1 Ta ta̱Jesús xíka ra kua̱ꞌa̱n ra, ta na̱kutáꞌan ra xíꞌin ñii ta̱a ta̱kuáá. Ta ta̱yóꞌo, ta̱kuáá nduchu̱ no̱o̱ kúu ra ka̱ku ra. 2 Ta naxíka xíꞌin ta̱Jesús ni̱nda̱ka̱ to̱ꞌon na ra, káchí na saá:

―Tata Rabí, ¿yukú na ndíso kua̱chi, xa̱ꞌa̱ ña ka̱ku ta̱yóꞌo kuáá nduchu̱ no̱o̱ ra? ¿Án yivá ra xíꞌin siꞌí ra, án mi̱i ra ndíso kua̱chi xa̱ꞌa̱ ña ka̱ku kuáá ra?

3 Ta nda̱kuii̱n ta̱Jesús, ni̱ka̱ꞌa̱n ra:

―O̱n si̱ví kua̱chi mi̱i ra kúu ña, ni o̱n si̱ví kua̱chi yivá ra xíꞌin siꞌí ra kúu ña ka̱ku ra saá. Ta̱yóꞌo ka̱ku kuáá ra xa̱ꞌa̱ ña kuchiño koto ni̱vi chiño va̱ꞌa ña kasa ndivi Ndios xíꞌin ra. 4 Vitin kúu ki̱vi̱ ndiví yéꞌe ño̱ꞌo, ta xíni̱ ñóꞌó yó kasa ndivi yó chiño Ndios, ta̱a ta̱ ti̱ꞌví yi̱ꞌi̱ kixaa̱ i̱. Saá chi va̱xi ña kuñoó, ta saá tá kixaa̱ ñanaa ní, ta nda̱ ñii ni̱vi o̱n kívi ka̱ kasa chiño na. 5 Ta ndiꞌi ki̱vi̱ ña yóo ka̱ i̱ ñoyívi yóꞌo, yi̱ꞌi̱ kúu i̱ ñoꞌo̱ yéꞌe no̱o̱ ndiꞌi ni̱vi ná sanáꞌa i̱ yichi̱ ña nda̱a̱ ―káchí ta̱Jesús xíꞌin na.

6 Ta saá ta̱Jesús, chi̱kaa̱ ra tási̱i yuꞌu̱ ra no̱o̱ ñoꞌo̱ no̱o̱ ñíndichi ra, ta ki̱sa va̱ꞌa ra loꞌo nda̱ꞌyi̱ xíꞌin tási̱i yuꞌu̱ ra, ta chi̱nóo ra loꞌo nda̱ꞌyi̱ yóꞌo sa̱ta̱ ndio̱vi̱ nduchu̱ no̱o̱ ta̱kuáá yóꞌo, 7 ta ni̱ka̱ꞌa̱n ra xíꞌin ta̱kuáá, káchí ra saá:

―Va̱ꞌa vitin kua̱ꞌa̱n ún pozo na̱ní Siloé, ta nakata ún nduchu̱ no̱o̱ ún xíꞌin takuií pozo yóꞌo ―káchí ta̱Jesús xíꞌin ra. (Ta to̱ꞌon Siloé kóni kachí ña: Ta̱a ta̱ ti̱ꞌví na kua̱ꞌa̱n.)

Ta saá ke̱e ta̱kuáá kua̱ꞌa̱n ra no̱o̱ yóo pozo yóꞌo, ta ni̱xaa̱ ra, ta na̱kata ra nduchu̱ no̱o̱ ra xíꞌin takuií pozo. Ta saá ndi̱kó ra kua̱noꞌo̱ ra veꞌe ra, ta xa va̱ꞌa xíto nduchu̱ no̱o̱ ra, chi xa ndu̱va̱ꞌa ra. 8 Ta ni̱vi na táku̱ yatin no̱o̱ yóo ra, xíꞌin inka̱ ni̱vi na xi̱ni ñaꞌá ki̱vi̱ xi̱ndukú chiꞌña ra si̱ꞌún no̱o̱ na, nayóꞌo ni̱ka̱ꞌa̱n na, káchí na saá:

―¿Án o̱n si̱ví ta̱yóꞌo kúu ta̱a ta̱ ni̱xi̱yo xi̱ndukú chiꞌña si̱ꞌún no̱o̱ ni̱vi? ―káchí na, káꞌa̱n na.

9 ―Ndixa ta̱yóꞌo kúu ra ―káchí sava na.

