1  Toxoratamona owa masok mana Ebraham muli mana Mamre xaing sabangadi rubinia. Xaidaba sala, saing Ebraham rung xahing xaluxinia. 2 Bagu mahaing saing hata sibuna li bagu lipu tuwa dili maxania. Bungina bagudi, mesa yunga xahing xalunoa saing luki mala ranguadi, saing gung king tuxundi turu mari titia.✡ Hibru 13:2

3 Harua ba, “Lipu sabanga, nabu uyaha manga, bing uwa mongaita rangua nga lipuxim oxatama. 4 Uyunga lipuxigu oxatama xap langa ma bu adamia kimdi to. Tauna, ayagua xai namuya li. 5 Uyunga ngaxap anginga teladi ma nang bu haringiang to, tauna ala. Namua na ama rangua nga lipuxim oxatama.”

Baing daharua ba, “Sangau, ulibu bila uharua ba.”

6 Binabu Ebraham ila sap xahia rangua Sara saing harua ba, “Ugogolinga! Oxop wit gagabing (xai sibuna) minang tuwa! Uxugia usala salangadi.”

7 Saking luki mala rangua bulmakaung bakbakka saing mogu tutubing dungmananganam tela. Xap mala rangua lipuxing oxatama ba tutu tau sap. 8 Baing xap bulmakau suing langina xaung sis* Sis anginga ditongtongia mana bulkmakau susuna ne haring monga. xaung bulmakau mututungana tau ba ma, saing sinadi nadi. Daxang mua, baing Ebraham li haxek ranguadi xai tela namuya.

9 Duxusunga ba, “Hainima Sara kabi?”

Haxuya ba, “Bagu wa xahi lunia.”

10 Baing tela harua ba, “Bagula ngagoxoya ma muli mana sobakka baguli niani etuama, saing hainima Sara bagula sep ing sibung garang luba.”✡ Rom 9:9

Ne Sara lungu haruanganoa, namua na wa xahi xaluxinia lipua ba ubunia. 11 Ebraham Sara tang duwa duanga ba, binabu Sara nianing hayauxingamdi disup ba. 12 Baing ina naga Sara masisi naina saing hatum ba, “Nga xabati ba, xaung ayuagu duanga ba. Ne hatata bagula ngayaha bila li baru?”

13 Baing Toxoratamona harua na Ebraham ba, “Baruta Sara masisi saing harua ba, ‘Nga muganga buk, binabu bagula ngahayau baru?’ 14 Axamang tela haxi buk mana Toxoratamona te.✡ Luk 1:37 Bagula ngagoxoya ma muli mana sobakka baguli niani etuama bila menau ngamogu ba, saing Sara bagula sep ing sibung garang luba.”

15 Sara maxuwa binabu hatiam ba, “Nga ngamasisi te.”

Ne harua ba, “Tegu, umasisi (ba).”

16 Lipu tuwadi ba dimesa dilauba, baing tung dibagu mari mala mana long sabangga Sodam. Baing Ebraham haxa mala ranguadi ba yungadi daxangia. 17 Baing Toxoratamona harua ba, “Bagula ngayameng hatumingagua ngahau ba mana Ebraham? Tegu. 18 Maxung sibuna Ebraham bakbagindi bagula disok numanuma haringina, bagula ramramoding sabanga. Baing guxama ngasina na bagula xap numanuma titiam longgalo. 19 Namua na ngamogu bu tabina garandi xaung bakbagidingdi dima kimu ba disu mana Toxoratamona daxanganoa, bu dilibu kuboluadi daxai xaung dimaring. Baing ina naga, bagula ngalibu haruanga longgalo mana Ebraham bila ngahau ba.”

20 Baing Toxoratamona harua ba, “Ngalungu harungianga xumang sibuna daharungia long sabangga Sodam Gomora tang. Kuboludingdi didoa sibuna. 21 Binabu bagula ngari mala bu ngabagu nabu kuboluadi dilibudi sanga mana haruangua ngalungu ba. Nabu tegu, bing bagula ngaxabia.”

22 Sup, baing lipu luwadi duxugia dahaxa mala Sodam. Ne Ebraham wauyu li mua Toxoratamona maxania. 23 Baing Ebraham ila haxek rangua saing xusunga ba, “Maxuna bagula uhanggalangia lipu kubolu maringinamdi xaung lipu kubolu dianamdi xauna? 24 Nabu lipu kubolu maringinam 50 duwa mana long sabangga ba. Maxuna, bagula uhanggalangia longga ba masup? Bola uyungadi duwa bu lipu maringingam 50 ba disup te? 25 Labu uhatumia ulibu bila bau tai—ung lipu kubolu maringinamdi xaung lipu kubolu dianamdi xauna (di?)mati. Bagula bila ulibu kubolu taininau mana lipu kubolu maringinamdi xaung lipu kubolu dianamdi. Labu uhatumia ulibu bila bau tai! Lipu titi longgalo suxuyangadinggama bing libu maringina, maxuna?”

26 Baing Toxoratamona harua ba, “Nabu ngabagu lipu kubolu maringinam 50 duwa mana long sabangga Sodam, bing bagula ngayunga ding longgalo duwa bu 50 ba disup te.”

27 Baing Ebraham harua muli ba, “Toxoratamona, ngaungguti ngaharua naung bila ba, ne nga bila gagap xaung hayata ing ganina. Ne ngabo ba ngaharua muli. 28 Heku lipu maringinam 50, nabu ngaunia 5 mana titingadinga. Bagula uhanggalangia longga ba masup namua na 5 ba duwa te?”

Baing Toxoratamona harua ba, “Nabu ngabagu lipu maringinam 45 duwa la ba, bagula ngahanggalangia te.”

29 Baing Ebraham harua muli na ba, “Bola 40 ding ganiding duwa la ba, bing baruta?”

Baing Toxoratamona harua ba, “Mana namua 40 duwa, bing bagula ngalibu te.”

30 Baing Ebraham harua ba, “Toxoratamona, sanga ba atim disala manga te. Ne ngabo ba ngaharua muli. Bola 30 ding ganiding duwa la ba, bing baruta?”

Baing Toxoratamona haxuya ba, “Mana namua ngabagu 30 duwa, bing bagula ngalibu te.”

31 Baing Ebraham harua ba, “Toxoratamona, ngaharua naung xumana bila ba, ne ngabo ba ngaharua muli. Bola 20 ding ganiding duwa la ba, bing baruta?”

Baing Toxoratamona harua ba, “Mana namua ngabagu 20 duwa, bing bagula ngahanggalangia te.”

32 Baing Ebraham harua ba, “Toxoratamona, sanga ba atim disala manga te. Ne ngabo ba ngaharua bunging tela muli. Bola 10 ding ganiding duwa la ba, bing baruta?”

Baing Toxoratamona harua ba, “Mana namua ngabagu 10 duwa, bing bagula ngahanggalangia te.”

33  Toxoratamona harua rangua Ebraham laing sup, baing ilauba. Baing Ebraham goxoya mala numia.