15
Dene ngü ka adu kuru te Me ena ato
1 Fütanga ngü la, fü ra ayia ae jia ra bane, gbo! te gara mere kpeke ngü ka talara agbü kpï! Fü ra awu wü *malayïka ka Me lorozi, de te Me fe ewü, o, teka ato adu kuru te wü kpara, te ewü le ngü kaka de ne. Dela tïne adu kuru te Me ena ato te wü kpara füh kotö ne, angü mamaguma nzu eyi eküte ewü fa sü.
2 Ngü te ma wu ne, ah mere te-ye bane. Ma wu mere tambasü sele sele bala, engagira kpökpö ka Me. Sü la ngbü eci aci baka jia ngu, le le le, kpah baka mi-wa. Fü mere bi wü kpara angbü etambasü la. Ah de wü *kpara ka Yesu, de te ewü fa wazi siti nü la eyi ne. Fü ewü angbü ꞌburu de kuꞌdu esaka wü, da egbo nga ïrï Me di. 3 Fü ewü akpo kpah da egbo nga ïrï Yesu, *Kambiliki ka Me, kpah da ebï ci baka nda *Müse, ta te engu ngbü ebï gügü ne, gü ba,
“Wayi bala, Mere Me, a ngbü egbo nga ïrï mü!
Mere mürü wazi, a ngbü egbo nga ïrï mü!
Mü ngbü emere wü mere kpeke ngü,
te fa fïngangü ka wü kpara ꞌburu.
Mü de Mere Miri gbü nzö nguwa wü kpara füh kotö ne ꞌburu!
Mü wu da ekolo ngü ka wü kpara ka-mü duu me-mü!
4 Mere Miri ka-a, a ngbü egbo nga ïrï mü!
Ah le de wü kpara füh kotö ne ꞌburu di ecu ngü mü!
Ah le de wü kpara füh kotö ne ꞌburu di egbo nga ïrï mü!
Mü de Me duu me-mü, angü mü ka-mü *nzïla!
Ah le de nguwa wü kpara füh kotö ne ꞌburu
di egbo nga ïrï mü!
Angü wü kpara füh kotö ne ꞌburu wu eyi, gü ba,
wü ngü ka-mü te mü ngbü emere ne,
ah ꞌburu de züka wü ngü!”
Dela ci te wü kpara ka Yesu, te ewü fa wazi siti nü la, ngbü ebï.
5 Fü ra ayia awu *Mere Kambü ka Me agbü kpï kpala, te ü te-ye, ngbü baaba. Fü ra aceka wü e kpa guvu kambü la ꞌburu.* 15:5 Wü e la ngbü gbü eꞌbaꞌbasu guvu Kambü ka Me de to kpa gbügbü ne. 6 Fü wü malayïka ka Me de lorozi, te ewü ena ato adu kuru te wü kpara füh kotö ne, ayia kpa esambü ka Me kpala, akoro kpa etanü. Wüh to züka bu bongo eküte wü. Wüh gï ku bongo, te ngbü eci aci baka *diki-se la, kolo tü wü di. 7 Fü gara malayïka biri, esüka wü angbe cögbörö wü malayïka ka Me de bala la, ayia aza wü ndüꞌba lorozi, te wüh reke gbü diki-se, de wü e gbü ewü, ato fü wü malayïka de lorozi la biri biri ꞌburu. Wü e de gbü wü ndüꞌba la, ah de wü kuru te Me ena ato te siti wü kpara füh kotö, te ewü le ngü kaka de ne. 8 Fü nguwa ayia agba sü gbü Mere Kambü ka Me la, ꞌduwa ꞌdiii! teka wazi ka Me. Fü cürü ayia arï te wü kpara teka ngü ka nguwa la. Teka ngü la, wüh tï arï kpa esambü ka Me la tïne de, zalü te Me to kuru te siti wü kpara la, nza eyi la.