1-2 Wü di enga wüna, yi wu kpah bü kpo, ga, kpara biringbö, te wu sïkpï te Miri Yesu ena adu akoro tete na, ah nda ma. Te di bala, a tï amala nga sïkpï la fü yi nda-a kpah de. Angü sïkpï engu la ena ata wü kpara ata. Ah ena adi gegege baka mürü zi te ngbü ekoro gbü biti, agüka wü kpara da era ara. 3 Gbü sïkpï engu la, wü kpara te ewü le ngü ka Me de, wüh ena agüka agüka. Angü wüh ngbü efï, gü ba dene, “Ani ngbü engbü ka-ani gbü züka gu sü ne zözö. Me wu ngü ka-ani nda de, ah tï ato kuru fü ani kpah de.” Te gara wüh ga, ani ceka kpï bane de, gbangbara! Miri Yesu koro eyi, teka ato kuru te ewü! Ngü la ena agüka ewü gegege baka e te keke ka yayaka ngbü egüka würüse de bu ye. Wüh tï aküwa de, angü da ewü teka afü maguma ewü nda tïne eyi ma.

4 Wü di enga wüna, yi de wü kpara ka biti baka ewü nda-yi de. Te ah bala, sïkpï ka Miri Yesu tï agüka yi agüka baka ewü de, angü yi ngbü eo jia yi teka sïkpï la. 5 Nih ka-nih nda-nih wü kpara ka ra-sü, angü Me lofo jia nih eyi. Nih tï adu angbü gbü biti nda-nih tïne de.

6 Wü di enga wüna, de te nih di ka-nih nda-nih wü kpara ka ra-sü ne, nih ceka te-nih mbi, da etüka te-nih, gbü wü re-ngü ka *Satana. Nih o fïngangü ka-nih, teka amere wü ngü, te ena areke gbü jia Me. Nih mere e adu gbü ngü ka biti, baka wü bu nih ne, de. 7 Angü wü bu nih la, wüh ka-wü de wü kpara ka biti, jia ewü nda ma. Wü kpara te ewü ele adi era ara ne, wüh ngbü era nda-wü gbü biti. Wü kpara te ewü le adi enzö fï ne, wüh ngbü enzö fï kpah gbü biti, da eküya di. 8 Amba nih mere e amere bala de, angü nih de wü kpara ka biti nda-nih de. Nih ka-nih nda-nih wü kpara ka ra-sü. Te di bala, ah le de nih ceka te-nih mbi, teka adi emere wü ngü te ena areke gbü jia Me. Nih ena amaka wazi, teka adi emere wü züka ngü di, neh kaye? Ah le fü Miri Yesu ato wazi fü nih me-ye. Te ah bala, nih to maguma nih fü Miri Yesu, da ele Miri Yesu de maguma nih ꞌburu, da eo jia nih teka sïkpï ka dudu kaka. Teka ne de, angü nih wu eyi kpo, ga, Miri Yesu ena aküwa nih gbü sïkpï la. 9 Nih ena aküwa fanü fanü, angü nih ꞌburu wü kpara te Me fe nih eyi, ao ba züka wü kpara ka Miri Yesu. Te ah bala la, Me ena adu ato kuru te nih, neh baye baye? Me ena aküwa nih aküwa, angü nih de wü kpara ka Miri Yesu Kurisito fanü. 10 Angü Miri Yesu to te-ye akpi teka nih, te nih di de wü kpara kaka-na ne. Miri Yesu ena adu abiti nih, gbü sïkpï te engu ena adu akoro tete na. Anga ah ena adu akoro amaka nih ezükü, anga o nih kpi eyi la, engu ena abiti nih, fü nih angbü de ewü fï mere badi.

11 Te di eyi bala ne, wü di enga wüna, te cïnga ngbü emere yi, de yi di emala wü ngü la esüka yi, da eto wazi fü wü bu yi, teka fü yi arü kpekpeke, baka e te yi ngbü emere, zalü akoro di enatikine ne.

