1 Na Paul Iesu Keriso ta apostel ana God na siriketo umbuna, amite ungotenau namei Timothy na ungo God ta ekalesia da Corinth embomeni te eto ungo enda Achaia embomeni ototohu tapa amita degi ahari erevi ere kajihera. 2 Eto ungotenau Mama God te eto Bada Iesu Keriso te amita hondate ari te peka te ungota degi iresuja.

3 Eto ungotenau jo ari ta Mamo God amita degi ta eto hondate ari tapa puvaguja avoeto ungotenau Bada Iesu Keriso ta Mamo God avo osa be ue jakeka erera. 4 Eto amina ungotenau osaga tapa avo kogue hondate uoi mine ungotenane hondate ari God ta degi humbagora avo jigama ue embo nei ta osaga neite neite avo kito hondate eagora 5 eto amita ke be amo Keriso na osaga peni vahai kina ainge dombo ungotenanena koguore Keriso na ungotenau tunga jamo ari mine avo ikeoi humbagora 6 eto dagona osagate memengate embota ingeni ta kogue mihera amo God na ungota ari sasapura avo oreketo humbuto tunga jamo ari ta ikaguja amita ke ungota degi hande ere ora avoeto kogue mihera. Eto dagona tunga osaga kiari ijite tunga jamo ari ere humbuhora avo ungona tunga jamo ari ere humbuhava avoeto ungotena tapa na tunga osaga humbari haite aisora. 7 Eto ungona osaga te memenga te kogue miheva avoeto dagote tapa God ta degi kekota ari ere humbuhava avo dago na ere kogora avoeto ungotena tapa do humota ue mihera avo humbasora. 8 Eto dagota namei kamei, ungo be kiagova uje ere ora amo eto dago enda Asia ta mihie bouka peni vahai umbua amo dago oenga humbari haite mane rate embo na tea amo pehari ahumpa ea 9 amo dagota sari ari ta duru avo humbuto arako ere ua ehera avoeto aita kehera amo sovera dagota avo humota mane aisora te God ambure embo jigeoi vasiri te eraguja embo vahai avo humota ere uahera. 10 Eto ari sapura be avo kia te God na ari avo kito dago oreketo umbuna avoeto dago ke be erera amo amina mahainge orekasuja 11 ari ainge avoembo jo vahai eto dago embo pari evujo. Eto ungona pari ijirovo God na dago orekihirou ungo embo isapamane na dago kito osa aisova.

12 Eto ke erevi ke be pere avoeto tunga javotoho ue ungota degi erera amo enda embo tapa ta degi ari tapa do eagora amo ke sokova na ae rate ke be ari te ke otohu ari te God ta degi puvaguja amina eagora, amo enda embo ta kiari sokova na ae rate God na hondate uoi eagora. 13 Eto dagota ahari kajari aita amo ke ojikari irae rate ke araha ta pere ungona eheketo kiari haite avo pere kajagora. Avoeto na uje ere ona amo 14 ungona dago be kogue hamo ere uma Iesu ta puvurari iji puvurou ungotenane javo mine kaha ue amita tihi ta hetasora. 15 Eto ungona dago hamo ueva avo ke be hotembihe hae heriso ungota degi pambasi uje uena amo 16 enda Macedonia ta pambasi pambuto ungota da aita heteto umoro eto pambuto egerembeto Judea ta pambasi ue ungoga umoro ehako asi aita hetasi uje uena. 17 Eto na ainge aisi hotembihena te tohena avo ungona na jo heriso ue ari ke eagovete? Eto enda embona aisona ke aisuja te ambota amo mane aisuja ke ainge avo dago na ari ke erevete? 18 Eto dago God ta ke be na ungota degi erera amo dagona hotembari heriso, jo heriso na ungota degi ke ae rate 19 God ta Meni Iesu Keriso amita ke avo namote Silas te Timothy te na ungota degi hande uera aita ke nei mane hambasova te ke vahai amina heteto mahainge iresuja. 20 Eto God na ke isapamane embo ta degi oje ereua amita ke be tapa amo Iesu ta degi hambasora avoeto amita ke avo ke be ijie embota degi hande uore jakeka ari te pekari te God ta degi puvaguja. 21 Eto eha emo God na oi ungotena tapa Iesu Keriso ta jo ta heteto mihera. Eto amina amita Ahihi Otohu ungotenau jo ta overekena 22 amo ungotena Iesu Keriso ta toho amita hajire embo na kiagora overekena avo ungotena kogue ambota do puvurou kesora avo ke be erera.

23 Eto na ungota da Corinth ta pambae tohena amita be avo ano ingivujo, amo ungona nau ke ngahia avo eagone ingito ungona osaga kiagova avo hotembeto pambae tohena avo God ta tihi ta erena. 24 Eto ungota God humota ari avo dagona tihi jigesi ae rate ungo God humota ue heteto miheva avoeto ungo daingeto tunga javotoho ue iresova avo ungote namote tapa na jombure ereora.