12
Beroh smot Tuhan matak
1 Raa ro tiwya smot Tuhan to msis oh. Tna ana mhau mmat rof anu. Feto to nma, anu beroh smot Ait matak ye. Bo bawya ro mno wa bosmot ranu to, noo beak makus. Iro msya bo mkair ro anu bno to, kbe mno anu btek bwe. Feto to nno u ma. Nma, anu bros btak smot Tuhan matak mamo snok sboh rau. Nma, anu bhoh wai kʼAit mam iso ro moof. Ait yerif iso reto kʼanu oh. Mfi bo raa baro santri anya mhoh to, ana mhoh mamoʼt makit rau to, tna kbe moo bouum ro raa siwyan muumto mee kʼana. 2 Nma, anu bsu bfi fon to, bmat Yesus aran. Ait oh mi raa ro sair iso re kbe anu smot Ait tna bmo bo kʼAllah oh meto. Tna Ait oh mi kro iso ro bosmot reto kaket mnan si mamo snok mam tis rau to ye. Tiwya yhau mam tabam refo to, Ait yhar yawe kbe meen Allah yoo simaut ro mase yee kʼAit riryõn shauk bo samyoh ro Ait yasom. Tibyo Ait yajat mam ara warok, menohe Ait hrenaut fee.* Mam wore wo Yesus yhau to, raa ro mkair toni sai aran raa mame majat mam ara warok. Raa majat mfi feto to mti saban toni. Yawe kbe yasom bo mkair reto sai rof. Yajat tna fo yaut yamo yo kʼAllah. Allah hre mam ambar-tahta rAit. Tna Yesus hre su ysya Allah mam ati ro yatem ati. 3 Kbe ati ro raa mno bo ro mkair mai kʼanu fo, nnaut Yesus. Tii raa ro ja mno iro to, ana mno bo mkair mai kʼAit ye. Yesus beroh tna yasom bo weto ro mai kʼAit. Ja anu bsom bo ro samyoh weto fee, bsom bo ro mnan-nan sai. Nnaut bo reto re kbe soh anu hrowyõ to, kbe anu bitsre bosmot wanu to ma. 4 Ja anu beswan iro to. Menohe anu aro nno mamo snok nkai yaaf o nhai bo fefares. 5 Nsorni ma watum ro Allah: Mam bokom sau raa sait ykyas bo ku sme rait. Bokom far-far wefo mkyas bo kʼanu, ku wAit ye, mawe:
“Ku ajõ: Ti aro Tuhan yno bo ro samyoh mai kʼanu afo re anu brok bhar bo. Soh Ait bhah anu to, niwana ma! Kmo ma! Tna ati ro anu nno bo ro mkair, tibyo Ait yastako anu to, hrowyõ ma.”
Ayub 5:17
6 “Nnaut nwe Tuhan yno bo reto kʼraa ro Ait ksoh. Awya ro Ait ytu yawe yamo ku rAit to, soh ait retait yno bo ro mkair aro to, kbe yno bo mai kʼait riryõn afo re ait yhar yawe ye yno bo reto u ma.”
