1 Da Dawfit hott no kfrohkt, “Is noch ennich ebbah ivvahrich fumm Saul sei family es ich shtandhaftichi-leevi veisa kann fa di sayk fumm Jonathan?”

2 Nau's voah en gnecht fumm Saul sei family es Ziba kaysa hott. Si henn een groofa fa fannich da Dawfit kumma, un da kaynich hott ksawt zu eem, “Bisht du da Ziba?” “Yau, ich binn dei gnecht,” hott eah ksawt.

3 Da kaynich hott no kfrohkt, “Is noch ennich ebbah ivvahrich fumm Saul sei family es ich Gott sei leevi veisa kann ditzu?” Da Ziba hott ksawt zumm kaynich, “Da Jonathan hott alsnoch en boo es laybt; eah is gegribbeld in sei zvay fees.”

4 “Vo is eah?” hott da kaynich kfrohkt. Da Ziba hott ksawt, “Eah is am Makir, em Ammiel sei boo, sei haus in Lo-Dabar.”

5 So hott da Kaynich Dawfit een hohla glost funn Lo-Dabar, fumm Makir, em Ammiel sei boo sei haus.

6 Da Mephibosheth voah em Jonathan sei boo un da Jonathan voah em Saul sei boo. Vo da Mephibosheth zumm Dawfit kumma is, hott eah sich nunnah gebikt un hott eem eah gevva. No hott da Dawfit ksawt, “Mephibosheth!” “Do binn ich, dei gnecht,” hott da Mephibosheth ksawt.

7 “Feich dich nett,” hott da Dawfit ksawt, “Ich vill diah shtandhaftichi-leevi veisa fa di sayk funn deim daett da Jonathan. Ich gebb diah awl's land es zumm Saul, dei grohs-faddah, keaht hott. Un du solsht immah an meim dish essa.”

8 Da Mephibosheth hott sich nunnah gebikt un ksawt, “Veah binn ich, dei gnecht, es du acht nemma setsht funn en dohdah hund vi mich?”

9 No hott da kaynich da Ziba, em Saul sei gnecht, bei groofa, un hott ksawt zu eem, “Ich habb dei meishtah sei kinds-kind alles gevva es zumm Saul un sei family keaht hott.

10 Du un dei boova un dei gnechta sellet's land shaffa un di eahn rei bringa fa een so es acht gevva vatt uf dei meishtah sei kinds-kind. Un da Mephibosheth, dei meishtah sei kinds-kind, zayld immah an meim dish essa.” (Nau da Ziba hott fuftzay boova katt un zvansich gnechta.)

11 No hott da Ziba ksawt zumm kaynich, “Dei gnecht dutt vass-evvah es mei hah, da kaynich, seim gnecht gebodda hott.” So hott da Mephibosheth am Dawfit sei dish gessa vi ayns fumm kaynich sei boova.

12 Da Mephibosheth hott en yungah boo katt es Micha kaysa hott. Un awl selli es im Ziba sei haus gvoond henn voahra em Mephibosheth sei gnechta.

13 So hott da Mephibosheth in Jerusalem gvoond veil eah immah am kaynich sei dish gessa hott. Eah voah gegribbeld in di zvay fees.