1 Nayan, si Herod se otaw limowan doton te Galiliya, aw doen dinineg din tepad te eg-inangen i Jesus. 2 Minikagi sikandin diyà te menge opisyal, “Sikandin besi si Juan Memonyagay neantay den lekat te nematay, aw yan se doun te eg-inangen din se kepelahan metolos.”

3 Yan se inikagi din, so kedengan impedakep din si Juan, aw impegapos din, aw impekeleboso din. Yan se ininang din diyà ki Juan amon meluba se nayi din si Herodias inagaw din diyà te kedowa din si Felipe. 4 Peg-agaw i Herod te nayi din, simila si Juan kandin, kagi din, “Mig-inang ka den te salà, so nengagaw ka te nayi nikaw.”

5 Ibeg i Herod ipeimatay din si Juan, meneng wedà deleg, so nelemitan sikandin te meopal se kedita te otaw kandin, so eg-aneng-aneng dan te si Juan se ontò telekeliwat te kagi te Timanem.

6 Peg-inang i Herod te pista tepad te aldaw te pegtebaw din, simayaw se laga batà i Herodias amon meluba se menge otaw timanod. Ontò heman neluba si Herod, 7 aw yan se doun te ontò sikandin migsapà te ibegay din diyà te laga sìyan se pengkey eden se pemoyoen din. 8 Penga niyan, timolò se laga te punù te inay din aw minikagi, “Pesipali se lieg i Juan Memonyagay, aw pesoli se olo din diyà te dakel sablag, aw peibingi dini kanak.”

9 Nelidò se pedowan i Herod. Meneng so migsapà sikandin, aw eked keibeg silahen te menge otaw timanod, tinoman din se pinemoyò te laga. 10 Insogò din se sondalo doton te keleboso. Sinipal din se lieg i Juan. 11 Insawol din se olo diyà te sablag, aw imbegay din diyà te laga, aw inibing din doton te inay din. 12 Penga niyan, dimoton se menge tinoledaan i Juan te keleboso, aw inabat dan se lawa din aw inlebeng dan iyan. Penga niyan, dimoton dan ki Jesus aw mig-indan dan diyà kandin tepad te pegkematay i Juan.

13 Nayan, pegdineg i Jesus tepad te pegpengimatay ki Juan, nesayo sikandin lekat kidoen. Simakay sikandin te belangay aw dimoton te kesikmihan. Meneng pegketaga-taga te kedita te otaw te pineselowan i Jesus, dimoton dan heman. Minipanaw dan lekat te menge ogpeanan dan. 14 Pegtenà i Jesus, kinità din se ontò medita otaw migtagad kandin. Ontò din dan neidowan, aw pinegolian din se kedita te otaw doen mesakit. 15 Pegkeapon niyan, dimoton se tinoledaan din kandin, aw minikagi dan, “Ontò ini kebigtilan, aw agpet den delem. Pekeseyowi se kedita te otaw doton te lonsod amon mayad dan te kànen dan.”

16 Minikagi si Jesus, “Ikà niyo egpekesayo kandan. Pemekàni niyo dan.”

17 Minikagi dan, “Meneng doen olò lima se pan, aw didowa se ikan.”

18 Minikagi si Jesus, “Ibingi niyo iyan dini kanak.”

19 Penga niyan, impeonsad din se kedita te otaw kidoen te sagbet. Inabat din se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din se pan aw imbegay din diyà te menge tinoledaan din, aw imbegay dan iyan diyà te menge otaw netipon. 20 Kimaen se kedita dan aw nebesog dan. Penga niyan, inimon dan se samà te pan kinaen dan, aw sempolò teg dowa se buun nepenò. 21 Menge lima melalan se meama kimaen kenyan, aw wedà bilangi se menge bayi aw mengisù.

22 Penga niyan, impeonà i Jesus se menge tinoledaan din simakay te belangay pesalo doton dipag te lanaw. Dalem niyan, impeolì din se kedita te otaw netipon. 23 Pegkesayo dan, timikedeg si Jesus doton te bontod sebad din amon megtawal-tawal. Pegsallep te aldaw, kidoen si Jesus te bontod olò din sebad. 24 Meneng mediyò den se belangay doton te lawod te lanaw. Ontò dan nelimahan, so dinetengan dan te dedakel balud aw simongsong dan te kelamag. 25 Ontò mata-mata te iselem, dimoton si Jesus kandan aw minipanaw sikandin diyà te lanto te lanaw. 26 Meneng pegkità dan kandin, ontò dan nelemitan. Migpuypuy dan tandà te lamit dan, aw minikagi dan, “Along iyan.”

27 Meneng pegketà timawal si Jesus, “Peseligi niyo se pedowan niyo, so siaken ini. Ikà niyo egkelemitan.”

28 Minikagi si Pedro, “Pengolo, aw ontò sikona, peipenawi a diyà te lanto te lanaw pesalo doton kamno.”

29 Minikagi si Jesus, “Na, diyà ka.”

Penga niyan, timenà si Pedro lekat te belangay aw minipanaw diyà te lanto te lanaw pesalo doton ki Jesus. 30 Meneng peg-imanman din te kelamag ontò mebandes, nelemitan aw agpet melemes. Meneng nengenganay sikandin, kagi din, “Pengolo, tebangi a.”

31 Mig-ayas si Jesus minawid kandin, aw minikagi, “Wedà pa kedì kelobos se pegsalig no kanak. Nepela a so migdowa-dowa ka.”

32 Penga niyan, eleg dan simakay te belangay, aw timunung se kelamag. 33 Limongken se doma tinoledaan diyà ki Jesus, aw migsimba dan kandin, aw minikagi dan, “Ontò ka Batà te Timanem.”

34 Nayan, penga te pegbatas dan te lanaw, dimateng dan doton te Genesarit. 35 Kimilala se tege Genesarit ki Jesus, aw impeangay dan se kedita te otaw doen mesakit lekat te kedepagan niyan. 36 Nemoyò dan diyà ki Jesus aw mepakay dan olò memaed te toktok te saol din, aw negolian se kedita dan nemaed kenyan.