Amsal 3:11-12
7 Bo ro Allah yno mai kʼanu to, mfi bo raa mabi ja mno kukek wana. Feto to beroh kanyin sai. Soh ku wana mno bo ro mkair to, raa mabi mastako tna mai ana fea! 8 Ja raa mabi mastako kukek wana. Tna misoh ku wana, afo re ana mashana tna mari bo ro raa mabi mawe kaket. Tna anu fo ku ro Allah wAit. Feto oh mi Ait yastako anu tna yno bo mai kʼanu, afo re anu nashana ye. Soh yno feto fee, anu to ku wAit fee, menohe nfi ku ro ja fnya mabe-aba sai. 9 Soh anu bno bo mkair to, kbe bja wanu ro tabam refo mai anu fea! Tna anu heyut bmat ana. Anu bri bo ro ana mawe. Feto kbe anu bsom bo ro Allah yno mai kʼanu feto ye. Ait tait anu Bja ro yhau mam sawro rAit. Kbe anu heyut bmat Ait tna bri bo ro yawe. Bhar bwe yno feto afo re riof kʼanu. 10 Tiwya anu bja wanu mno bo mai kʼanu, tna mitsre bo ro samyoh mai kʼanu tahun baro sai, mam wore wo anu bkek fares sai. Mno bo ro ana mnaut mawe misoh anu boof. Tna anu bhau mam tabam refo fares to, Allah yitsre bo ro samyoh mai kʼanu afo re yisoh anu boof. Re kbe meen anu brok boof mnan Ait ye. 11 Bo samyoh ro Allah yitsre mai kʼanu to, ati ro anu bkai to, anu bnaut bwe bo mkair. Mno anu sraujin. Menohe raa taro bito masom bo weto mamo snok mam sboh rau. Tibyo bo samyoh reto misoh raa weto mhaf wana: Mno ana mhaf tnok tna mno re ana ksoh mno bo ro Allah ksoh ye.
12 Anu ro naa sne to; nsen nsit nros.† Far-far refo mkyas Yesaya 35:3, tna fret bo mawe, “Nisoh nhaf wanu. Nisoh bosmot wanu ro matak fefares. Nisoh kaket re matak.” 13 Anu bmo mam iso ro bosmot. Nisoh betrot iso reto, afo re anu smot Allah matak. Raa baro to, bosmot wana matak fee. Nno bo ro misoh bosmot wana mamo matak. Nisoh iso re kbe anu aro btek nwe fee. Feto re nros ntak.
14 Tomer re kbe nhau niranya nsya raa beta. Tna tomer nhau nno bo ro Allah wAit sai. Raa ro mhau mno bo ro Allah wAit sai to, mesait sai aran kbe meen mmat Allah mam rabin rAit. 15 Nhau to, kmot anya kaket. Afo re anu beta nmo mam iso ro Yesus sair tna yatmof anu reto. Nno be anu aro sikba iso reto tibyo nkai boatmof ro Allah fee. Raa ro mweh iso reto to, ana miwro raa mawat. Ana mno iro. Tibyo raa mawat kbe mkai riof fee. Ana weto mnan fi raa ro mji foo, tibyo syoh mawat mhai. 16 Nhau to kmot anya. Afo re anu aro nwyah, nus-as bo to ma. Afo re anu aro wase Allah ma. Nno be anu nnan fi Esau, ro tiwya wase Allah. Ait wase Allah tibyo yiwana bo moof ro yaja yawe ysan kʼait. Yiwana kta ro yaja yse mkah ku bum rait reto tna ynaut boit ro ifo yait sai. Yno feto yasim kta reto. 17 Esau yno bo reto. Tna fo hre ye ynaut bo ro yno. Tna yayoh yawe yaja yno bo ro moof reto kʼait. Menohe ait aro ye fri bo weto fee. Tibyo ait sraujin tna yawia. Yawia menohe aya mhau mam srau oh. Yaja yno bo moof reto kʼait fee.
Atu ro Sinai hayah tna faut ro Sion to hayah ye.
18-21 Tiwya Allah yoo watum rAit yee kʼMusa mam atu ro Sinai. Mam wore weto to, Allah yawe wa yawe raa aro mamo kene kait mam atu reto to ma. Allah yno tafoh mait mam atu reto, tna yno mamur hto msya foos ro msai bo mfi ye. Yno raa mari bo sau mawia fari mnan fi raa mfi saa bo feto. Tna ana mari mai ro mno ana waa toni. Mai reto mbis mawe,
“Raa msya kak bo to, aro mamo kene kait mam atu reto to ma. Soh bo aro mamo miir atu reto mair to, nme bo reto majat: Noo fraa nii kak reto majat.”
Keluaran 19:12-13
Ana mari mai reto tna mrok waa. Tibyo ana soh-soh Allah mawe ykyas bo kʼana u ma. Tiwya Allah yoo watum rAit kʼraa ro Israel to, yno bo ro msai toni weto. Musa ymat bo weto tna yhaf aya yawe,
“Jõ waa tetet thai!”