Ta inka̱ na ni̱ka̱ꞌa̱n:

―Óꞌon, o̱n si̱ví ta̱yóꞌo kúu ra, ndasaá kuiti náꞌa ra nda̱tán náꞌa ta̱ xi̱ndukú chiꞌña ―káchí na.

Ta mi̱i ra, ni̱ka̱ꞌa̱n ra xíꞌin na, káchí ra saá:

―Ndixa yi̱ꞌi̱ kúu ta̱a ta̱ xi̱kuu ta̱kuáá ta̱ xi̱ndukú chiꞌña ―káchí ra xíꞌin na.

10 Ta saá ni̱nda̱ka̱ to̱ꞌon na ra, káchí na saá xíꞌin ra:

―¿Ndasaá va̱ꞌa xíto nduchu̱ no̱o̱ ún vitin? ―káchí na xíꞌin ra.

11 Ta nda̱kuii̱n ra, ni̱ka̱ꞌa̱n ra:

―Ta̱a ta̱ na̱ní Jesús ki̱sa va̱ꞌa ra loꞌo nda̱ꞌyi̱ ta chi̱nóo ndaa ra ña sa̱ta̱ nduchu̱ no̱o̱ i̱. Ta ni̱ka̱ꞌa̱n ra xíꞌin i̱ ko̱ꞌo̱n i̱ nakata i̱ no̱o̱ i̱ xíꞌin takuií tá ñóꞌo ini pozo Siloé. Tá ndi̱ꞌi ki̱sa ndivi i̱ ñayóꞌo, ta saá va̱ꞌa tívi xíto i̱ ―káchí ra xíꞌin na.

12 ―Ta vitin, ¿míkía̱ yóo ta̱ ke̱ꞌé saá xíꞌin ún? ―káchí na xíꞌin ra.

―O̱n vása xíni̱ i̱ ―káchí ra.

13 Ta ni̱vi kóni na ndí ta̱a ta̱ xi̱kuu ta̱kuáá yóꞌo ko̱ꞌo̱n ra xíꞌin na no̱o̱ nafariseo, ta saá ke̱e ra kua̱ꞌa̱n ra xíꞌin na. 14 Saá chi ñii ki̱vi̱ yi̱i̱ ña nákindée najudío kúu ki̱vi̱ ña ta̱Jesús ki̱sa va̱ꞌa ra nda̱ꞌyi̱ ta chi̱nóo ra loꞌo ña sa̱ta̱ nduchu̱ no̱o̱ ta̱kuáá, ta va̱ꞌa náti̱vi xíto ta̱yóꞌo. 15 Ta saá ni̱xaa̱ ra xíꞌin na, ta nafariseo ni̱nda̱ka̱ to̱ꞌon na ta̱a ta̱ xi̱kuu ta̱kuáá yóꞌo, káchí na xíꞌin ra:

―¿Ndasaá va̱ꞌa xíto nduchu̱ no̱o̱ ún? ―káchí na.

Ta nda̱kuii̱n ra, ni̱ka̱ꞌa̱n ra xíꞌin na:

―Chi̱nóo ndaa ra loꞌo nda̱ꞌyi̱ sa̱ta̱ nduchu̱ no̱o̱ i̱, ta saá na̱kata i̱ no̱o̱ i̱ xíꞌin takuií, ta xíꞌin ña ke̱ꞌé i̱ saá va̱ꞌa xíto i̱ vitin ―káchí ra.

16 Ta sava nafariseo ni̱ka̱ꞌa̱n na xíꞌin táꞌan na, káchí na saá:

―Ta̱a ta̱ ke̱ꞌé saá xíꞌin ta̱yóꞌo o̱n ki̱ví kuu ra ñii ta̱a ta̱ ki̱xi no̱o̱ Ndios, chi o̱n vása kísa to̱ꞌó ra nda̱yí Ndios ña káchí o̱n váꞌa kasa chiño yó ki̱vi̱ yi̱i̱ ―káchí na, káꞌa̱n na.

Ta inka̱ na káꞌa̱n, káchí na saá:

―Ndixa ta̱a ta̱ va̱ꞌa kúu ra chi nda̱ ñii ta̱a ta̱ o̱n váꞌa o̱n kúchiño ra keꞌé ra milagro va̱ꞌa nda̱tán yóo ña kéꞌé ta̱yóꞌo ―káchí na.

