75
Na God Bi Judge
Asaf Song For Di Kwayamasta
1 My God, wi tank Yu!
Wi dey tank Yu bikos Yu dey near us
and pipol for evriwhere dey tok
about di wonderful tins wey Yu dey do.
2 God sey, “Wen di time wey I choose don rish,
I go judge pipol.
3 Di eart go shake and evribody go fear,
bikos na mi make di foundashon.
4 I don warn proud pipol sey, ‘Make dem stop to dey make mout!’
kon tell wiked pipol sey, ‘Make una nor dey happy sey una don win!
5 Make una nor tink sey una don win di fight
or karry body up wen una dey tok.’ ”
6 Viktory nor dey kom from east or west
or from di wildaness,
7 bikos na God dey judge!
E dey bring one pesin down and karry anoda pesin up.
8 One cup wey full with wine wey dem mix with spice,
dey for God hand and E pour am for di world.
True-true, all di wiked pipol for di world
go drink from am till e finish.
9 But for mi, I go always dey tok about wetin Yu don do;
I go sing and praiz Jakob God!
10 God sey, “I go distroy wiked pipol with dia pawa
kon give viktory to pipol wey dey fear mi.”