1 Nehemia, Hakalia natuna, ena hereva bini. Laḡani iharuahuina huana ladana Kisleve lalonai, lau na hanua badana Susa ai noho; 2 bena varavaragu ta ladana Hanani na tatau haida ida Iuda amo ema. Bena na nanadaidia, Iuda taudia dounu e nohova, heabi-oho amo e roho mauriva taudia, bona Ierusalem henanadaidia na kara. 3 Bena idia ese e hamaorogu, eto, Heabi-oho amo e roho mauri bona una basileia ai dounu e nohomu taudia na e hekwarahi badamu bona e hemaraimu; Ierusalem maguna vada e heḡigi dobi, bona ikoukouna na lahi ese vada e araia oho.

4 Unu hereva na kamonai, bena na helai diho, na tai; dina haida na tailaiava bona na anivaga loulouva bona na ḡuriḡuri loulouva, guba Diravana vairanai. 5 Bena na ḡuriḡuri, nato,

Iehova e, guba Diravana, Dirava badana bona mai garina, e ura heniamu bona ena haheḡani e badinamu taudia ida e herohemainomu bona e bogadia hisimu Diravana; 6 taiamu a hakala bona matamu a hapapa, lau emu hesiai tauna egu ḡuriḡuri, dina bona hanuaboi oi vairamu ai Israel besena, emu hesiai taudia, daidiai na gwauraiamu ḡauna, na ba kamonai. Israel taudia edia kara dika, ai ese oi a kara henimu gaudia, na na gwaurai hedinaraimu; oibe, lau bona tamagu ena iduhu taudia vada a kara dika. 7 Ai ese oi vada a kara havara henimu, bona haheḡani bona taravatu bona hahedua herevadia, emu hesiai tauna Mose o haḡanilaia ḡaudia, na asia badinadia. 8 Emu hesiai tauna Mose o haḡanilaia herevana ba laloa tao; oto “Boma gwau hebeatai, lau ese baina hakarohomui rohoroho bese idau-idau bogaragidiai; 9 a boma lou henigu bona egu haheḡani boma badinadia bona karadia boma kara, bena ena be emui karoho taudia be guba dokodokodia henudiai to lau ese unu amo ma baina haboudia, vada na abia hidi lau ladagu baine noho henia gabuna ai baina hakaumui vareai”. 10 Idia na oiemu hesiai taudia bona oiemu bese; oi ese emu siahu badana bona imamu goadana amo vada o hamauridia. 11 Ḡaubada e, taiamu a hakala, lau emu hesiai tauna bona emu hesiai taudia, oi ladamu igari-henina e moalelaiamu taudia, emai ḡuriḡuri ame kamonai; bona hari dina ai emu hesiai tauna na kwalimu ba henia, bona ba bogaia hisi, ina tau vairanai.

Madi, lau na hanua pavapavana ena kehere iloalaina tauna.