5
A Wilwilaaia Baar Ma Naata Sipsip
1 Izi 2:9-10, Aais 29:11Ga raamin a baar di wilwilin la mit sazaxa zin axazak angkanaan ina xa iziar la akin izi xalxaalang. Ka rauxin a fararang la uru ritna varaxai, ma di vandaxot kol wana a bulut ka wizik urua xa rauxin amun faakilanang pana. 2 Ma ga raamin a aangelo xa maradikdik ka raraf malasing kari, “Nis ka tak kat faraxas kana paak pizin amun bulut siaana wilwilaaia baar ma naana kaas?” 3 Singsaxai xawit taxazak la lia o la pira angkari o lawaana pira xat faraxas kana kaas a wilwilaaia baar angkanaan ma naana raamaai lamaskana. 4 Ma ga raangis taksaat avuna xawit taxazak ka tak kat faraxas kana kaas a wilwilaaia baar ma naana raamaai lamaskana. 5 Var 49:9, Aais 11:1,10Malasing ma aza waamua xa vazei nia naako, “Tuaa gu raangis! Taamin, a rapti aizina a Laaion sin a watbung sin Judaa, ma a Xatkador a Dewit,* Aknaaza dorang kari adu a natnaat sin Dewit. Ka dador lalaamangaai adu Iesu naan ka malasing a xatkadar vaaxur iwana a iaai xana samura maat. naan ka ra waramin amun purua zin Nakmai. Naan be xat faraxas kana paak pizin a bulut ka wizik urua ma xana kaas a wilwilaaia baar angkanaan.”
6 Aais 53:7, Zek 4:10Naanaan ga raamin Naata Sipsip ka raamaai malasing adu di zop famaat naan, ka irur lapaara kin izi xalxaalang, ma amun faaziarang urulavaat di roro ma amun paamua di irur varaxulin naan. A Naata Sipsip ka rauxin a kum ka wizik urua ma amun marana xa wizik urua zaait. Amun mara angkanaan ka wizik urua naandi amun laklagai xa wizik urua zin Nakmai ina naa kling naandi di waan farawuk lamun non faakdul la pira angkari. 7 Naata Sipsip ka wa zuruk a wilwilaaia baar la mit sazaxa zin a xazak ina xa iziar wana akin izi xalxaalang. 8 Saam 141:2Araan naan ka zuruk a baar angkanaan amun faaziarang urulavaat di roro ma amun paamua xa zangaaflu vaarua ma urulavaat di zu vaakudung lamarana Naata Sipsip ma di lis a varanopang pana naan. Naandi zaksaxai di roting a aap ina di witpit malasing a gita ma amun pin ka goul. Amun pin angkanaan di bas pana a wat laas ina a buan iwana xa milalas mikuf araan di vaif. Amun saan angkanaan, ka irur vakilaan amun maainungang sin aubina ninis sin Iesu. 9 Saam 33:3, 98:1, Aais 42:10Ma di rangon a ranganang faaxur malasing kari,
“Nua mase gu tak ma gut faraxas guna zuruk a baar
ma guna paak pizin amun bulut pana,
avuna di ra zop famaat nua
ma gu wul vaxarom aubina zin Nakmai wana a daraaium ma naari di iziar aubina zunum,
aubina zin amun lemlem aubina vaakdul ma aubina ilamun linga bina vaakdul
ma aubina ilamun pira vaakdul ma aubina ilamun kaantri vaakdul.
10 Zax 19:6, Vaat 1:6Gu ra vabalos naandi di balas a lemlem azaxai
ma di balas amun pris sin Nakmai zimaam,
ma dina balas amun paamua la pira angkari.”
11 Daan 7:10Naanaan ga raamaai, ma ga langarin a linga amun aangelo ina di irur varaxulin akin izi xalxaalang ma amun faaziarang urulavaat di roro ma amun paamua. A vaakatang sin amun aangelo xa malasing amun taausan taausan ma amun milian milian nanga. 12 Naandi di raraf faraxai malasing kari,
“Naata Sipsip ina di ra zop famaat,
kat faraxas kana zuruk a dikdikang ma amun lulugaan daxa,
ma a mazamang ma a burburaaiang.
Ma xat faraxas dina varanop pana naan,
ma dina valaup aizina,
ma dina wisfarur naan.”
13 Ma ga langarin saait a ling amun faaziarang faakdul ila lia ma ila pira angkari ma ilamaskana a pira angkari ma inana raas, amun faaziarang faakdul angkanaan di pitfiaat malasing kari,
“Ka waan sina ina xa iziar wana akin izi xalxaalang ma xa waan sin Naata Sipsip,
dina wisfarur nandiaa,
ma dina varanop pana nandiaa,
ma dina valaup aizina nandiaa,
ma nandiaa di rauxin iaa a dikdikang,
bulaai bulaai.”
14 Ma amun faaziarang urulavaat di roro di piaat malasing kari, “Ka vaaratunaan!” Naanaan amun paamua di zu vaakudung ma di lotu wana nandiaa.