1 Osoloso gesikolodee mapoo tei moso wiligi odoo tebisa sabolo, osoloso tei eligili odoo sabolo, osoloso Yu wiligi tebisa sabolo, osoloso wiligi odoo tebisa abo susuga oso goo hee moodoolai to mouso. Osoloso diayo to mouloso, Yesuwo dee mapoo tiso tialogoloso, Loum gamalee mi toowa wiligi odoo toba, Pailet mapoo ido dileso teneeso.

2 Eseme Pailet yayo Yesu mapoo egeesee woosaso, “Yu odoowo wiligi toba nosomo?”

Eseme Yesuye nei egeesee takaso, “O, no egee takooso,” diso.

3 Eseme tei moso wiligi odoo tebisa oso Yesu tokenee goo bei tooso doloso, dia gigidiso. 4 Eseme Paileteeye see Yesu mapoo egeesee woosaso, “No odoo susuga oso nee goo maga mudu opusomo opusomodi egee takoo omapoo nayo to nei takalaimeyo?” diso.

5 Esino Yesuye to nei takele. Eseme Pailet yayo goo hagee ogoloso hoowaso.

6 Osoloso dugo susuga ma kulodu, Godeeye gababia wo ne beeame omapoo, odoo susuga goomogalame, Paileteeye odoo hee neliga moso ma kulodu badeli, odoo yo toloso peegoo di, dee takeliso. Esino yo daga odoo susuga oso goomoga odoo hu hesiaga, odoo ee toloso neliga moso tegei maga peegoo di, dee takeliso. 7 Beeame omapoo odoo hu Balabas yayo daga o odoo sabolo Loum gamalee odoo sabolo biligameleso, diayo odoo hee wolomaso. Esiga yo neliga moso tegei ma kulodu badebeiso. 8 Osoloso odoo mooloogoodoo oso sibileso, Pailet mapoo egeesee takaso, “Nayo neliga moso ma kulodu badeli odoo hee peegoo di, dee takeliso. Esiga nayo dugo hamapoo odoo hee neliga moso maga peegoo di, dee takee,” diso.

9-10 Esino tei moso wiligi odoo tebisa oso Yesu mapoo koolone yo toloso Pailet mapoo sibileso tenee yayo ogoloso, gooleedooso. Eseme Pailet yayo odoo susuga mapoo woosaso, “Ayo Yu odoowo wiligi toba ee peegoo di, dee takalaiyo?” diso. 11 Esino tei moso wiligi odoo tebisa diayo odoo susuga mapoo to pupulone, Pailet mapoo egeesee takee diso, “Iba Yesu gowoo, esino Balabas neliga moso maga peegoo di, dee takee,” diso.

12 Eseme Pailet yayo dimapoo woosaso, “Ayo Balabas neliga maga peegoo di, dee takooga, niyo odoo hee hagee, Yu odoowo wiligi toba, dee takeliso. Esiga ayo yimapoo ogoo goo moodoolaiyo?” diso.

13 Eseme diayo agadilone Pailet mapoo takaso, “Yo homo bulubo magoo mapoo yoguso enige!” diso.

14 Eseme Paileteeye woosaso, “Bei kasimagayo? Yayo ogoo tokenee toowo?” diso.

Esino odoo susuga oso dia agadilone egeesee takaso, “Yo homo bulubo magoo mapoo yoguso enige!” diso.

15 Eseme odoo susuga goomogalame, Pailet yayo Balabas yo neliga moso maga peegoo di, diso. Eseme Loum ha teli odoo oso Yesu tiso woloso homo bulubo magoo mapoo yoguso enigilame dimapoo teneeso.

