32
Elihu kah Thintoek Ol
1 Amah mikhmuh ah amah te a dueng sak dongah te rhoek hlang pathum loh Job a doo te kangkuen uh. 2 Te dongah Ram koca kah Buzi Barakel capa Elihu kah a thintoek tah Job taengah sai coeng. Pathen lakah amah hinglu te a tang sak dongah a thintoek khaw sai. 3 Hlatnah hmu uh pawt dae Job te a boe sak uh dongah anih kah thintoek khaw a hui pathum taengah sai van. 4 Amih boeih khuiah Elihu tah a kum la a ham dongah Job te ol neh a rhing. 5 Hlang pathum ka dongah hlatnah a om pawt te Elihu a hmuh vaengah a thintoek te sai.
6 Te dongah Buzi Barakel capa Elihu loh a doo tih,
“Kai he a kum la ka noe tih
nangmih tah na ham.
Te dongah ka kawl uh tih nangmih taengah
kamah kah poeknah thui ham khaw ka rhih.
7 Cueihnah he a khohnin nen khaw a thui uh vetih,
kum a yet a tukkil uh mako ka ti.
8 Mueihla he hlanghing ah om dae,
Tlungthang hiil long ni amih a yakming sak.
9 Muep aka cueih neh patong rhoek khaw,
laitloeknah te a yakming uh moenih.
10 Te dongah kai taengkah hnatun uh lah ka ti.
Kai khaw ka poeknah ka thui van eh.
11 Nangmih ol te ka lamtawn ne.
Olthui na khe uh vaengah
nangmih kah lungcuei te hna ka kaeng thil.
12 Nangmih khaw kan yakming vaengah
Job taengkah a tluung ol te
aka doo na om uh moenih he.
13 “Cueihnah m'hmuh coeng, anih te hlang pawt tih Pathen loh khoek saeh,” ti uh ve.
14 Olthui neh kai taengah rhong a pai pawt dongah,
nangmih ol neh anih te ka thuung mahpawh,” a ti nah.
15 Amih lamkah ol khaw vawt uh tih,
a rhihyawp uh dongah koep doo uh pawh.
16 Koep doo mueh la pai uh tih
a cal uh pawt dongah ka lamtawn aya?
17 Kai khaw kamah hamsum te ka doo vetih
kai khaw kamah kah poeknah te ka thui van ni.
18 Olthui khaw ka hah tih
ka bungko kah mueihla loh kamah n'kilh coeng.
19 Ka bungko he misurtui bangla khui pawt tih
tui-um thai bangla ueth.
20 Ka thui daengah ni kai ham a hoengpoek eh.
Ka hmuilai ka ong vetih ka doo pueng ni.
21 Hlang maelhmai te ka dan tarha pawt vetih
hlang te ka hlae tarha mahpawh.
22 Hlang hlae ham khaw ka ming moenih,
kai aka saii loh kai he phawn n'khoe lah ve.