5
To̱ꞌon yóꞌo káꞌa̱n xa̱ꞌa̱ ña xi̱ni ta̱Juan ñii tutu ña ni̱ti̱vi ndaa
1 Ta saá xi̱ni i̱ ñii nomi tutu ña ni̱ti̱vi ndaa, ña yóo ndaꞌa̱ kuaꞌá ta̱a ta̱ yóo no̱o̱ táyi̱ yi̱i̱ tón to̱ꞌó káꞌno. Ta ndiꞌi no̱o̱ tutu yóꞌo, ta ndiꞌi sa̱ta̱ ña, kómí ña kua̱ꞌa̱ ní to̱ꞌon ña ni̱ka̱ꞌyi̱. Ta ña ñii nomi tutu yóꞌo, u̱xa̱ xiiña ndási̱ ña xíꞌin ñi̱ma̱ kisín válí. 2 Ta xi̱ni i̱ ñii ñaángel ña kómí nda̱yí káꞌno, ta xíꞌin ndiꞌi ndee̱ ña ni̱ka̱ꞌa̱n ña, ni̱nda̱ka̱ to̱ꞌon ña, káchí ña saá:
―¿Yu kúu ta̱a ta̱káꞌno ta̱ kómí nda̱yí nakoná ra ñii ñii ña ñi̱ma̱ kisín ndási̱ tutu yóꞌo? ―káchí ñaángel.
3 Ta o̱n ko̱ó nda̱ ñii na ní‑kuchiño nakoná tutu yóꞌo, ni nda̱ ñii na ní‑kuchiño koto na ña ni̱ka̱ꞌyi̱ no̱o̱ ña. O̱n ko̱ó nayóꞌo, ni ndiꞌi saá ñoyívi, ni ti̱xin ñoꞌo̱, o̱n ko̱ó nda̱ ñii na ní‑kuchiño. 4 Ta saá ku̱chuchú ní ini i̱, ta xa̱ku ní i̱, chi o̱n ko̱ó nda̱ ñii na kómí nda̱yí ña nakoná na tutu yóꞌo, ni o̱n ko̱ó na kómí nda̱yí koto na ña ni̱ka̱ꞌyi̱ no̱o̱ tutu yóꞌo. 5 Ta ñii ta̱a ta̱táꞌan na o̱ko̱ ko̱mi̱ naxi̱kua̱ꞌa̱ na yóo yóꞌo ni̱ka̱ꞌa̱n ra xíꞌin i̱:
―O̱n kuaku ní ka̱ ún chi yóꞌo yóo ta̱a ta̱ na̱ní “TíLeón tí xáꞌnda chiño no̱o̱ nañoo Judá”, ta ta̱yóꞌo kómí ra inka̱ ki̱vi̱ ra na̱ní ra “Sa̱ꞌya ñani síkuá ta̱rey David.”* O̱vi̱ ki̱vi̱ yóꞌo káꞌa̱n ña xa̱ꞌa̱ Jesucristo. Ta ta̱yóꞌo xa ku̱ndeé ra no̱o̱ ñandiva̱ꞌa káꞌno, ña̱kán kómí ra nda̱yí ña nakoná ra ñii ñii no̱o̱ ndási̱ xíꞌin ñi̱ma̱ kisín ña ndási̱ u̱xa̱ xiiña nomi tutu yóꞌo ―káchí ra xíꞌin i̱.