Ta saá o̱n vása kivi koo yuꞌú na xa̱ꞌa̱ ta̱Jesús. 17 Ta tuku ni̱nda̱ka̱ to̱ꞌon nafariseo ta̱a ta̱ xi̱kuu ta̱kuáá:

―Ta, ¿yukía̱ káchí yóꞌó xa̱ꞌa̱ ra? Chi yóꞌó kúu ta̱a ta̱ sa̱ndaꞌa ra nduchu̱ no̱o̱.

Ta nda̱kuii̱n ta̱a ta̱ xi̱kuu ta̱kuáá, ni̱ka̱ꞌa̱n ra xíꞌin na:

―Ñii ta̱profeta kúu ra ―káchí ra.

18 Ta nanáꞌno no̱o̱ najudío o̱n xi̱in na kandixa na ndí ndixa ta̱yóꞌo xi̱kuu ta̱kuáá ta vitin ndu̱va̱ꞌa ra. Ta saá ka̱na na yivá ra xíꞌin siꞌí ra va̱xi na ña kasa nda̱a̱ na ndiꞌi ñayóꞌo. 19 Ta saá ni̱nda̱ka̱ to̱ꞌon na yivá ta̱yóꞌo xíꞌin siꞌí ra, káchí na saá:

―¿Án ña ndixa nda̱a̱ ta̱yóꞌo kúu sa̱ꞌya ndó? Chi ka̱ku ra kúu ra ta̱kuáá, káchí ndó, ta vitin, ¿nda̱chun va̱ꞌa xíto ra?

20 Ta nda̱kuii̱n yivá ra xíꞌin siꞌí ra, káchí na saá:

―Ndixa xíni̱ ndi̱ ta̱yóꞌo kúu sa̱ꞌya ndi̱, ta xíni̱ ndi̱ ta̱ ka̱ku kuáá kúu ra. 21 Ta o̱n vása xíni̱ ndi̱ nda̱chun va̱ꞌa xíto ra vitin, ni o̱n vása xíni̱ ndi̱ yu kúu ta̱a ta̱ sa̱ndaꞌa nduchu̱ no̱o̱ ra. Va̱ꞌa nda̱ka̱ to̱ꞌon ndó mi̱i sa̱ꞌya ndi̱ yóꞌo ndasaá yóo ña ndu̱va̱ꞌa nduchu̱ no̱o̱ ra, chi xa ta̱chée kúu mi̱i ra vitin, ta va̱ꞌa kúchiño ra ndakuii̱n ra xa̱ꞌa̱ mi̱i ra ―káchí na xíꞌin nanáꞌno no̱o̱ najudío yóꞌo.

22 Ni̱ka̱ꞌa̱n yivá ra xíꞌin siꞌí ra saá, chi yíꞌví na ko̱to̱ nanáꞌno no̱o̱ najudío saxo̱ꞌvi̱ ñaꞌá na, chi nanáꞌno yóꞌo xa xa̱ꞌnda chiño na ndí nda̱ ñii ni̱vi o̱n ka̱ꞌa̱n na kachí na ndí ta̱Jesús kúu Cristo, ta̱a ta̱ ti̱ꞌví Ndios. Ta ndiꞌi ni̱vi na káꞌa̱n saá o̱n kívi ki̱ꞌvi ka̱ na ini veꞌe ño̱ꞌo sinagoga, ni o̱n kívi kutáꞌan ka̱ na xíꞌin inka̱ najudío, káchí nanáꞌno yóꞌo. 23 Ta xa̱ꞌa̱ ña yi̱yo kundoꞌo na saá, yivá ta̱ xi̱kuu ta̱kuáá xíꞌin siꞌí ra nda̱kuii̱n na ni̱ka̱ꞌa̱n na: “Sa̱ꞌya ndi̱ xa kúu ra ta̱chée vitin, va̱ꞌa ka̱ nda̱ka̱ to̱ꞌon ndó mi̱i ra”, káchí na xíꞌin nanáꞌno no̱o̱ najudío.

24 Ta saá tuku ka̱na nafariseo ta̱a ta̱ xi̱kuu ta̱kuáá, ta ni̱ka̱ꞌa̱n na xíꞌin ra:

―Va̱ꞌa kasa káꞌno ún Ndios xa̱ꞌa̱ ña va̱ꞌa xíto nduchu̱ no̱o̱ ún. Saá chi mi̱i ndi̱, xíni̱ ndi̱ ña ta̱Jesús yóꞌo kúu ta̱a ta̱ kéꞌé ña o̱n váꞌa ―káchí na xíꞌin ra.

