1 Neda', Pablo, naca' gubáz chee̱ Jesucristo lawe' da naca da dxaca lazre Dios, na' zúale̱ bi bíchedxu Timoteo neda'. 2 Dxuzúaja' da nigá chee̱le le'e zrale xe̱zre Colosas, ne nabábale chee̱ Dios, ne dxeajlí lázrele Cristo. Dxenaba' Xradxu Dios gune̱' da chawe' chee̱le le'e, ne gunne̱' le'e xel-la dxebeza zri lazre'.

3 Dxé̱quezentu' Dios, Xra Xránadxu Jesucristo: Xcalenu' ca naca chee̱le gate dxuchálajle̱ntu' Le̱'. 4 Ba bénentu' ca dxeajlí lázrele Cristo, ne ca nazri'ile xúgute̱ bi ca' chee̱ Dios. 5 Caní dxunle lawe' da dxebeza lázrele da nucueza Dios chee̱le xabáa, na' guzú laule dxunle ca naca da nigá gate guzile dizra' chawe' da naca na da li. 6 Dizra' chawe' nigá bla na ládujla le'e ca bla na dute̱ xe̱zr la xu nigá, na' dxezriluj na, ne dxun na zrin dute̱ xe̱zr la xu ca dxun na ládujla le'e, gate bénte̱le ca nazrí'i Dios bénneache, ne gunézele naca na da li. 7 Da nigá ble'e Epafras le'e. Naque̱' bi bíchedxu nazrí'i lázredxu, ne ba bé̱nqueze̱' zrin nen netu', ne naque̱' chee̱le le'e tu benne' we̱n zrin li lazre' chee̱ Cristo. 8 Epafras nigá bzenne̱' netu' ca dxaca chee̱le le'e, ne ca nazrí'i ljwézrele ne̱ chee̱ Be' Lá'azxa.

9 Chee̱ le̱ na', zra gunézentu' da nigá, dxuchálajle̱quezentu' Dios chee̱le le'e, ne dxenábantu' Le̱' guzéajni'ine̱' le'e ca naca da dxaca lazre̱', ne gunne̱' le'e dute̱ xel-la sina, ne dute̱ xel-la dxéajni'i da dxunna Be' Lá'azxa dxi'u. 10 Caní dxenábantu' Le̱' chee̱ gaca gunle ca dxal-la' xelún bi ca' chee̱ Xránadxu, ne gunle ca da dxezaca ba lazre' Le̱', gunle xúgute̱ da naca da xrlátaje, ne gúnbeadxaquezle Dios. 11 Dxenábantu' Le̱' guzúa chache̱' le'e lu xel-la waca da naca chee̱ xel-la szren chee̱' chee̱ séquele guchaga laule xúgute̱ da dxaca chee̱le lu dute̱ xel-la zren lazre' chee̱le, ne dute̱ xel-la dxebé. 12 Dxal-la' xe̱le Dios: Xcalenu', lawe' da bzua Dios dxi'u chee̱ sidxu da nucueze̱' chee̱dxu, chee̱ súadxu lu xel-la naxaní' chee̱', lawe' da nácadxu bi chee̱ Le̱'. 13 Dios bselé̱' dxi'u lu xel-la dxenná bea chee̱ da chul-la, na' bzue̱' dxi'u naga dxenná bea Zrí'ine̱' nazri'ite̱ lazre̱'. 14 Zrí'ine̱' nácaqueze̱' Bénnea' bselé̱' dxi'u gate gutie̱' waláz chee̱dxu, chee̱ bnite lau Dios dul-la gubágadxu.

