19
Papironivanto taiqa vurara nyaamwuni varuhua nronraqama kye qamwatora
1 Nyaamwunyaava nronravanto mwitaa tuvana nte riaavata nyaamwuni varu nraakye qorahua airivanto nronraqama kye tiqata:
Nrivaqe Kotira nrutu tuaaheraare.
Tire raupirima virera huraro
Kotiva tiri huvantu timwa taihata qio varuro.
Kotira okyaravanto kepukya okyara nraahuma vaiho.
Mwiva kepukyavanto variqaro
kepukyaqa hiqaro variqiro quananrove.
2 Mwiva ko tiqaro avuqavuma kyeqaro qutaa ko ti varivave.
Papironi mwatukya nronravanto api qaraqiro nrohi vari
nraakyera votima kyero api qaraqiro nrohi varihata
ekyaa mwatanaavanto mwiavata api nrohiqata
uaqiama quarara tiro, mwia kyaara mwi mwatukyaraqaa
Kotiva qua vatero mwia ntuqutu raupirima kyaiho.
Mwi mwatukyava Kotira kyaiqa vaisi airi ru kyaiharo
mwia kyara Kotiva mwia nai kyoqaa mwiqanro
mwia ntuqutirave, tita.
3 Mwihua mwitaa timwa kyeta qaiqaa nronrama kyeta tiqata,
Nrivaqe tire Kotira nrutu tuaaheraare.
Mwi mwatukyava qia ite variharo mwiqitairo
qia munravanto ekyaa enta nrivi variananrove, tura.
4 Mwihua mwi quara mwitaa tuvata nronra vaisi nramwuvata, qati variqi vi varu inraikyava taaratana taaratanavata, mwihua mwatasata tumu ntita varuvaro Kotiva nai taintaqa mwatakyaa viro varuvata mwihua mwia qamwata mwateta tiqata,
Qutaave. Nrivaqe tirevata Kotira nrutu tuaaheraare, tita.
5 Mwihua mwitaa tuvaro Kotira tainta nronra taintaqitairo qua
mpovanto mwitaama tiro:
Nkye Kotira kyaiqa vara mwate varia nraakye
qorahuave, nkye Kotira nraatu aatu hiqata
nrohi varia nraakye qorahuave,
nkye nronra vaisivantove, pata vaisivantove,
nkye ekyaa Kotira nrutu tuaaheraate, tiro.
Nyaamwuni sipisipi nraativanto nraata varovata nronraqama kye kyara nronra
6 Quavanto mwitaa tuvana nte variqana rie variavaro airi nraakye qoravanto qua tuntema kyero quavanto ti varura. Mwi quava aisaakya nronraqitairo hara hara tuntema kyero tiro. Mwi quava nyaanruva nruqua tintema kyero tiqaro mwitaama tiro:
Nrivaqe tire Kotira nrutu tuaaheraare.
Tiri nronravanto Kotiva ekyaa inraikya nraatara kyairave.
Mwiva ekyaa inraikyaqa ntaqikyi varivave.
7 Nrivaqe tire Kotira okyarara kepukya okyarave
timwaqi viqata mwianra qamwataqi viqata variare.
Sipisipi nraati mwiva nraakye varaari entava qaumato
vaiho. Mwia mwitai nraakyeva terama teroma variho.
8 Mwi nraakyerara kyuqe tuavaaqa, eqarori tuavaaqa
takyuqi varira, utute variarive tiro mwia mwinrave, tiro.
Mwia nraata mwiva varirero ekyaa Kotira nraakye qorama
varita. Tuavaaqa kyuqera eqarori mwia okyara vahirero Kotira
nraakye qoravanto kyuqe kyaiqa varaavama vahiro.
9 Mwi quava mwitaa tuvaro nyaamwunyaava nianra tiqaro,
Mwaa quara mwitaama kyera qara ntumwa taante. Sipisipi nraati
mwiva nraakye varaani omwatara nranrenra hiro nai nraakye
qora nyaanrama taarihua, mwi nraakye qorahua qamwateqatama
varivarave, tiro. Mwitaa timwa kyero mwiva qua mpo
tiqaro, Mwi quara Kotira qua, qutaa quama vaiho, tiro.
10 Nyaamwunyaava mwitaa tuvana nte mwia kyuqutarani tumu ntina mwia qamwata mwateqana mwia nrutu tuaaherarera utuavaro mwiva tiqaro, Qaqao, hia mwitaa hiante. Nte i nraantantena Kotira kyaiqa vaisima varuqo. Nte ivata i qata vakyaahuavata nraantantena Iesusira qua timwa nyiqi vi varurahuama varuqo. E Kotirara nraahu ni mwanriqave tiqarama mwia qamwata mwataante. Kotira mwanraquravanto haaru poropeti vaisi kyaahaqama nyate varuvata mwihua Kotira qua qovarama kye varurave. Mwia votima kyero Kotira mwanraquravanto tirivata kyaahaqama timwa te varihata tire Iesusira qua timwa nyiqi vi varunanrave, tiro.
