Aam ro Raa Ykom tna Tiim Kʼraa Ibrani ro Smot Yesus
Ibrani
1
Yesus tait Ku ro Allah yare
1 Mam masno ro wia to, Allah ykyas bo kʼraa wanu; raa ro Yahudi.* Raa wase awya ro ykom aam refo. Menohe anu bhar bwe ait tait raa ro Ibrani ye. Tibyo tiwya ait kro agama Yahudi reto tna fo yrok smot Yesus. Tna ykom aam refo kʼraa mana wait taro ro smot Yesus ye. Som ‘Yahudi’ reto mkyas raa mana weto ye, tna mkyas agama wana ye. Som ‘Ibrani’ ja mkyas mai ro raa weto mkyas. Ait ybis nabi wAit mama mkyas bo wAit. Mama mkyas bo kʼanu hohos na wanu mam ti aro rau-rau tna mkah iso aro rau-rau ye. 2 Menohe mam masno ro tis refo to, Ku rAit Yesus oh mi Raa ro ykyas bo ro mbam kʼAllah kʼanu. Allah ysya Ku rAit Yesus yfen ayoh msya tabam refo msya bombra beta. Tna Allah ysan bombra weto beta Ku rAit. 3 Bo yase ro Ku rAit to mnan anya msya Yaja yase rAit ye. Soh anu bmat tna bhar Ku rAit Yesus, reto mnan anya msya anu bmat tna bhar Yaja Allah ye. Yesus yhau ybo bombra beta. Ait yno mkah bokyas rAit ro matak toni. Tiwya Ait ysair iso ro yyon iro raa. Tna fo yaut yamoʼt sawro. Allah tait Raja ro yase toni. Tna Yesus yaut yamo hre ysya Ait mam ati ro yatem ati; hroh ro mase toni reto. 4 Feto oh mi anu bhar bwe Yesus tait yase toni yiwer malaikat sor. Tna bhar bwe yasom rAit 'Ku ro Allah' reto to, yase toni ye. 5 Tiwya Allah yawe:
“Nyõ fi Ku aJõ oh. Ifo fo Jõ tamo Nyõ Naja.”
Mazmur 2:7
Tna Allah yawe:
“Jõ fo tamo Ait Yaja. Tna Ait tait Ku aJõ.”
1 Tawarikh 17:13
Ja Allah ytu malaikat aro yawe ku wAit to fee. 6 Tna Allah ybis Ku bum rAit yamaʼt tabam refo. Ati reto Allah ybis malaikat wAit beta yawe:
“Nmo nbaut Ait.”
Mazmur 97:7
7 Tna Allah ykyas malaikat yawe:
“Tno malaikat woJõ mnan fi foos. Tna tno sryan woJõ mnan fi tafoh.”
Mazmur 104:4
8 Menohe Allah yawe Ku rAit yawe,
“Nyõ fi Allah ro nase. Tna namo Raja nbo raa msya bombra beta mamo snok mam hame wajin. Nyõ ja nbo raa woNyõ mkah nhaf ro moof ati. 9 Bo ro raa mno moof to, Nyõ ksoh. Tna bo mkair ro ana mno to, Nyõ knait. Feto oh mi Jõ tsok Nyõ namo Raja. Tna ttu minyak mam nana aNyõ. Tno afo re raa mhar mawe Jõ tsok Nyõ tna teta Nyõ. Tawe, ‘Simaut mase oh; tse Nyõ mam hroh ro mase miwer raa roto beta.’ ”
Mazmur 45:7-8
10 Tna Allah yawe kʼTuhan Yesus u yawe,
“Tuhan; tiwya tinyi Nyõ oh mi nfen tabam refo tna natem aNyõ nfen ayoh reto ye. 11 Ayoh msya tabam refo meen marak. Menohe Nyõ kbe nhau hame wajin. Ayoh msya tabam refo meen bose tna mkair, mnan fi ratan ro bose ja mhah hri marak ye. 12 Meen Nyõ mbewakom ayoh msya tabam refo mnan fi raa mrus ratan ro bose oh, tna beak makus. Tna raa moo ratan ro tna, myum. Meen Nyõ nfen tabam msya ayoh ro tna shauk riryõn ye. Menohe Nyõ nesait ja nros tu. Nyõ nhau moof mnan si mamo snok mam hame wajin.”
Mazmur 102:25-27
13 “Nama, hre nsya Jõ mam tajoh ro tatem ati.† Yuk reto to hroh ro mase. Yesus hre mam yuk reto to, anu bhar bwe Ait ysya Yaja ybo bombra beta. Tna bombra beta kbe hartu Ait ye. Hre wea oh. Tna raa ro mamo byoh kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ ana, nbo ana.”
Mazmur 110:1
Menohe Allah yawe bo feto kʼmalaikat wAit fee. 14 Malaikat weto to, mase mfi Tuhan Yesus fee. Allah yfen ana weto to, mbis ana mno bo wAit, ana to sryan wAit. Tna Ait ybis ana mama mbet raa wAit ro kbe fri riof ro mase.
*1:1 Raa wase awya ro ykom aam refo. Menohe anu bhar bwe ait tait raa ro Ibrani ye. Tibyo tiwya ait kro agama Yahudi reto tna fo yrok smot Yesus. Tna ykom aam refo kʼraa mana wait taro ro smot Yesus ye. Som ‘Yahudi’ reto mkyas raa mana weto ye, tna mkyas agama wana ye. Som ‘Ibrani’ ja mkyas mai ro raa weto mkyas.
†1:13 Yuk reto to hroh ro mase. Yesus hre mam yuk reto to, anu bhar bwe Ait ysya Yaja ybo bombra beta. Tna bombra beta kbe hartu Ait ye.