1 Napanelo andípagwa mpalishayo walina Nikodemu nkútawala jumo wavayuda. 2 Munu aju andímuukila Yesu shilo ndamwaulila doni, “Labi, wetu tundimanya shana kenga wako apa walakadilé kwa Nnungu, gwegwe umwalimu. Vimanyikilo vyautenda wako avi, hapali munu wakuulula kutenda bila Nnungu kupagwa pepi-pepi namu nae.” 3 Yesu akanjang'ula kushidoni, “Ninkukwaulila mwiu mwiu, munu akanavalekwa kwakuwa* Kwali: …akavanalekwa kavili. haulula shinu kwona utawala wa Nnungu.” 4 Nikodemu kutwala kushidoni, “Da munu alota kuvalekwa dashi àvele nang'olo? Da ankuulula kwinjila kwamwanda wambili mmunda mwanyoke kutwala kuvalekwa?” 5 Yesu kunjang'ula, “Ninkukwaulila mwiu mwiu, munu akanavalekwa kwamedi na Imumu† Mu Eshekieli 36:25-27, Nnungu ankulivikila kwavanentete medi akuvaaladyanga vanu mumadambi na imumu yake yakuvabadilisha ntima. Apa Yesu ankulinganianga kuvalekwa kwamedi na imumu na kuvalekwa kwakuwa. Lola 3:3. haulula kwinjila muutawala wa Nnungu. 6 Doni, shivalékwa kwamili, mili na shivalékwa kwa Imumu, imumu. 7 Haunashange mwaa wakukwaulila doni, inimmaikila muvalekwe kwakuwa. 8 Imepo indápunga palyutu lyoelyoe lyailota yene; wako kwigwa kunyonya kwake kanji haunamanya kwaipandukanga na kwayenda. Nimumo momo kwakula munu ávalekwa kwa Imumu.”

9 Nikodemu akajang'ula, “Na doni po inkuululika dashi?” 10 Yesu akanjang'ula kushidoni, “Wako umwalimu wavanaishilaeli, napane haunamanya shinu vinu avi?‡ Nikodemu kenga mwalimu wavanishilaeli inímmaikila amanye doni, vanu indivavaikila vavalekwe kwakuwa. Lola Ishaiya 44:3-5; Eshekieli 37:9-10. 11 Ninkukwaulila mwiu mwiu, shatumanyite ni shatutangola, shatugwene ni shatumya ushuda kanji ushuda wetu hamunakulupila shinu. 12 Ikava kenga nditangola vyamushilambo mwenu hamukulupidile, napane nikatangola vyakuwa mulota kukulupila dashi? 13 Hapali munu ákwadile kuwa ila ni aijá áalweke kuwa, Mwana Wamunu.§ Maandiko anji akala vandijanjedya: …ávele kuwa. 14 Ni kenga momo mwannyanyulidile Musha nyoka munnandi kushimbweshe** Kwamwaa wakutangadikanga kwavanaishilaeli vàvele kushimbweshe, Nnungu andívapa shaushanga shakulumigwa na dinyoka kanji jo mwene Nnungu andímwaulila Musha akandyange lishinamu lyainyoka akamele munnandi na anyanyulidye kushanya pakulota vanaishilaeli vakalumigwe na inyoka, vakalola, vapone. Lola Ishabu 21:9. nanae Mwana Wamunu inimmaikila anyanyuligwe 15 pakulota vanu uti vankulupíla nae vavenavo shingumi shíkamalilika.

16 “Amu ni mwanagwaladidye Nnungu shilambo, ata mpaka nae kumumya mwanagwe ávele jumo jojo pakulota uti vankulupíla nae havanajaike kanji vavenavo shingumi shíkamalilika. 17 Mwaa Nnungu hantumididye mwanagwe mushilambo aukumu shilambo kanji shilambo sho shambwalegwe kwaindila yake nae. 18 Aijá ánkulupila nae hanaukumigwa shinu, aijá napane ákankulupila andyukumigwa tayali kwamwaa úkave wakukulupila lina lya Mwana wa Nnungu, mwana jo ávele jumo jojo. 19 Ukumu yo ni ai: lilangadyo lindida mushilambo kutwala vanu kunagwaledya shii kuleka lilangadyo mwaa vitendo vyave vivele vyakunyata. 20 Kula munu ánatenda vyakunyata andávangedya lilangadyo na hanavandika kulilangadyo pakulota vitendo vyake vyo havinalale panda. 21 Napane aijá ánatenda vyaumwiu aida kulilangadyo pakulota vitendo vyake vyaneke kuva vitendo vitandéke mu Nnungu.”

22 Ling'oto lyavinu avyo Yesu andyúma panjini pamo na vakwoda vake kuka mushilambo shosho sha Yudeya. Ako nae andípagwa na vanavo avapa vanu ubatisho. 23 Nanae Nshuwau momo ku Enoni pepi na pa Salimu ashindavapa vanu ubatisho mwaa kwanavo ko wakupagwa medi oe, napane vanu vashindamuukila na vashindabatishwa. 24 Doni, wakati awo Nshuwau vakanava kunjela nkalaboshi.

25 Napanelo vakwoda vake Nshuwau vandítaukananganavo munu jumo muyuda kwaing'ano yakulyushanianga ushapu. 26 Vanavo vandyúka ndatangola namu Nshuwau kushidoni, “Labi,†† Labi ni lilove lyashilamaiku; livé na mana mwalimu. munu avéle namu wako mwangu unji wa Yudani, waumidye ushuda ummalanganga nae, gwe, aijá apalá ankuvapa vanu ubatisho na vanu uti vankumuukila.” 27 Nshuwau akajang'ula kushidoni, “Munu haulula kupata shinu, shinu asho pakapatile kuwa. 28 Ata mwemwe mmene ni mmashuda kwa ashilá shangutangwele, ‘Nangu apa hangunava shinu Klistu, nangu ni aijá ngútumigwe kulangalela.’ 29 Mwene nkúlombwa ni nkúlomba. Napane mbwadigwe wapantima wankúlomba ni aijá ánannindila nkúlomba. Panamwigwa, nae andápuwanga namene mwaa wakwigwa lidi lyake. Nadoni lipuwilo lyangu ali lindiwikila popo. 30 Nae ni ávaikidile aanjadyeke nangu ngupungulike.

31 “Aijá áalakela kushanya avelé pashanya pavanu uti. Aijá wamushilambo, wamushilambo na jojo jo atangola vyamushilambo. Napane jo áalakela kuwa jo avelé pashanya pavanu uti. 32 Nae ankumya ushuda wavinu vyagwene na vyaigwite kanji hapali munu áitikila ushuda wake. 33 Aijá áitikila ushuda wake ankuntaa namakong'o kenga Nnungu ni ávenavo umwiu. 34 Aijá wantumididye Nnungu atangola malove ake Nnungu mwaa nae andimupa Imumu íkave shipimo. 35 Tatamunu ankunnagwaledya Mwana na vinu uti aninkamudya. 36 Aijá ánkulupila Mwana ankuva na shingumi shíkamalilika kanji aijá áita kunkukulupila Mwana, shingumi sho alota kwigwa lyatu na shitundi shake Nnungu shinkupagwa pamili pake.”