6 Ta saá xi̱ni i̱ ñii Ndikachi,† Ndikachi yóꞌo kóni kachí ña xa̱ꞌa̱ Jesucristo, chi nda̱tán yóo ndikachi loꞌo ña ni̱so̱ko̱ ni̱vi no̱o̱ Ndios xi̱na̱ꞌá, xa̱ꞌa̱ ña kasa káꞌno ini ra xa̱ꞌa̱ kua̱chi na, saá yóo Jesucristo. ñíndichi rí yatin sii̱n táyi̱ yi̱i̱ tón to̱ꞌó káꞌno. Táyi̱ yóꞌo ñíndichi nó ma̱ꞌñó ko̱mi̱ ñatáku̱ xíꞌin na o̱ko̱ ko̱mi̱ nata̱a naxi̱kua̱ꞌa̱. Ta Ndikachi yóꞌo náꞌa rí nda̱tán náꞌa tí ni̱xiꞌi̱ ni̱so̱ko̱ ni̱vi no̱o̱ Ndios. U̱xa̱ kúu ndi̱ki̱ rí, ta u̱xa̱ kúu nduchu̱ no̱o̱ rí. Ta u̱xa̱ nduchu̱ no̱o̱ rí kúu ña kóni kachí xa̱ꞌa̱ u̱xa̱ níma̱ Ndios ña xa ti̱ꞌví ra kua̱ꞌa̱n ña ndiꞌi saá ñoo ñoyívi yóꞌo. 7 Ta Ndikachi yóꞌo ni̱xaa̱ rí no̱o̱ Ta̱a ta̱Káꞌno, ta̱ yóo no̱o̱ táyi̱ yi̱i̱ tón to̱ꞌó káꞌno, ta tíyóꞌo ki̱ꞌin rí nomi tutu ña yóo ndaꞌa̱ kuaꞌá ra. 8 Tá ki̱ꞌin rí nomi tutu yóꞌo, ta ña ko̱mi̱ táku̱ xíꞌin ndiꞌi na o̱ko̱ ko̱mi̱ nata̱a xi̱kua̱ꞌa̱ xi̱kuxítí ndiꞌi na no̱o̱ Ndikachi yóꞌo. Ñii ñii na níꞌi na ñii tón arpa, ta ñii ñii na níꞌi na ñii ko̱ꞌo̱ ñi̱ꞌma̱ ñaoro no̱o̱ ñóꞌo xuxa va̱ꞌa ña támi ní xáꞌan. Ta ñi̱ꞌma̱ xuxa va̱ꞌa káꞌa̱n ña xa̱ꞌa̱ to̱ꞌon ña káꞌa̱n ni̱vi nayi̱i̱ xíꞌin Ndios. 9 Ta saá ña ko̱mi̱ táku̱ xíꞌin ndiꞌi na o̱ko̱ ko̱mi̱ nata̱a naxi̱kua̱ꞌa̱ xi̱ta na yaa yi̱i̱ ña xa̱á ña kísa káꞌno na Ndikachi xíꞌin to̱ꞌon yóꞌo:
Yóꞌó kómí ún nda̱yí tiin ún nomi tutu yóꞌo.
Yóꞌó kómí ún nda̱yí ña nakoná ún ña ndási̱ tutu yóꞌo.
Saá chi ni̱so̱ko̱ xíꞌin mi̱i ún no̱o̱ Ndios,
ta sa̱takuéꞌe̱ na yóꞌó, ta ni̱xiꞌi̱ ún.
Ta xíꞌin ni̱i̱ ún ña ni̱xi̱ta̱, cha̱ꞌvi ún xa̱ꞌa̱ kua̱chi ndiꞌi ni̱vi, ña kuchiño na nduu na sa̱ꞌya Ndios.
Ni̱vi na cha̱ꞌvi ún xa̱ꞌa̱, kúu na ki̱xi ndiꞌi saá ñoo válí án ñoo náꞌno ndiꞌi saá xiiña no̱o̱ ñoꞌo̱.
Ta kúu na ndiꞌi saá no̱o̱ ni̱vi ñoyívi, ta káꞌa̱n na ndiꞌi saá no̱o̱ to̱ꞌon.
10 Ta ta̱xi ún ndaꞌa̱ nayóꞌo nda̱yí ña kaꞌnda chiño na xíꞌin ún no̱o̱ ndiꞌi ña yóo,
ta ke̱ꞌé ún xíꞌin na ña ndu̱u na su̱tu̱ yi̱i̱, ta kísa chiño na no̱o̱ Ndios.
Ta nayóꞌo kaꞌnda chiño na no̱o̱ ndiꞌi ni̱vi xíꞌin ndiꞌi ña yóo ñoyívi no̱o̱ ñoꞌo̱,
káchí na xíta na yaa yi̱i̱ ña kísa káꞌno na Ndikachi.
