Jisas ile pakekere ole omaing ako Luk i wat i
Pakekere Ole Omaing
Ritetong nge a Pakekere Ole Omaing
Luk i wat erere ake mo aro i pavus ile rirumong ako i patea i nomenga nge ile erere ako te apet i ve ini Panongpolong Sivenga ako Luk i wat i. (Luk 1:1) Na ile rirumong ake i ri nge a Jisas ile pakekere eve aposelre ole panongpolong nge i, na nge ile kimaing nge pen elonga. Na Luk i wat ile erere or aini aken a Tiopilus nge. (Aro o thepol ritetong ako i voth a mukaling nge Panongpolong Sivenga ako Luk i wat i.) Na Pakekere Ole Omaing i ritet nge toko lemioongare ole lotu ile velpoling ako i patea ako a Jerusalem na i es mun a Samaria na i pavuralo pen elonga ake ru a ulue. (1:8) Na erere ake i ritet nge toko lemioongare ole lotu ako i velpol a Jisas ile los wereraing kime. Na Judare olemio tel nge a Jisas, lamo Oni Riringa i esu ma i rero or. (2:1-41) Aveto Jisas ile Panongpolong Sivenga ini Judare oenga ole avele. Avele, Oni Riringa i rero mun toko Samaria angare, nge ako olemio mun nge a Jisas, aken i pathengal it ako ve, God aro i pamimi mun or. (8:14-17; 8:25) Na Oni Riringa i rero mun areko or ini Judare avele mo aro i pathengal it ako ve, toko alavusnga ake ru a ulue o pavurvur aro o el mimiong ako aro ile vusonga avele, tova o olemio nge a Jisas. (10:1–11:18)
Na erere ake i ritet mun nge a Pol ile mimiong na ile omaing, ako i panongpol Panongpolong Sivenga nge pen elonga, na i panongpol areko or ini Judare avele, eneke Judare o lel okime nge Panongpolong Sivenga aken. Aken lemir mire nge pen areko Pol i es nge, lamako i wat werer malueng pelie a or nge. Na Luk i wat rirumong ake nge wop lemi ako Pol i voth a mang a midenga lemi ako a Rom, i pavurvur nge tovu po or aini. Na i toth ako aro Pol i mit nge riong, na Luk i sis ve aro i pathengal ako ve, Pol i oma vothung kerenga avele. Pol i voth a mang a midenga aken, eneke Judare oni plong nge Panongpolong Sivenga ako Pol i panongpol nge, aveto Pol i avsa Romre ole patorong e avele.
Jisas ile pakekere ako o apet mun or ve ini aposelre o panongpol nge ile riong ako a Jerusalem
1
(Vonge 1:1–8:3)
God i el werera a Jisas a Pen a Urvet la.
1 Teik a Tiopilus, nge lek malueng teltelnga, tho wat nge ur elonga ako Jisas i oma i, na nge ur ako i patoral toko na sengre nge, na i patea nge ile omaing pateanga, 2 na i mul nge nang ako God i ela i roro a Pen a Urvet la. Na nomenga Jisas i ateal tokokoe pelie ve ini ile pakekere, na i pator or nge a God Ioni Riringa ile engenging. 3 Na ako nge ile rinong kime, i velpola mun a ile pakekere nge. Ma i oma omaing pulua ako i pathengal or ako ve, i mimi werera mun lale. I velpoltun or papulua i pavurvur nge nang mule pa penel, ma i patoral or nge a God ile menong e nepes. 4 Rongan i voth tomo nge or, ma i pator or ve, “Thomu o mothong tova o lo lelpot a Jerusalem. Na thomu aro o men tetal sungong ako God i kin ile riong lale ve aro i sungu i a thomu nge. Ranga ve nomenga ako tho ri tel i a thomu nge lale. 5 Eneke Jon i paninu toko na sengre nge thei. Aveto lelle inga mun tie God aro i paninu thomu nge Ioni Riringa.”
Jisas i sis ve aro olemi mire ako ve, aro i velpol ini ole nepes a oopo lemi na nge ole menong ake ru a ulue, kene avele.
6 Nge wop lemi aken o velilo pel, ma o nina i ve, “Toko Pomnga, nge wop lemi ake aro ong velpol ini Israelre ole nepes?”
7 Lama Jisas i olal ole riong ve, “Vovo inga ienga ako i pomnga na i pamen nang na mlik ako aro ur aken aro i velpol nge, aveto ini lomu omaing avele. 8 Aveto panen aro Ioni Riringa aro i ru mo i voth tomo nge thomu. Naro i paengeng thomu. Kena aro thomu o panongpol nge lek riong ako a Jerusalem na Judia na Samaria na pen elonga ake ru a ulue.”