15 Ca naca Jesús, dxulé'e na dxi'u ca nácaqueze Dios, Bénnea' quebe gaca lé'edxu, ne naque̱' chee̱ Dios ca tu bi nedxu chee̱ bénneache, bi nácadxabe' blau ca xúgute̱ da be̱n Dios. 16 Ne̱ chee̱ Le̱' be̱n Dios xúgute̱ da zaj zua xabáa, ne da zaj zua xe̱zr la xu nigá, da ca' dxelé'edxu, ne da ca' quebe gaca lé'edxu, che zaj naca na be' ca' zaj naca na blau, u be' ca' dxelenná bea na, u be' ca' zaj napa na xel-la szren, u be' ca' zaj napa na xel-la waca, xúgute̱ na be̱n Dios ne̱ chee̱ Le̱', na' chee̱ Le̱' zaj naca na. 17 Cristo ba zúaqueze̱' nédxute̱ ca xúgute̱ da zaj zua, na' ne̱ chee̱ Le̱' xúgute̱ da ca' dxelún na ca zaj naca chee̱ na. 18 Xúgute̱ benne' zaj naque̱' bi chee̱ Cristo zaj naque̱' ca tuze be̱l-la' dxen, na' Crístoqueze naque̱' xichaj be̱l-la' dxen na' da nácadxu. Le̱' bzue̱' be̱l-la' dxen na', ne Le̱' naque̱' Benne' bebán nédxute̱ ládujla benne' gate ca' chee̱ gaque̱' Benne' blau lu xúgute̱ da zaj zua. 19 Caní naca na lawe' da guca lazre' Dios súale̱ Cristo dute̱ da nácaqueze Dios. 20 Cá'anqueze guca lazre' Dios ne̱ chee̱ Cristo xexune̱' tuze nen Le̱' xúgute̱ da zaj zua, ca da zaj zua na lu xe̱zr la xu, ne da zaj zua na xabáa. Bexune̱' dxi'u tuze nen Le̱' ne̱ chee̱ xel-la gute chee̱ Cristo le̱'e̱ xaga béguaj.

21 Nédxute̱ le'e gúcale ca benne' zitu' lau Dios, ne bzrá'ale Dios lu xichaj lázrdaule, ne be̱nle xúgute̱ da cale̱la, san na'a Dios ba bexune̱' le'e tuze nen Le̱', 22 ne̱ chee̱ da be̱n Cristo gate gutie̱' le̱'e̱ xaga béguaj lu be̱la' dxen chee̱'. Da nigá be̱n Le̱' chee̱ gaca guzúe̱' le'e lau Le̱', gácale benne' lá'azxa, ne du lazre', ne quebe bi nabágale da cale̱la. 23 Chee̱ gaca caní dxal-la' se̱ cháchale, ne sua típale ca dxeajlí lázrele Cristo, ne quebe gusanle ca da dxebeza lázrele, da na' nápale lawe' da dxéajle̱le dizra' chawe' chee̱ Cristo. Dizra' chawe' nigá nene na dute̱ xe̱zr la xu, na' nuzúa Dios neda', Pablo, benne' we̱n zrin chee̱', chee̱ guchálaja' dizra' chawe' nigá.

24 Na'a dxebeda' lu xel-la zi' da dxedéa' ne̱ chee̱le le'e, lawe' da dxuzá lawa' lu be̱l-la' dxen chia' ca da dxezaca Cristo ne̱ chee̱ bi chee̱' ca', benne' ca' zaj naque̱' ca be̱l-la' dxen cheé̱queze̱'. 25 Bzua Cristo neda' ca benne' we̱n zrin chee̱ bi chee̱' ca', ne̱ chee̱ da bláwizra Dios neda' guna', gácale̱na' le'e, na' guchálaja' dúte̱queze da naca dizra' chee̱ Dios, 26 ne chee̱ guzéajni'ida' bénneache ca da nagache, da na' nagache nédxute̱, san na'a Dios ba blé'ene̱' bi chee̱' ca' ca naca na. 27 Guca lazre' Dios gulé'ene̱' benne' ca' ca naca xel-la gunní'a zren chee̱ da na' nagache nédxute̱, da gunézruje̱' benne' ca' quebe zaj naque̱' judío. Da na' nagache nédxute̱ naca na caní: Cristo zue̱' xichaj lázrdaule, na' chee̱ le̱ na' dxebeza lázredxu súadxu xabáa chee̱'.

28 Netu' dxuchálajntu' ca naca chee̱ Cristo. Dxuzéajni'intu' xúgute̱ bénneache, ne dxusé̱dentu' xúgute̱', chee̱ xeleajni'i xánnene̱' chee̱ xelaca xúgute̱ bénneache du lazre' lau Dios ne̱ chee̱ Jesucristo. 29 Chee̱ gaca caní dxuna' neda' zrin, dxuchíneda' dute̱ xel-la waca chee̱ Cristo, da dxun na zrin lu xichaj lázrdawa'.