16 Osoloso ha teli odoo diayo Yesu toloso Paileteeyo moso toowa medee tekepo ma kulodu ido diso. Osoloso omapoo ha teli odoo susuga gilimadoloso mooloogoodooso. 17 Osoloso diayo Yesu manolone gamenee yo wiligi odoo toba masi palame, yimapoo dugo sage bige masi mediloso, we ti sidoloso o wiligi mapoo mediso. 18 Osoloso diayo Yesu mapoo manolone egeesee takaso, “Yu odoowo wiligi toba mapoo gawuloso goomoge,” diso. 19 Osoloso Yesuwo wiligi mapoo diayo weiso see woo see woo dolone, yimapoo makawo paga demeleeso. Osoloso diayo Yesu mapoo manolone o mudu giyopoo dibada ebiso miyomoo tugusaloso wiligi gawuloso gamenee yimapoo tei to demeleeso. 20 Osoloso diayo Yesu mapoo mane koodobuloso, diayo Yesu mapoo dugo bige masi medi peegoo tamagoloso, see o dugo kadiso. Osoloso diayo Yesu homo bulubo magoo mapoo dokodoo yoguso enigilame peegoo ido diso.

21 Osoloso ha teli odoo oso Yesu idoloso diadaga meleeno, diayo Saimon eli domopoo Yoluselem mapoo sibumolome tugodooso. Eseme diayo yo idoloso Yesuwo homo bulubo magoo imado di, diso, bei Yesu kitulugu mauwe neme. (Saimon hagee Alesanda dio Lupus dio dibada oma. Yo Sailini mi mapoo badeli odoo.) 22 Osoloso diayo Yesu toloso Gologota mi mapoo ido simiso. (Mi hu eyo bei wiligi ki mubi.) 23 Osoloso mi omapoo ido dileso, odoo hee oso Yesu mapoo sibileso geleipi ko i sabolo dala mauwe pegeli melesenee sabolo wuluguloso dala mauwe pagalame Yesu mapoo tenelame siso. Esino Yesuye howo egee nele poogooso.

24-25 Eseme gesikolo osoko howo bakadio hedepedi pogoloso osoko pounome, diayo Yesu homo bulubo magoo ma dokodoo yoguso enigaloso tuluguso. Osoloso diayo Yesuwo dugo diso dimapoo topuloso puloso ma ee kasolo tomobelee doloso dasigeli pepoko dasigiso. 26 Osoloso odoo heeso Yesu woloma goo eyo bei odoo susuga oso agalame Yesuwo wiligi ma dokodoo homo boodo pepoko mapoo egeesee hoguguloso opoogooso, YU ODOOWO WILIGI TOBA. 27 Osoloso heli teli odoo bakadio sabolo homo bulubo magoo ma dokodoo yoguso enigaso. Odoo hee Yesuwo dee deedee dokolo homo bulubo magoo mapoo yoguso enigaloso tulugu, odoo hee dee dopusu dokolo homo bulubo magoo mapoo yoguso enigaloso tulugu diso. 28 Esiga Godeeyo to booka mapoo egeesee takooso,

“Yo heli teli odoo masi talaiso.” Esiga Yesuye heli teli odoo masi talame homo bulubo magoo mapoo dokodoo molone, to hagee tei diso.*15:28 To hagee odoo abo oso taka Makaye hogugu dee takeliso, esino odoo bei oso taka Makaye hogugule dee takeliso. 29 Osoloso odoo abo eli maga dulone, Yesu ogoloso manolone dibada wiligi wapisilone yimapoo egeesee takaso, “Nayo egeesee takaso, ‘Ayo tei moso guo puguloso, see beeame bakadio hedepedi ma kulodu dia takalaiso.’ diso. 30 Esiga no telega pagalame homo bulubo magoo ma dokodooga miyomoo mei!” diso.

31 Osoloso tei moso wiligi odoo tebisa sabolo tei eligili odoo sabolo diayo Yesubolo hemeeseelone diso dimapoo egeesee takaso, “Yayo odoo abo telega pagalame pidimo siliso, esino epedee hamapoo yo telega pagalame eyo nediliyo pidilei tebiledoo! 32 Keliso, Isalael odoowo wiligi toba, yo homo bulubo magoo ma dokodooga miyomoo mouga, iyo ogoloso yimapoo tei ka talai,” diso. Eseme heli teli odoo bakadio oso, homo bulubo magoo ma dokodoo diayo yoguso enigaloso molone, Yesu mapoo maneso.

