1 Iehova ese Mose na e hereva henia, eto, 2 Midian taudia ese Israel taudia vada e ala-ala henidia davana na bavala-ala henidia; una murinai tubu tama dekediai ba hahebou.

3 Taunabunai Mose ese Israel taudia e hamaorodia, eto, Umui bogaragimui amo haida ese edia tuari ḡaudia bae abi heḡaeḡae, Midian taudia bae tuari henidia, edia kara davana Iehova ese vada e gwauraia do ba kara henidia. 4 Israel iduhudia ta ta amo tuari taudia daha-ta daha-ta ba siaidia. 5 Taunabunai Israel taudia loḡora edia amo iduhu ta ta edia daha-ta ta ta e siaidia: tuari taudia iboudiai be gerebu-ta daha-rua.*gerebu-ta rdaha-rua = 12,000.

6 Bena Mose ese e siaidia, bae tuari; iduhu ta ta amo daha-ta ta ta e siaidia. Hahelaḡa tauna Fineha Eleasara danu e siaia; ia ese gabu helaḡana kohudia imana ai e abi kau, bona tuari kibidia danu. 7 Bena idia ese Midian taudia e tuari henidia, Iehova ese Mose e haḡania heḡereḡerena; bena mamaruanedia iboudiai e aladia ore. 8 Midian pavapavadia laimaosi danu e aladia mase: Evi bona Rekem bona Suru bona Huru bona Reba. Balaam Beoro danu dare amo e alaia mase. 9 Midian hahinedia mai natudia ida Israel taudia ese e abidia mauri; edia boromakau iboudiai bona edia mamoe iboudiai bona edia kohu idoinai danu e abi. 10 Edia hanua iboudiai bona edia taruha iboudiai e doudia ore; 11 bena e abi kohudia e laohai, bona ubu-ubu ḡaudia bona taunimanima danu e hakaudia lao. 12 Bena abi-mauri taudia bona seri bona kohu na e laohaidia, Mose bona hahelaḡa tauna Eleasara dekediai, Israel taudia edia hebou ai e hahedinaraidia, edia taruha ai, Ieriko ai, Moab taorana ai, Ioridane sinavaina isena ai.

13 Bena Mose bona hahelaḡa tauna Eleasara bona orea lohiadia na e raka lasi dekediai, taruha murimurinai idia ida e hedavari. 14 Bena Mose ese tuari lohiadia, daha-ta ta ta biagudia bona sinahu ta ta biagudia, tuari amovada e lou mai, na e badu henidia; 15 e gwau henidia, eto, Dahaka dainai hahine iboudiai o hamauridia? 16 A laloa, idia ese Balaam ena hereva amo Israel taudia e hahekwakwanaidia, Peoro ororona ai, bena gorere ese Iehova ena orea taudia e hamasedia. 17 Taunabunai, memero iboudiai bavaladia mase, bona hahine iboudiai danu; 18 a kekeni bona ulato na ba hamauridia, bavabidia emui. 19 Bena dina hitu taruha murimurinai ba noho, taunimanima o aladia mase eiava mase taudia ediai o dau kau taumui iboumui ai. Dina ihatoina ai bona dina ihahituna ai ba haheḡoeva, bona emui abi-mauri kekenidia bona ulatodia ba haḡoevadia. 20 Emui, dabua danu, bona kopi eiava nani huidia eiava au amo e kara taudia, iboudiai ba haḡoevadia.

21 Bena hahelaḡa tauna Eleasara ese tuari ela taudia e hamaorodia, eto, Haheḡani binai, Iehova ese Mose vada e henia: 22  gold bona silver bona auri labora-labora bona auri bona tin bona lead, 23 lahi ai ba gabu diba ḡaudia, iboudiai na lahi ai ba gabudia, bena bae ḡoeva. A ranu helaḡa ai ba huridia danu; bona basio gabu diba ḡaudia danu ranu ai ba huridia. 24 Bena dina ihahituna ai emui dabua ba huridia, bena ba ḡoeva. Una murinai umui na taruha lalonai ba raka vareai.