Ulangan 9:19
Menohe iso ro anu nmo no kʼAllah to, iso ro hayah. 22 Ja anu nmo no kʼAllah mam iso ro maut faut ro Sion.‡ Faut ro Sion fret bo mawe iso ro tna. Yesus ysair iso ro tna mkah bo anu bmo bo kʼAllah. Sion to mnan fi Yerusalem ro mhau mam Sawro ro Allah. Tna anu nmo kait no kʼAllah ro yaam to, ro yhau mam sawro rAit. Anu nmo mam iso reto oh. Anu nmo no kʼmalaikat msis-sas. Malaikat weto hre su tna simaut mase. 23 Anu nmo mam iso reto tibyo anu nmo raa mkbair ro Allah wAit to. Anu fo ku wAit ro masom. Anu nsom wanu to, Allah ykom mam sawro rAit oh. Kbe meen anu nhau nsya Ait su mam sawro rAit. Anu nmo no kʼAllah oh. Ait oh mi meen yoo safo mana ymit kʼraa beta. Anu nmo raa mkbair sau su nsya raa wAit ro mhai wia matim; raa ro Ait yisoh mhaf wana moof mnan si, aro mabut fee. 24 Anu nmo no kʼYesus oh. Ait ybo Bosi ro Tna reto matak mkah mees rAit. Tibyo yros susai ykyas bo ysya Allah tna ysya raa wAit ye. Tiwya Habel raa mame yajat ye. Tna mees rait frok ye. Kejadian 4:10. Menohe mees ro Yesus ysan to, mafer moof miwer: Yesus yhai afo re Allah yyon iro wanu.
25 Nri bo ro Allah yawe kʼanu. Niwana ma! Musa tait raa ro tiwya yhau mam tabam refo sai. Tii ait ykyas bo ro mbam Allah kʼraa. Menohe raa miwana bokyas ro Allah reto. Tibyo bo ro mkair mama mai kʼraa weto. Mfo refo Kristus oh mi Raa ro ykyas bo ro mbam Allah kʼanu. Ait ybam sawro ro Allah yroh yama. Feto kbe nri bo ro Ait yawe. Haberek kbor kʼAit ma, be kbe bo ro mkair toni mama mai kʼanu. 26 Tiwya Allah ykyas bo mam atu ro Sinai tna tabam mrok mnah. Tna mfo refo Ait ysi yawe,
“Meen Jõ tno tabam refo mnah u ye, tna msya ayoh skes mnah ye!”
Hagai 2:7
27 Yawe yno tabam refo mnah u. Yawe kbe meen yno mnah toni tibyo bombra ro yfen mam tabam refo beta marak. Tna bo ro meen mhau mawyõs aran kbe mhau. ⌞Reto bo ro tii ysi kʼanu, raa wAit ye.⌟ 28 Meen anu bmo bhau mam sawro ro Allah yamo Raja ybo to. Tna sawro ro anu bhau reto to, mhau matak hame wajin. Feto to nma oh, anu byoh asik mase kʼAit tna heyut bmat Ait, tna waa Ait ye. Soh anu bbaut Ait kaket oh meto, kbe Ait yhaf mnan. 29 ⌞Tiwya tinyi Musa yawe,⌟ “Allah tait yatak toni ynan fi tafoh ro mait bo mkak.” Ulangan 4:24.
*12:2 Mam wore wo Yesus yhau to, raa ro mkair toni sai aran raa mame majat mam ara warok. Raa majat mfi feto to mti saban toni.
†12:12 Far-far refo mkyas Yesaya 35:3, tna fret bo mawe, “Nisoh nhaf wanu. Nisoh bosmot wanu ro matak fefares. Nisoh kaket re matak.”
‡12:22 Faut ro Sion fret bo mawe iso ro tna. Yesus ysair iso ro tna mkah bo anu bmo bo kʼAllah.
12:24 Kejadian 4:10.
12:29 Ulangan 4:24.