33 Osoloso osoko olo oo domopoo topoome, neliga oso mi toowa toloso melee, osoko howo bakadio hedepedi poogooso. 34 Osoloso neliga olo mauwe pogoloso hamamee epedee omapoo, Yesuye o to oso neligidi idagolone egeesee takaso, “Eloi, Eloi, lama sabakatani?” To eyo bei egeesee moloso, “Mo Godee, mo Godee, bei kasimaga nayo a ka poogoowo?” diso.

35 Eseme odoo koola omapoo tebisamelee oso Yesuye to taka hagee dume, diayo egeesee takaso, “Dui! Yo Ilaisa ee i,” diso.

36 Eseme odoo heeso hoguo dileso, homo sage toloso su mapoo dugo seme masi tialogoloso, geleipi ko i mei nali keesoo mapoo olugu doloso, Yesuye nalame o maga mapoo heligiso. Osoloso yayo egeesee takaso, “Yo epedee peegee. Ilaisaye sibileso yo toloso miyomoo sibabeleso bamo,” diso.

37 Eseme epedee omapoo Yesuye neligi iloso taso.

38 Eseme Yesuye ta beeame omapoo, tei moso tegei ma kulodu dugo kodia oso kisimelee, Godeeye dokodooga tologo pugumo abaga mouno miyomoo sa puguso. 39 Eseme ha teli wiligi odoo toba yo Yesuwo homo bulubo magooma koola omapoo topudulone, Yesuye tolone goo moodoo ogoloso, yayo egeesee takaso, “Tei takoo, odoo hagee tei Godeeyo owolodoo,” diso.

40-41 Eseme sobo abo Yesubolo Gelili abaga Yoluselem mapoo sibadee oso, eli sage abaga Yesu homo bulubo magoo ma dokodoo molome balaga meleeso. Sobo mooloogoodoo egee ma kulodu debei, dibada hu Meli Magadalinbolo, osoloso Meli hee (Yemes pepoko dio Yoses dio dibada owee) sabolo, osoloso Salomebolo, diayo Yesu mapoo bameleeso. Sobo bakadio hedepedi hagoso daga Yesubolo Gelili mapoo silone, Yesu pidimo siliso.

42-43 Yu odoowo tei beeame malalo hoogoo molome, diayo tei doloso dabalame bi mopododoo beeame habe omapoo, Yosep Alimatiya odoo yayo Paileteeye badebei omapoo diso. Yo Yu odoowo wiligi topoloso badolone, Godeeye wiligi doloso badeli oso sibilei omapoo bameli, yayo ebilega Yesuwo su talame Pailet mapoo woosaso. 44 Eseme Yosepye Yesu taso dee takeme, Pailet dia hoowaso. Bei Paileteeye goolee Yesu tele gooleeso, esino Yesu olo saga taso. Eseme yayo o ha teli wiligi odoo toba Yesuye ta egei mapoo egeesee woosaso, “Yesu taso dee takemenee teiyo?” diso. 45 Eseme o ha teli wiligi odoo toba yayo Yesu tei taso dee takeme, Paileteeye Yosep mapoo egeesee takaso, “Yesuwo su todi,” diso. 46 Eseme Yosepye dugo sage medee tekepo moleeso toloso, Yesuwo su homo bulubo magoo ma dokodooga miyomoo tomeileso, dugoso tiadooso. Osoloso yayo Yesuwo su toloso wulu ou sage yoso moodoo ma kulodu magooso. Osoloso yayo odoo abo sabolo yo toowa bidigamo sibileso, wulu ou miyopoo kisiso. 47 Osoloso Meli Magadalin dio Yosesyo owee Meli dio Yesuwo su magoo mi diayo egeiso.