11 Ta xi̱ni i̱, ta xi̱ni̱ so̱ꞌo i̱ ñii síso̱ káꞌa̱n kua̱ꞌa̱ ní naángel, nayóꞌo yáꞌa kua̱ꞌa̱ ní millón kúu na. Ta xi̱no nduu ndiꞌi na táyi̱ yi̱i̱ tón to̱ꞌó káꞌno xíꞌin ko̱mi̱ ñatáku̱, ta xíꞌin o̱ko̱ ko̱mi̱ nata̱a naxi̱kua̱ꞌa̱, 12 ta ndeé ní káꞌa̱n naángel, káchí na saá:
Ndikachi tí ni̱so̱ko̱ xíꞌin mi̱i no̱o̱ Ndios
kómí rí nda̱yí kaꞌnda chiño rí no̱o̱ ndiꞌi ni̱vi xíꞌin ndiꞌi ña yóo,
ta kómí rí nda̱yí ña nakiꞌin rí ndiꞌi ñakuíká xíꞌin ndiꞌi ñandíchí ndinoꞌo,
ta kómí rí nda̱yí ña nakiꞌin rí ndiꞌi ndee̱ káꞌno,
ta kómí rí nda̱yí ña nakiꞌin rí ndiꞌi ñato̱ꞌó káꞌno,
ta kómí rí nda̱yí ña kanóo síkón ní ñato̱ꞌó rí,
ta kómí rí nda̱yí ña kasa káꞌno yó rí xíꞌin ndiꞌi mi̱i yó,
chi ña ndixa va̱ꞌa kúu ña nakiꞌin rí ndiꞌi ñava̱ꞌa saá,
káchí naángel, káꞌa̱n na to̱ꞌon ña kísa káꞌno na Ndikachi.
13 Ta saá xi̱ni̱ so̱ꞌo i̱ ndí ndiꞌi ña ki̱sa va̱ꞌa Ndios ki̱xáꞌá ña kísa káꞌno ña Ndios, ta kísa káꞌno ña Ndikachi yóꞌo. Ndiꞌi ñayóꞌo ña ke̱ꞌé Ndios kúu ndiꞌi ña táku̱ án ña yóo ñoyívi no̱o̱ ñoꞌo̱, xíꞌin ndiꞌi ña táku̱ án ña yóo ñoyívi ni̱no, xíꞌin ndiꞌi ña táku̱ án ña yóo ti̱xin ñoꞌo̱, xíꞌin ndiꞌi ña táku̱ án ña yóo ti̱xin takuií mi̱ni, ta ndiꞌi ñayóꞌo káꞌa̱n ña, káchí ña saá:
Ná kasa káꞌno yó Ta̱a ta̱Káꞌno ta̱ yóo no̱o̱ táyi̱ yi̱i̱ tón to̱ꞌó káꞌno,
ta ná kasa káꞌno yó Ndikachi tí yóo xíꞌin ra.
Ná nakiꞌin na ndiꞌi ñato̱ꞌó káꞌno.
Ná kanóo va̱ꞌa ñato̱ꞌó na.
Ná nakiꞌin na ndiꞌi ndee̱ káꞌno,
ta ná nakiꞌin na ndiꞌi ñava̱ꞌa yóꞌo ndiꞌi saá ki̱vi̱ va̱xi. Saá ná koo ña,
káchí ndiꞌi ña ki̱sa va̱ꞌa Ndios.
14 Ta ña ko̱mi̱ táku̱ ña yóo xi̱no nduu táyi̱ yi̱i̱ tón to̱ꞌó káꞌno ni̱ka̱ꞌa̱n ña, káchí ña saá:
―Saá ná koo ña ―káchí ña.
Ta na o̱ko̱ ko̱mi̱ ta̱a naxi̱kua̱ꞌa̱ na yóo xi̱no nduu táyi̱ yi̱i̱ tón to̱ꞌó káꞌno, xi̱kuxítí na nda̱ no̱o̱ ñoꞌo̱, ña ki̱sa káꞌno na Ndios, ta ki̱sa káꞌno na Ndikachi.