1 Da Mosi hott ksawt zu di evvahshti funn di shtamma funn Israel, “Dess is vass da Hah gebodda hott:

2 Vann en mann en fashprechnis macht zumm Hah adda sich fabind zu ebbes bei shveahra, dann soll eah sei vatt halda. Eah muss grawt du vass eah ksawt hott.

3 Vann en leddich maydel es noch dihaym is en fashprechnis macht zumm Hah adda sich fabind zu ebbes,

4 un iahra daett heaht veyyich di fashprechnis adda vass see sich gebunna hott ditzu, un eah sawkt nix zu iahra, no soll sell shtay bleiva vass see fashprocha hott un vass see sich gebunna hott ditzu.

5 Avvah vann iahra daett dess nett alawbt uf em dawk es eah heaht diveyya, dann soll kens funn iahra fashprechnisa adda fabindnisa shtay bleiva. Da Hah haybt see nett shuldich veil iahra daett's nett alawbt.

6 Vann see heiyaht noch demm es si en fashprechnis gmacht hott adda sich gebunna hott zu ebbes unni goot drivvah denka,

7 un iahra mann heaht diveyya un sawkt nix zu iahra, no zayld iahra fashprechnis un fabindnis shtay bleiva.

8 Avvah vann iahra mann's nett alawbt uf em dawk es eah heaht diveyya, dann macht eah see lohs funn iahra fashprechnis un vass see sich gebunna hott ditzu unni drivvah denka. Da Hah haybt see no nett shuldich.

9 Ennichi fashprechnis adda fabindnis es en vitt-fraw adda en fraw es divorced is macht, is shuldich fa's ausdrawwa.

10 Vann en fraw bei iahra mann laybt un see macht en fashprechnis adda sich bind zu ebbes bei shveahra,

11 un iahra mann sawkt nix zu iahra un see shtobba dutt vann eah heaht diveyya, dann soll iahra fashprechnis un sell es see sich gebunna hott ditzu shtay bleiva.

12 Avvah vann iahra mann's nett alawbt vann eah heaht diveyya, no doon kenn fashprechnisa adda fabindnisa es funn iahra leftz kumma sinn shtay bleiva. Un da Hah haybt see nett shuldich difoah.

13 Iahra mann kann ennichi fashprechnis adda fabindnis es see macht shtobba adda on gay lossa.

14 Avvah vann iahra mann nix sawkt zu iahra funn dawk zu dawk, no alawbt eah iahra fashprechnisa un di sacha es see sich gebunna hott ditzu. Eah alawbt dess bei nix sawwa zu iahra vann eah heaht difunn.

15 Avvah vann eah si shtobt en veil noch demm es eah heaht diveyya, dann nemd eah iahra shuld uf sich selvaht.”

16 Sell sinn di adninga es da Hah em Mosi gevva hott zvishich en mann un en fraw, un zvishich en daett un sei leddich maydel es noch dihaym is.