7
Di Rasin A Vaakilanang Pana 144,000 Aubina Zin Amun Israael
1 Jer 49:36, Daan 7:2, Zek 6:5Araan amun saan angkanaan ka vaanong, ga raamin amun aangelo urulavaat di irur lamun marana maaliu urulavaat ka taaif puat la pira angkari. Di ruxol amun marana maaliu urulavaat kuna dina wen taaif pana a pira angkari ma a raas ma amun iaai. 2 Ga raamin aza aangelo xa wat lamarana maaliu ila non a iaas kai laak pana, xa roting a vaakilanang sin Nakmai xa roro. Naan ka viraai laba waan sin amun aangelo urulavaat ina axazak ka ra lis a dikdikang sin naandi urulavaat kuna kawinang a pira varaxai wana raas. 3 Izi 9:4,6Naan ka piaat malasing kari, “Tuaa naagu kawin a pira o a raas o amun iaai, xa ruaas maadina rasin a vaakilanang lamun nona amun iaana kilaaiang sin Nakmai zin dia.” 4 Di moi vakilaan fanong naandi ma ga langarin a vaakatang sin naandi xa 144,000 sin amun patbung faakdul in Israael. Naandi xari:
5 12,000 sin a watbung sin Judaa,
12,000 sin a watbung sin Ruben,
12,000 sin a watbung sin Gaad,
6 12,000 sin a watbung sin Aaser,
12,000 sin a watbung sin Naaftali,
12,000 sin a watbung sin Manaase,
7 12,000 sin a watbung sin Simion,
12,000 sin a watbung sin Livaai,
12,000 sin a watbung sin Isaakaar,
8 12,000 sin a watbung sin Zebulon,
12,000 sin a watbung sin Iosep,
12,000 sin a watbung sin Beniaamin.
Adi Mala Aubina Di Lotu Wana Nakmai
9 Lamuraana amun saan angkanaan, ga raamin amala aubina xawit nat faraxas taxazak kana vakot naandi. Aubina ilamun kaantri vaakdul ma ilamun lemlem aubina vaakdul ma ilamun pira vaakdul ma ilamun linga bina vaakdul. Di irur lamarana akin izi xalxaalang ma lamarana Naata Sipsip. Di mamaaus pana amun marapi xufkuf ma di roting amun tangtangaana baibaai. 10 Dit kupkup laba malasing kari,
“A vaamuzazang iwana zaxot faulinang aubina, xa wat sin Nakmai zin dia,
naan ina xa iziar wana akin izi xalxaalang,
ma xa wat saait sin Naata Sipsip.”
11 Akin izi xalxaalang ma amun paamua ma amun faaziarang urulavaat di roro, amun aangelo vaakdul di irur varaxulin naandi. Amun aangelo angkanaan di zu vaakudung faraxai wana varanopang lamarana akin izi xalxaalang ma di lotu wana Nakmai. 12 Di piaat malasing kari,
“Ka vaaratunaan!
Dina wisfarur Nakmai zin dia,
ma dina valaup aizina,
ma dina wisfaadaxa zina,
ma dina varanop pana naan.
Naan ka rauxin a mazamang ma a burburaaiang
ma a dikdikang, bulaai bulaai.
Ka vaaratunaan!”
13 Naanaan azaxai zin amun paamua xa iaari zurugu naako, “Nis naandi xari di mamaaus pana amun marapi xufkuf ma di wat faa?”
14 Daan 12:1, Mt 24:21, Mk 13:19Ga xis naan ninaako, “Piran, nua nanga gu rexaazin.”
Ma xa vazei nia naako, “Naandi angkanaan di ra tukbilak pana adi maazikang. Ma di zuk faxufkuf fanong amun marapi zin naandi wana daraaia Naata Sipsip.
15 Malasing ma, bulaai di irur lamarana akin izi xalxaalang sin Nakmai,
ma dit faamuzas lamaskana vaal xoxok sina lamun paanaas ma lamun suzuk.
Ma naan ina xa iziar wana akin izi xalxaalang kat fakuf naandi wana a vaal maling sina ma xana rataamaai xaaul wana naandi.
16 Aais 49:10Naandi dina wen lagaai ma dina wen maaru xaarik.
Ma a lagavang iwana iaas kana wen laang famazik naandi.
Kawit taza zaan kana laang famazik naandi.
17 Saam 23:1, Izi 34:23, Saam 23:2, Aais 49:10, Aais 25:8Avuna Naata Sipsip ina labirua wana akin izi xalxaalang, kana rataamaai xaaul wana naandi.
Naan kana valos naandi xula daanim ka vuvuat, a daanim iwana roroiang.
Ma Nakmai xana suxa psin amun lumara vaakdul lamarana naandi.”