Jisas i esa a Pen a Urvet.
9 Jisas i ri ma vus lama God i ela ol i roro, ma o the ma songen i pasopal i ma o thepol ol i avele.
10 Rongan o mit ma otheki i panesrum i a sepsa na a ur e avele nako toko or aini ako o ne teunong velelesnga o mitu a olo sei. 11 Ma or paini o ria ve, “Thomu Galili angare o vova ake o mit ma o thea la a sepsa nge la, e? Jisas ako God i eltetpot i a thomu nge ma i ela i a Pen a Urvet la, aro i lo werer ranga ve mun ako thomu o thepol i ako i esa a Pen a Urvet la.”
O ateal toko e ako aro i tepolal a Judas imei ma i velpol ini pakeke.
12 Lamako o lospot a tete a Oliv ma o lo werer a Jerusalem la. Na tete aken ia wop melanga nge a Jerusalem avele. Oa wop toth inga e pel. 13 Ma o eso a rem pomnga na o esa a vel lemi ronganga ako ini ole vothinga. Ma oionre vene: Pita, Jon na Jems na Andru na Pilip ome a Tomas na Bartolomiu na Matiu na Jems ako ini a Alpius itun na Saimon ako i voth tomo nge toko avlung ako o apet i ve ini Selot,* Selot i mirenga ako ve, i voth e avlung ako o sis ve aro o pun tomo nge Romre ole gavman mo osivenga o theal ol or. na Judas ako ini a Jems itun. 14 Ma ine tokokoere o men velilo pel ma olemi omole ol inga nge nongong. Ma o nong tomo nge sengre na Maria ako ini a Jisas inina na Jisas ititeinre.
15 Lama nge nang omole Pita i mita a toko lemioongare otheki ma oa titaling i mul nge or 120. 16 Ma Pita i ria ol or ve, “Titeikre, ine riong omole ako o wat i a erere nomenga, i velpol ol lale. Nomenga God Ioni Riringa i pavelpolpot i a nepes a Devit iwo. Ma i ri nge omaing ako aro Judas i oma i. Ini toko aton ru i pathengal tokokoe areko o rere a Jisas. Na ponange riong ake i velpol nunganga lale. 17 Na Judas i voth tomo nge them, ma i um tomo nge them.”
18 (Na toko ake ini a Judas i el umtun nge ile omaing kerenga aken, ma i ol ulue epee nge. Ma i matu nge ma iopo meris, makola imikeli i polopot a lalanga, mako ini ile rinong. 19 Toko alavusnga ako ru o voth a Jerusalem o nongpol ikimanga. Na nge ole riong o apet ulue epee aken ve, “Akeldama,” i mirenga ako ve, “Ulue ako mla i palalas nge”.)
20 Lama Pita i ria mun ve, “Riong ako i voth a God ile erere ako ini a Buk Song, i vene:
‘Aro ile vel aro i ngo polpol ol inga,
naro toko e avele ol aro i voth nge.’ Buk Song 69:25
Na
‘Aro toko relnga i tepolal ol i nge ile omaing aken.’ Buk Song 109:8
Na erere i ri venen aken. 21-22 Na i sivenga ako aro te ateal toko e aro i supo tomo nge it mo aro i ritet nge ur ako i thopol i nge a Toko Pomnga ile los wereraing. Naro ini toko ako i voth tomo nge it nge nang elonga ako Toko Pomnga a Jisas i esu esa tomo nge it. I patea nge nang ako Jon i paninu toko na sengre ma i pavurvur nge nang ako God i elteta i a it nge.”
23 Na tokokoere o atealpot toko or aini. Omole ini a Josep, ako o apet mun i a Barsabas, na iion aininga mun ini a Jastus. Na toko aininga ini a Matias. 24 Ma o nong vene, “Toko Pomnga, lomum mire nge toko alavusnga olemi na ong ateal toko kathnga nge toko aini aken lale na pathengal i a them nge, 25 ve aro i velpol ini pakeke mo i el a Judas imei. Eneke Judas i lo nge omaing ake ma i es nge pen ako i pavurvur nge i.” 26 Ma o ela anral tun or aini ma o paateal a Matias na Barsabas nge mo o paenu i a oto lemi ma o tik tok i na um ako i prilpot tel kene ini a Matias ile. Mako i velilo tomo ol nge pakeke or mule pa omole pothoi omole aken, mako oa titaling i velpol werer mun nge mule pa omole pothoi or aini.
*1:13: Selot i mirenga ako ve, i voth e avlung ako o sis ve aro o pun tomo nge Romre ole gavman mo osivenga o theal ol or.