25 Iehova ese Mose e hamaoroa, eto, 26 Tuari ai e abi ḡaudia, taunimanima bona ubu-ubu ḡaudia, ba hagaudia, oi bona hahelaḡa tauna Eleasara bonaorea lohiadia ese. 27 Bena ba haridia, ahu rua: ta be tuari ela taudia ahudia, a ta be kone-noho taudia ahudia. 28 Bena tuari ela taudia ahudia ai, sinahu ima ima amo ta ta ba hahelaḡadia Iehova ena, taunimanima bona boromakau bona doniki bona mamoe; 29 idia ahudia amo bavabidia, hahelaḡa tauna Eleasara ba henia, boubou ḡaudia ai baela, baine dudui isi Iehova vairanai. 30 A kone-noho taudia ahudia ai, imahui imahui amo ta ta ba hahelaḡadia, taunimanima bona boromakau bona doniki bona mamoe; bena Levi taudia, Iehova ena dubu e reḡuamu taudia, ba henidia. 31 Bena Eleasara bona Mose na unu e kara toma, Iehova ese Mose e haḡania heḡereḡerena.

32 Tuari taudia ese vada e abidia mauri ḡaudia bini: mamoe 675,000, 33 boromakau 72,000, 34 doniki 61,000, 35 bona taunimanima 32,000, iboudiai na kekeni bona ulato. 36 Tuari ela taudia ahudia bini: mamoe 337,500, 37 unu amo Iehova ahuna na 675; 38 boromakau 36,000, unu amo Iehova ahuna na 72; 39 doniki 30,500, unu amo Iehova ahuna na 61; 40 bona taunimanima 16,000, unu amo Iehova ahuna na 32. 41 Mose ese Iehova ahuna e abia, boubou ḡauna hahelaḡa tauna Eleasara e henia, Iehova ese Mose e haḡania heḡereḡerena.

42 Kone-noho taudia ahudia, Mose ese tuari ela taudia ahudia amo ehididia ḡaudia, 43 na iniheto: mamoe 337,500, 44 boromakau 36,000, 45 doniki 30,500, 46 bona taunimanima 16,000. 47 Bena idia ahudia ai Mose ese imahui imahui amo ta ta e abidia, taunimanima bona ubu-ubu ḡaudia; bena ia ese Levi taudia, Iehova ena dubu e reḡuava taudia, e henidia, Iehova ese Mose e haḡania heḡereḡerena.

48 Bena tuari lohiadia, daha-ta ta ta biagudia bona sinahu ta ta biagudia, ese Mose e raka henia kahi, 49 eto, Emu hesiai taudia ese tuari taudia ai henumai ai vada e duahidia ore, ta se boio. 50 Bena herahia ḡaudia vada a mailaidia, Iehova ena, gold ḡaudia tuari ai e abi: ima vaḡivaḡidia bona bae vaḡivaḡidia bona kwakikwaki vaḡivaḡidia, bona gadei, bona ageva; emai herohemaino ḡaudia Iehova vairanai. 51 Bena Mose bona hahelaḡa tauna Eleasara ese hari gold ḡaudia idau-idau idia imadia amo e abidia. 52 Hari gold idoinai, daha-ta ta ta biagudia bona sinahu ta ta biagudia ese e mailaia, edia herahia ḡauna Iehova bae henia eto, ena metau be sekele 16,750.†Sekele 16,750 = 274 kilograms sisivana, ita eda hahetoho ai. 53 Badina be tuari taudia ta ta ese edia kohu vada e gogo una tuari ai. 54 Bena Mose bona hahalaḡa tauna Eleasara ese hari daha ta ta biagudia bona sinahu ta ta biagudia e heni gold-na e abia, hebou kalagana ai e vareailaia, Iehova vairanai Israel taudia ihelalolaidia ḡaudia a ai bainela totona.