12-13 Wü di enga wüna, ah le de yi di emere wü ngü de te reke areke gbü jia Me. Teka ngü ka wü *kovo te Me o ewü, de wüh ngbü gbü nzö yi, da erï yi de ngü ka Me ne, ah le de yi di eje ngü ka-ewü, da ecu ngü ewü. Yi di kpah ele ta-ngü te ewü. Teka ne de, angü wüh ngbü emere tima kpekpeke ꞌduwa ba-neh-ene-la teka yi. Yi mere e angbü ega yïkï esüka yi de ewü ne de.

14 Te ena adi teka wü bu yi la, yi mere e adi ewü nga fü ewü kpah de. Te wü gara ewü di de wü mürü cürü la, yi mala züka ngü fü ewü, de wüh rü kpekpeke. Te wazi ewü ma, de yi di ele ta-ngü te ewü. Te wüh di kpah de mürü basa la, yi di erï ewü mba kpekpeke de wüh ce ngü la. Yi ngbü de züka maguma, da emala ngü fü wü kpara ꞌburu de gu maguma yi. 15 Teka mene wü kpara, te ewü ngbü emere siti ngü eküte yi, yi mere e alügü siti ngü la fü ewü tïne de. Yi di elügü fü ewü fï bü züka ngü. Kpah bala, yi di fï bü emere züka ngü fü wü bu yi, wü *kpara ka Yesu, kpah de gara wü kpara ꞌburu nde.

16-18 Wü di enga wüna, ah le de yi ngbü da egbo nga ïrï Me gbü wü ngü ka-yi ꞌburu. Te ah di de züka ngü, anga te ena adi kpah de cïnga la, yi mere e ace da egbo nga ïrï Me de. Te yi ngbü emere bala, yi ena angbü de tadu emaguma yi. Yi di kpah eku gba fü Me de ra de biti ꞌburu. Te fïngangü ka-yi ngbü bala, dela ngü te ena areke gbü jia Me. Angü dela ngü te Me ngbü ele, ga, wü kpara ka Yesu Kurisito di emere bala.

19 Te *Nzïla Wazi Me ngbü eyi erï yi emaguma yi la, yi je ꞌduwa ngü kaka-na. 20 Te Nzïla Wazi Me mala ngü fü yi gömö wü bu yi la, yi mere e ace ngü la kpah de. 21 Te gara kpara ena akpo da eto rïrï fü yi de ïrï Nzïla Wazi Me la, yi di eceka kpï gbü ngü engu la kpo kpo kpo feke. Te yi wu eyi, gü ba, ah de zu ngü ka Me fanü fanü la, de yi le ngü kaka de maguma yi ꞌburu. 22 Te ah ka-ye nda de siti rïrï la, de yi ce ace asidi.

23 Wü di enga wüna, Me di de yi, da eto züka ngbüngbü zözö, de gu maguma fü yi. Me di eto wazi fü yi gbü wü sïkpï ꞌburu, de yi ngbü fï bü da emere wü ngü, te ena areke gbü jijia na. Me ceka kpï fütanga küte yi, de fïngangü ka-yi, bete maguma yi zalü nde ꞌburu, teka de yi ngbü mbi, angü yi ena amere *siti ngü. Te di bala, Miri Yesu tï eyi amaka yi baka züka wü kpara ka-ye, gbü sïkpï te engu ena adu akoro tete na. 24 Angü Me fe yi, de yi ngbü ba wü di ni, cu me-ye. Teka ngü la, engu ena ato wazi fü yi bala fanü fanü, angü ngü te engu mala, ah tï ace de.

25 Wü di enga wüna, yi ku gba fü Me teka a.

26 Yi to mandï ka-a fü wü di enga ni nih kpala ꞌburu, de mere lele fa sü.

27 Ma mala fü yi de ïrï Miri ka-nih, Yesu Kurisito, ga, “Yi ï wü bu yi, wü kpara ka Me, de yi tanga köcökpa ne fü ewü zalü nde ꞌburu.”

28 Miri Yesu Kurisito ngbü de yi, da eto wazi fü yi, de *züka maguma ye.

Dela adu ngü te ma mala fü yi, de-ra Pawülü.