PETER-NA
I-ba Ahanba Chithi
Wahoudok
1 Peter-gi chithi asi Pakhonchatpa Peter-na i-bani. Peter-na chithi asi mahak kanano amadi kanada i-bano haiba taklaga houdok-i. Chithi asi mahaknadi “Lamlanbasing” (1:1, 1:17, amasung 2:11) hainadi koujariba Christian-singgi maphamda i-bani. Chithi asibu pabasing adubu lamlanba haina kouduna kayarak yaobagi maramdi makhoina leibak kayagi maphamda chaikhaiduna leibagini. Chithi asi Paul-na Ephesia-ki misingda i-ba chithi aduga manaba maramna 1 Peter asi Ephesia i-raba matung chaorakna Christtana poklaba matung chahi 65 gi matungda i-ramba oiramgani haina mi kaya amana thajanei. Peter-nadi Babylon (5:13) haina mingthon piba Rome-dagi chithi asi i-bani.
Mahakna chithi asi i-bagi maram adu “Masi Tengban Mapugi achumba thoujal aduni haiba eina sakhi piri amadi nakhoibu pukning thougatli” (5:12) haina Peter-na hairi. 1 Peter 2:11–3:7, Ephesians 5:18–6:9, amadi Colossians 3:18–4:6 asising asigi marakta manaba kaya yaori. Hairiba saruk ahum asi imung manunggi mari amadi angam athousinggi makha ponbagi maramda paotak piri. Aroiba adu naksilakpa maramna Christian-sing awa anada khaangba kannaba pukningsu thougatli (4:1).
Yaopham Takpa
1. Peter-na mahak masabu takchaba amadi pariba makhoibu kanano haibadu panba (1:1-2)
2. Makhoi punna saruk yaminnariba aran-khubham adugidamak Tengban Mapubu thagatchaba aduga makhoigi punsigi wahanthok adu haiba (1:3–2:10)
3. Mathangda taibangpanda thajabasingna karamna ningthina hinggani haiba takpa amadi mapuroiba amadi loinabi amasung minai amadi mapugi marakta leinaba marisinggi maramda haiba (2:11–4:19)
4. Awa ana taba matamda kuina khaangba kannaba Peter-na makhoibu thougatpiba (5:1-11)
5. Adudagi mahakna chithi asi loisinba (5:12-14)
1
1 Jisu Christtagi pakhonchatpa ama oiriba Peter-na,
Pontus, Galatia, Cappadocia, Asia amadi Bithynia leibaksingda changjapham louduna ichai chaina leiriba Tengban Mapuna khandokpiraba misingsing, 2 Ipa Ibungo Tengban Mapugi hanna khangbiba adugi matung inna, Thawaigi sengdokpibagi thabak adugi mapanna, Jisu Christtagi yathang innaba amasung Ibungo mahakki eena chamthokpinaba khandokpirabasinggi maphamda:
Thoujal amasung ingthaba marang kaina nakhoigi oirasanu.
Ahingba asa
3 Eikhoigi Mapu Ibungo Jisu Christtagi Mapa Ibungo amasung Tengban Mapubu thagatpa oisanu! Mahakki thoihenba chanbibagi matung inna Jisu Christtabu asibasinggi maraktagi hinggat-hanbagi mapanna ahingba asa amada mahakna eikhoibu amuk hanna pokpire, 4 aduga mangba nairoidaba, amakpa leitraba amasung patthaba leitraba phangpham thokpa ama eikhoigidamak thambire. Masigi phangpham thokpa asi nakhoigidamak swargada thambi, 5 Aroiba matamda phongdoknaba thourang touraba aran-khubham adugidamak nakhoigi thajabagi mapanna Tengban Mapugi panggalna nakhoibu ngaktuna thambi.