Qosi eqarori mwoqaqa mwatakyaa viro varurara tura
11 Nyaamwunyaava mwitaa tuvana nte variqana taqaavaro nyaamwuvanto qatua vuvaro qosi eqarorivanto qovarama viro. Qovarama viro varuvaro mwia mwoqaqa vaisi mpovanto varuvaro mwi vaisirara Kotirara nraahu rie vari vaisivave timwa kyero, qutaa vaisive tura. Mwi vaisirara mwitaa tuvaro mwi vaisiva mpohuaqa qua vatarero hirove, mpohua rirero hirove, mwiva avuqavuma kyeqaro mwitaa hura.
12 Mwi vaisiva varirero mwia vuvanto qia votima kyero ite varuvaro mwia qiataqaa nronra vaisi tovaqa airi vahuvaro mwi vaisiraqaa nrutu mpo qara ntumwa tova vahuvaro hia mpovanto mwi nrutura ntapihi kyovaro nai mwi vaisiva nraahu mwi nrutura ntapihi kyora.
13 Mwi vaisiva nai nraahu naiqaa qara ntumwa to nrutura ntapihiro variqaro vaaqa ututovaro vaaqa mwiva nraanreqi ntamwa kyova vahura. Mwi vaisira nrutu Kotira Quavantove, tura.
14 Mwi vaisira nrutu mwitaama vahuvaro mwiva vi varuvata nyaamwusai ntaquhua mwia kyuquqa vitinteta mwia vataqi viqata mwihuavata qosi eqaroriqaa viqata kyuqe tuavaaqa eqarori tuavaaqa takyuqi varura ututeta vi varura.
15 Vi varuvaro mwi vaisira nroqitairo paipa vaihova nrintero vahuvaro mwi paiparaqotairo ekyaa mwatanaa nraatara kyaariva varura. Mwi vaisiva ekyaa mwatanaa nraatara kyero mwiva qaini kyauru tu varero viqaro mwihuaqaa ntaqikyiqiro quananro. Mwiva mwihuaqaa ntaqikyiqiro viqaro uaini tamwa tanu nronraqi kyero tatintema kyero mwi vaisiva Kotiva ekyaa inraikya nraatara kye variva, raraqa taani nraakye qorahua ntuqutuqiro quariva varura.
16 Mwi vaisiva varuvaro mwia tuavaaqa ututoraqaavata mwia tukyaqaavata qua mpo qara ntumwa tova mwitaama tiro:
Ekyaa vunyaa vaisi variavaro
mwaa vaisiva mwihua vunyaava varirave.
Ekyaa nronra vaisi variavaro
mwiva mwihua nronra vaisi varirave, tiro.
17 Mwitaa hi varuvana nte taqaavaro nyaamwunyaa vaisi mpovanto huari vuqi siviro variqaro nronraqama kyero qua tiqaro ekyaa hiteta nrohi varu nyaamwahua nyaanrenro tiqaro, Nkye ekyaa nriate. Kotiva omwata nronra nrainani nrumu nraate.
18 Nkye nrumu vunyaa vaisi mwamwanta mwati nreta ntaqua vaisihua mwihuaqaa nronraqahi vaisira mwamwanta mwati nreta, nronra vaisi mwihua mwamwanta mwati nreta, qosivata mwihuaqa mwatakyaavi varia vaisihuavata, ekyaa mwatanaavata, rupa taa vaisihuavata, qati varia nraakye qorahuavata, nrutu vataa nraakye qoravata, hia nrutu vataa nraakye qoravata, nkye ekyaa mwihua mwihua mwamwanta mwati nrumu nraate, tiro.
19 Nyaamwunyaa vaisivanto mwitaa tuvana nte taqaavata qaakyau vairivantovata, mwatani vunyaa vaisinramwuvantovata, mwihua ntaqu vaisihuavata, mwihua kuaaqa ntuvaantuama vita qosiqaa mwatakyaa viro varu vaisira mwiavata, mwia kyuquqa nruhua ntaqu vaisihua mwihuavata, ntaqirerata uti varura.
20 (Ntaquqi vi varuvaro qosiqaa varu vaisiva mwihua nraatara kyero) qaakyau vairi mwia rupa tero vaisi mpovanto unra tiqaro, Kotira qua qovarama kye varuqo, tu vaisiravata rupa tora. Unra vaisi mwiva vuni qaakyau vairi kyaahaqa hiqaro nraahumwa mpo kyaiqa nronra kyaiqa vare varuvata nraakye qoravanto qaakyau vairi nampaa varohua qaakyau vairi mwanraquhara tiri mwanriqave tiqata qamwata mwatohua, mwihua unra vaisi mwia kyaiqa taqeta qutaama mwiva Kotira qua ti varuvave tura. Unra vaisi mwiavata qaakyau vairi mwiavata hia ru kyaraitiro, mwitanahua qia nronraqama kyero itoraqi tuto kyovatatana mwiqi varura. Mwi qiava ite varuvaro mpoqama kyero nriqiqi viqaro munravanto ukavi varu qiava vahura.
21 Mwitanahua qiaqi tuto kyero qosiqaa varu vaisiva uro ntaquqi viro mwitanahua kyuquqaa vitinto vaisihua ruqiro viro nai paipa, nroqitairo nru paiparaqotairo, mwihua ru taiqa kyovaro nyaamwa ekyaa mwihua nrumu mwihua mwamwanta mwati toqa ntupepaama kyeta nkyiari nraataa huntema nramwa vura.