1 དེ་ཡང་ཏ་ཟིག་གི་རྒྱལ་པོ་ཀོ་རེས་ཀྱི་སྲིད་ལོ་དང་པོར། དཀོན་མཆོག་ཡ་ཝཱེས་ཁོང་ཉིད་ཀྱི་བཀའ་སྟེ་ཡེ་རེམ་ཡཱའི་ངག་བརྒྱུད་ནས་གསུངས་པ་དེ་འགྲུབ་པར་མཛད་པའི་ཕྱིར། ཏ་ཟིག་གི་རྒྱལ་པོ་ཀོ་རེས་ལ་ཡི་གེར་བཀོད་དེ་རང་གི་རྒྱལ་ཁམས་ཡོངས་ལ་ཁྱབ་བསྒྲགས་བྱེད་པར་སྐུལ་མ་གནང་ནས་འདི་ལྟར་བྲིས་པ་སྟེ། 2 ཏ་ཟིག་གི་རྒྱལ་པོ་ཀོ་རེས་ཀྱིས་འདི་ལྟར། ནམ་མཁའི་དཀོན་མཆོག་ཡ་ཝཱེས་ས་གཞིའི་རྒྱལ་ཁམས་ཐམས་ཅད་བདག་ལ་གནང་བ་དང་། ཁོང་གིས་བདག་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་དུ་ཁོང་གི་ཕྱིར་མཆོད་ཁང་ཞིག་བཞེང་བར་བསྐོས་པ་ཡིན། 3 ཁྱོད་ཅག་གི་ཁྲོད་དུ་དཀོན་མཆོག་གི་འབངས་མི་གང་དང་གང་ཡོད་ན། ཁོ་ཚོའི་དཀོན་མཆོག་དེ་དག་དང་མཉམ་དུ་བཞུགས་པར་ཤོག དེ་དག་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་དུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བར་ཡར་འགྲོ་རུ་ཆུག ཁོང་ནི་ཡེ་རུ་སཱ་ལེམ་དུ་བཞུགས་པའི་དཀོན་མཆོག་ཡིན། 4 གནས་དེའི་མི་ཡིས་གསེར་དང་དངུལ། རྒྱུ་ནོར། ཕྱུགས་ཟོག་བཅས་ཀྱིས་གང་ས་གང་དུ་སྡོད་པའི་མི་ལྷག་ལུས་རྣམས་ལ་རོགས་བྱེད་དགོས། དེར་མ་ཟད་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་དུ་ཡིད་མོས་མཆོད་པ་འབུལ་དགོས་ཞེས་བཀའ་བསྩལ། 5 དེ་ནས་ཡ་ཧུ་དཱ་དང་། པེན་ཡཱ་མེན་གྱི་ཚོ་དཔོན་དང་། མཆོད་དཔོན་རྣམས། ལེ་ཝི་པ་རྣམས་ཏེ་དཀོན་མཆོག་ནས་སེམས་འགུལ་ཐེབས་པ་ཐམས་ཅད་ཡར་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བར་ཕྱིན། 6 ཡང་ཕྱོགས་བཞིར་གནས་པ་རྣམས་ཀྱིས་དངུལ་གྱི་ཡོ་བྱད་དང་གསེར། རྒྱུ་ནོར། ཕྱུགས་ཟོག རིན་པོ་ཆེ་བཅས་ཀྱིས་རྒྱབ་སྐྱོར་བྱས་པར་མ་ཟད། རང་མོས་ཀྱིས་འབུལ་བ་སྣ་ཚོགས་ཕུལ་ཞིང་། 7 རྒྱལ་པོ་ཀོ་རེས་ཀྱིས་དཀོན་མཆོག་ཡ་ཝཱེའི་མཆོད་ཁང་གི་སྣོད་ཆས་རྣམས་ཕྱིར་བཏོན་པ་དང་། སྣོད་ཆས་དེ་དག་ནི་སྔར་རྒྱལ་པོ་ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་ནས་ཁྱེར་ཅིང་རང་གི་ལྷ་ཁང་དུ་བཞག་པ་རྣམས་ཡིན་ཏེ། 8 ཏ་ཟིག་གི་རྒྱལ་པོ་ཀོ་རེས་ཀྱིས་ཕྱག་མཛོད་མིད་རེ་དད་མངགས་ཏེ་སྣོད་ཆས་དེ་རྣམས་ཕྱིར་བླངས་ནས་ཡ་ཧུ་དཱའི་འགོ་དཔོན་ཤེ་སཱ་པ་ཙར་ལ་རྩིས་སྤྲད་པ་རེད། 9 དེ་དག་གི་བསྡོམས་གྲངས་ནི་འདི་ལྟ་སྟེ། གསེར་གྱི་གསོལ་སྡེར་སུམ་ཅུ་དང་། དངུལ་གྱི་གསོལ་སྡེར་ཆིག་སྟོང་། གྲི་ཉེར་དགུ། 10 གསེར་གྱི་ཕོར་བ་སུམ་ཅུ། དངུལ་གྱི་ཕོར་བ་དམིགས་རྟེན་བཞི་བརྒྱ་དང་བཅུ། སྣོད་ཆས་གཞན་པའི་རིགས་ཆིག་སྟོང་བཅས་ཡོད། 11 གསེར་དང་དངུལ་གྱི་སྣོད་ཆས་ཐམས་ཅད་བསྡོམས་པས་ལྔ་སྟོང་བཞི་བརྒྱ་ཡོད། བཙོན་དུ་ཁྲིད་པའི་མི་རྣམས་པཱ་པེལ་ལོན་ནས་ཡེ་རུ་སཱ་ལེམ་དུ་འོང་དུས། ཤེ་སཱ་པ་ཙར་གྱིས་སྣོད་ཆས་འདི་ཐམས་ཅད་ཀྱང་ཁྱེར་འོངས་སོ། །