25 Ta nda̱kuii̱n ra, ni̱ka̱ꞌa̱n ra saá:

―O̱n vása loꞌo xíni̱ i̱ tá ta̱a ta̱ kéꞌé ña o̱n váꞌa kúu ra. Ta ñii la̱á ñandixa xíni̱ va̱ꞌa i̱ kúu ñayóꞌo: ta̱kuáá xi̱kuu i̱, ta vitin va̱ꞌa xíto i̱ ―káchí ra.

26 Ta tuku ni̱nda̱ka̱ to̱ꞌon na ra:

―¿Yukía̱ ke̱ꞌé ra xíꞌin ún? ¿Ndasaá yóo ña va̱ꞌa xíto nduchu̱ no̱o̱ ún vitin? ―káchí na.

27 Ta tuku nda̱kuii̱n ra, ni̱ka̱ꞌa̱n ra, káchí ra saá xíꞌin na:

―Xa nda̱to̱ꞌon ndiꞌi i̱ xíꞌin ndó ndasaá ke̱ꞌé ra xíꞌin i̱, ta o̱n xi̱in ndó kandixa ndó ña ni̱ka̱ꞌa̱n i̱. ¿Nda̱chun kóni ndó tuku inka̱ yichi̱ ndato̱ꞌon i̱ xíꞌin ndó ndasaá ke̱ꞌé ra xíꞌin i̱? ¿Án saá tuku mi̱i ndó vitin kóni ndó kundiko̱n ndó ra xíꞌin i̱? ―káchí ra xíꞌin na.

28 Tá ndi̱ꞌi xi̱ni̱ so̱ꞌo na ña ni̱ka̱ꞌa̱n ta̱yóꞌo, ta ki̱xáꞌá na sáa̱ ní ini na xíni na ra, ta kándiva̱ꞌa na xíꞌin ra, káchí na saá:

―Yóꞌó kúu ta̱a ta̱ ndíko̱n sa̱ta̱ ta̱a ta̱ kéꞌé ña o̱n váꞌa yóꞌo. Ta ndi̱ꞌi̱ kúu na ndixa ndíko̱n yichi̱ ta̱Moisés, ta̱xi̱i̱ síkuá yó. 29 Chi xíni̱ ndi̱ ndixa Ndios ni̱ka̱ꞌa̱n ra xíꞌin ta̱Moisés, ta ta̱Jesús yóꞌo, o̱n vása xíni̱ ndi̱ míchí ki̱xi ra ―káchí na.

30 Ta nda̱kuii̱n ra, ni̱ka̱ꞌa̱n ra xíꞌin na, káchí ra saá:

―Ndixa nákaꞌnda ini i̱ xíni̱ so̱ꞌo i̱ to̱ꞌon káꞌa̱n ndó, chi káꞌa̱n ndó o̱n vása xíni̱ ndó míchí ki̱xi ra, ta ta̱yóꞌo kúu ta̱a ta̱ sa̱ndaꞌa nduchu̱ no̱o̱ i̱. 31 Ta xíni̱ yó ndí Ndios o̱n vása chíkaa̱ so̱ꞌo ra to̱ꞌon ña káꞌa̱n ni̱vi na kéꞌé ña o̱n váꞌa. Ta Ndios ndixa chíkaa̱ so̱ꞌo ra to̱ꞌon ña káꞌa̱n ni̱vi na kísa to̱ꞌó ñaꞌá, na kúu na kísa ndivi ña kóni ra. 32 Ta̱nda̱ ki̱vi̱ no̱ó ku̱va̱ꞌa ñoyívi yóꞌo, ta̱nda̱ ki̱vi̱ vitin nda̱ ñii ni̱vi o̱n ta̱ꞌán koni̱ so̱ꞌo na xa̱ꞌa̱ ñii ta̱a ta̱ sa̱ndaꞌa nduchu̱ no̱o̱ ñii ta̱ ka̱ku kuáá, ta va̱ꞌa xíto ra. 33 Tá o̱n vása ní‑kixi ta̱a yóꞌo no̱o̱ Ndios, ta saá o̱n kóo ndee̱ kukomí ra keꞌé ra ñava̱ꞌa ―káchí ra xíꞌin na.

