mehmen pahn sapeikiong de sohte daur kosonned pwukat pahn ale kalokope.
46 “Aramas ako eri ehupene oh pwungki re en kamanahla Saimon ong pwung en doadoahngki kosonned pwukat. 47 Saimon eri pwungki en wiahla kaun: Samworo Lapalap, kaunen sounpei, oh kepina en mehn Suhs oh samworo kan.”
48 Irail eri koasoanehdi me kalohk pwukat en ntingdiong ni prons oh kokouda wasa kis nan kelen Tehnpas Sarawio 49 oh pelien kosonned pwukat en nekinekla wasahn nek mwohni en Tehnpas Sarawio, wasa me Saimon oh nah pwutak kak tetehk.