6 Matam kharagi oina nakhoina makhal kayagi chang yengbada awaba khaangba tarabasu, nakhoina masigidamak haraojou. 7 Chang yengbasing lakpagi maramdi nakhoigi thajaba adu tasengbani haiba utnanabani. Mangba yaba sana phaoba meida chang yeng-i; sanadagi mamal yamna hellaba nakhoigi thajaba adu khangnanaba chang yengba tabani. Madu oirabadi Jisu Christtabu phongdokpa Numit aduda thagatpa, matik mangal amasung ikai khumnaba nakhoina phangjagani. 8 Ibungo mahakpu uhoudrabasu nakhoina mahakpu nungsi; nakhoina mahakpu udrabasu, nakhoina Ibungo mahakpu thajei. Maram aduna waheina phongdokpa ngamdaba matik mangalna thallaba haraoba aduda nakhoina harao-i. 9 Maramdi nakhoigi thajabagi poloigi mahei, haibadi nakhoigi thawaigi aran-khubham adu nakhoina phangjari.
10 Aran-khubham asigi maramda Tengban Mapugi wa phongdokpasingna cheksinna thirammi amadi kupna yengsillammi aduga makhoina nakhoida pibigadaba khudol asigi maramda wa phongdoklammi. 11 Karamba matamda amadi karamna oigadouribano haiba makhoina khangnaba hotnarammi. Matam adudani makhoigi nungda leiba Christtagi Thawai aduna Christtana awa khanggadaba amasung madugi matungda matik mangal phanggadaba adugi maramda makhoida haibi. 12 Makhoina masa mathantagidamak nattaduna eikhoigidamak thougal touriba makhoida phongdokpirammi. Waramsing asi swargadagi thabirakpa Thawai Asengbana Aphaba Pao sandokpasinggi mapanna nakhoida phongdokpire. Waramsing asigi maramda swargadutsingna phaoba yengninglammi.
Asengba punsi ama hingnaba koubiba
13 Maram aduna nakhoigi pukning semsaduna leiyu. Mitsing nasing-u aduga Jisu Christtana lenglakpa matamda nakhoida pubirakkadaba yaipha thoujal aduda mapung phana asa thammu. 14 Haiba inba angangsinggumna, nakhoina khangdringeida leiramba hannagi apambasing aduda sakwong louganu. 15 Madugi mahutta nakhoibu koubiba Ibungo mahakna sengbagumna nakhoisu nachat natou pumnamakta asengba oiyu. 16 1:16 Levi 11:44,45; 19:2Mapugi puyana asumna hai, “Ei asengba oiba maramna nakhoi asengba oiyu.”
17 Misak mimai yengdana mi pumnamakpu mana mana touba thabakki matung inna wayenbiba mahakpu nakhoina Ipa haina kourabadi, malem asida nakhoina lamlanba amagumna Ibungobu ikai khumnana kina hing-u. 18 Nakhoigi ipa ipusingdagi thangtharakpa kannadaba punsi mahing adudagi nakhoibu thadokpinaba pikhiba mamal adu nakhoina khang-i. Madu mangba yaba sana nattraga lupana natte; 19 madu asoiba nattraga amakpa leitaba yao machagumlaba Christtagi mamal yamlaba ee adunani, 20 Ibungo mahakti taibangpan leisemdringeigi mamangda Tengban Mapuna khanbikhrabani, adubu aroiba numitsing asida nakhoigidamak phongdokpire. 21 Ibungobu asibasinggi maraktagi hinggat-hanbiduna matik mangal chaohankhiba Tengban Mapubu nakhoina Ibungo mahakki mapanna thajei, maduna nakhoigi thajaba amasung asa Tengban Mapugi maphamda thamjare.
22 Houjikti nakhoina achumba adu inbagi mapanna nakhoi nasabu sengdokchare maram aduna thajaba nachin nanaosingbu nakhoina pukchel sengna nungsire, thamoi pumnamak yaona amaga amaga pukning changna nungsinou. 23 Maramdi mangba yaba marudagi nattaduna mangba yadaba marudagi hingba amasung matam pumbada lengdana leiba Tengban Mapugi waheigi mapanna nakhoibu amuk hanna pokpire. 24 1:24,25 Isa 40:6-8 (LXX) Mapugi puyana asumna hai,
“Mioiba pumnamak napiga pangkhakni,
amasung makhoigi matik mangal pumnamak napigi mapal-gumbani.
Napina khuithei amasung mapalna kelli,
25 adubu Mapu Ibungogi waheidi matam pumnamakta lengdana lei.”
Nakhoida sandokpa Aphaba Pao adu wahei asini.