34 Ta nda̱kuii̱n na, ni̱ka̱ꞌa̱n na xíꞌin ra:

―¡Ta̱a ta̱ kómí chiꞌña kúu yóꞌó! ¡Nda̱ ki̱vi̱ ka̱ku ún ta̱nda̱ vitin ta̱a ta̱ o̱n váꞌa kúu ún! ¿Án xáni si̱ni̱ ún kúu ún ta̱a ta̱ ndíchí ka̱, ña̱kán kóni ún sanáꞌa ún ndi̱ꞌi̱? ―káchí na xíꞌin ra.

Ta saá ta̱xin va̱ꞌa na ra veꞌe ño̱ꞌo sinagoga, ta kua̱ꞌa̱n ra ke̱ꞌe.

35 Ki̱vi̱ xi̱ni̱ so̱ꞌo ta̱Jesús ña ta̱xin va̱ꞌa na ta̱a ta̱ xi̱kuu ta̱kuáá yóꞌo, ta o̱n taxi ka̱ na ki̱ꞌvi ra ini veꞌe ño̱ꞌo sinagoga, ta saá ta̱Jesús na̱ndukú ra ta̱yóꞌo, ta na̱níꞌi ñaꞌá ra, ta ni̱ka̱ꞌa̱n ra xíꞌin ra, káchí ra saá:

―¿Án kándixa ún ta̱a ta̱ ki̱xi no̱o̱ Ndios? ―káchí ra xíꞌin ra.

36 ―¿Yu kúu ta̱yóꞌo, tata? Ka̱ꞌa̱n ún xíꞌin i̱, chi kóni kandixa i̱ ra ―káchí ra, nda̱kuii̱n ra.

37 Ta ni̱ka̱ꞌa̱n ta̱Jesús xíꞌin ra:

―Xíꞌin nduchu̱ no̱o̱ ún xa xi̱ni ún ra, ta̱a ta̱ káꞌa̱n xíꞌin ún vitin kúu ra ―káchí ra.

38 Ta saá nda̱kuii̱n ra, ni̱ka̱ꞌa̱n ra xíꞌin ta̱Jesús:

―Tata, ta̱Káꞌno no̱o̱ i̱ kúu ún, kándixa i̱ yóꞌó ―káchí ra, ta ki̱sa káꞌno ñaꞌá ra.

39 Ta ta̱Jesús ni̱ka̱ꞌa̱n ra, káchí ra saá:

―Ki̱xaa̱ i̱ ñoyívi yóꞌo xa̱ꞌa̱ ña sanati̱vi i̱ ndasaá yóo ini ni̱vi, án ni̱vi na kándixa ñanda̱a̱ kúu na, án ni̱vi na o̱n xi̱in kandixa ñanda̱a̱ kúu na. Ta saá ni̱vi na o̱n ki̱ví koto, chi ndixa nakuáá kúu na, sandaꞌa i̱ nduchu̱ no̱o̱ nayóꞌo ña va̱ꞌa koto na. Ta ni̱vi na va̱ꞌa xíto, tá o̱n xi̱in na kandixa na to̱ꞌon ña nda̱a̱, ta nayóꞌo kua̱ꞌa̱n na yichi̱ o̱n váꞌa ña kúu no̱o̱ naa, ta to̱nda̱a na koo na nda̱tán yóo ni̱vi nakuáá.

40 Ta sava nafariseo yíta na yóꞌo, ta xi̱ni̱ so̱ꞌo na ña ni̱ka̱ꞌa̱n ta̱Jesús, ta ni̱nda̱ka̱ to̱ꞌon na ra, káchí na saá xíꞌin ra:

―¿Án kóni ún kachí ún ndí ndi̱ꞌi̱ kúu ni̱vi nakuáá? ―káchí na xíꞌin ra.

41 Ta nda̱kuii̱n ta̱Jesús, ni̱ka̱ꞌa̱n ra:

―Tá ndixa ndóꞌó kúu ndó ni̱vi nakuáá, níkúu, ta saá o̱n vása ndíso ndó kua̱chi xa̱ꞌa̱ ña o̱n vása xíto nduchu̱ no̱o̱ ndó. Ta ndóꞌó, vará káchí ndó ndí va̱ꞌa ní xíto nduchu̱ no̱o̱ ndó, ta o̱n xi̱in ndó koto ndó ñanda̱a̱, ni o̱n xi̱in ndó kandixa ndó ña. Ta xa̱ꞌa̱ ñayóꞌo, ndíso ka̱ ndó kua̱chi no̱o̱ Ndios ―káchí ta̱Jesús xíꞌin na.