1 Kombo mboe popoŋana pa Yooba!

Niom tomtom ta karao pa toono ta boozomen na, kombo mboe pa Yooba. ✡ Mbo 98:1; Tur 5:9

2 Kombo mboe pini mi kapakur zaana pa kampeŋana kini.

Aigule ta boozomen kozzoyaryaara uruunu ambaiŋana pa uraata biibi ta ni ikamam be iuulu iti. ✡ Lu 2:30

3 Kosoyaara zaana biibi pizin karkari ta boozomen.

Koso zin tomtom ta munŋaana men pa uraata kini bibip ta ipa ndel kat. ✡ Mt 28:19

4 Pa Yooba, ni ta biibi ŋonoono. Tanata tiwidit uruunu ma isala kor kat.

Ni ilip pa merere ta boozomen. Tana iti tomototo i mi teleŋleŋ la kalŋaana.

5 Zin karkari, merere kizin ta boozomen na, pakaamŋan men.

Mi Yooba, ni Anutu ŋonoono ta iur saamba raama ka koroŋ ta boozomen. ✡ Un 1:1; 1Kor 8:4+

6 Ni zaanaŋana mi king biibi ŋonoono. Mi ni mbura keskeezeŋana mi ndabokŋana kat.

Sombe telela urum kini mi tombot su kereene uunu, to tikilaala ta kembei.

7 Tana niom karkari ta boozomen, kapakur Yooba.

Kewe kwoono mi kapakuri pa zaana biibi mi mburaana.

8 Kapakuri pa zaana biibi kat.

Mi kelela urum kini raama patoronŋana tiom be kakam pini.

9 Kelek kumbuyom mi kutuundu pa Yooba. Pa ni potomŋana mi ndabokŋana kat.

Tana niom tomtom ta karao pa toono ta boozomen na, sombe kombot su kereene uunu, na kokoto ituyom, mi komoto i mi keleŋ la kalŋaana.

10 Koso ma irao karkari ta boozomen ta kembei: “Yooba, ni king biibi ŋonoono ta ikamam peeze pa koroŋ ta munŋaana men!

Muŋgu ni iur toono ma uunu imbol kat. Tana kosa sa irao be ikam toono ma imuzik mini na som.

Mi ni ko itiiri zin karkari ta boozomen mi iur kadoono pizin. Mi kadoono tabe ikam pizin i, ko indeeŋe men. ✡ Mbo 97:1

11 Niom koroŋ ta kombot saamba mi toono na, niom ta boozomen leleyom ambai mi menmeen yom.

Mi tai ramaki ka koroŋ matakiŋa ta boozomen tomini, kalŋoyom isala ma biibi kat. ✡ Tur 12:12

12 Mi mokleene ramaki koroŋ ta tindomdom pa, mi ke boozomen ta timbotmbot su leleene na,

kozo kamap ma kalŋoyom isala ma biibi, mi menmeen yom isu kereene uunu.

13 Pa iŋgi be Yooba imar.

Ni ko imar mi ikam peeze pa zin tomtom ta timbotmbot toono na, mi ito sua kini mi iurpe pataŋana kizin.

Ni ko itiiri zin karkari, mi iur kadoono ndeeŋeŋana pizin. ✡ Ŋgo 17:31