6
Paulus ysya Timotius mkah armato ro Tuhan
1 Amu mbewok nkah armato ro Allah su nsya anu. Amu nkyas watum refo kʼanu nwe, “Anu fri boatmof rAit oh to. Tna boatmof reto to, nbo sibosom-bosam sai to ma!” 2 Tii mam aam ro nabi Yesaya to, Allah ykyas wore wo Ait ysan riof kʼraa. Yawe:
“Mam wore wo Jõ ksoh tawe tatmof anu to, Jõ tari bo ro anu skabuk. Mam ati ro Jõ ksoh tawe tno riof kʼanu to, Jõ tama tban anu.”
Yesaya 49:8
Tna amu mbewok nwe kʼanu nwe, “Nri oh: Allah siwyan oh yawe yatmof raa. Masno ro tii yawe ysan riof kʼraa to, mfo refo mama oh. ⌞Ait yno iso reto oh.”⌟ 3 Amu mbewok nkah armato ro Allah rAit to, ja amu nno kaket. Amu nno bo ro moof sai, afo re raa mmat tna ksoh mawe smot Yesus ye. Mfi bo amu nno bo ro mkair to, kbe raa mkyas-kas amu. Tna ati ro amu nkyas Yesus yasom to, kbe raa hawe bo mari. 4 Amu mbewok fo raabis ro Allah. Nmat bo ro amu nno, afo re anu beta nhar nwe amu ksoh nno bo wAit sai. Bo bawya ro Ait yawe to, amu nri tna nno: Ti aro amu mbewok nsom bo ro samyoh. Ti aro bo ro mkair-kar mbtek mai kʼamu. Bo ro msai mama mai kʼamu, tna amu beroh nno bo ro Ait yawe. 5 Tii raa moo too mmok amu ye. Tna ti aro-aro to, raa mfot amu, mbu mam bui mato. Raa hafrah bo ro amu nwe ye tna mno raa mafa. Amu ja nkah bo mawat, tna njin kaket fee. Tna boit ro niit mnan fee ye. 6 Bo weto mai kʼamu menohe amu ja nhau nhaf moof sai: Amu nhau nto mboh sai ye, tna amu mur-mur nri tna nhar bo ro Allah yawe. Tna amu nhau nno bo ro moof sai kʼraa. Tna mam wore kair mama mai kʼamu to, amu kanyin sai. Har ro Tuhan mjin mam amu nhaf wamu ye. Tna amu ja natmof raa ye, mkah srau ewok fee; mkah srau sau sai. 7 Amu mbewok ja nkyas watum ro Allah: Amu nkyas bo mabo yum oh. Tna Allah yatak rAit mhau kʼanu. ⌞Raa ro byoh mamus amu.⌟ Menohe amu fo nhau nhaf moof sai bamu. Amu nhau nno bo ro Allah yawe sai. Amu mbewok nhau nhaf moof sai bamu. Reto mnan fi 'sbe' ro Allah yse kmot wa amu. Tna reto mfi bo sbe ro bewas wa bokyas ro mkair-kar ja raa mkyas mai kʼamu. Amu nhau nhaf wamu moof to, reto mban wa raa ro mhoh byoh mama. 8 Ti aro to, raa miwana bo ro amu nwe. Ti aro raa maun amu mawe amu fo besruf raa sai. He mfe; amu ja nkyas bo abyõ sai, nkyas bo mabo yum oh. Fyi-fya sai raa mamus amu to, ⌞amu mbewok ja nri bo ro Allah yawe tna nno sosor.⌟ Raa taro mawe amu fo noof. Raa taro bibi amu. 9 Amu raa ro nsom marak. Raa taro wase amu. Menohe raa taro mnaut mawe amu raa ro nse. Rabu wawa raa kmo amu. Ana saim mawe kbe mame amu njat. Menohe mamo snok mfo refo amu mbewok nhai fefares. Bo ro samyoh weto sor mai kʼamu. Menohe amu nhau naam sai bamu fares mefo. 10 Bo mno amu sraujin ye, menohe ja amu simaut fares ye. Amu fo raa kinyah sai, ro nse bo kebet sai. Menohe Tuhan yoo bohar rAit ysan kʼamu mbewok. Bohar reto mnan fi bo satoh ro mabyoh maut. Amu ja nkyas watum ro Allah reto kʼraa mawat. Amu nsan bo satoh refo saim kʼraa mawat oh meto. Tibyo ana beta masen bobot. Amu nse bombra aro fee. Menohe amu fri bo ro moof mbam Tuhan. Reto moof miwer toni sai.
Nrat su nsya raa ro wase Allah to ma
11 Raa wamu ro nhau mam kota ro Korintus; riwai amu mbewok nkyas bo abyõ sai. Amu nkyas feto afo re anu nhar amu nhaf srau wamu. 12 Amu noo nhaf wamu mbewok nee kʼanu oh. Menohe anu to noo nhaf wanu nee kʼamu fee. 13 Jõ tkyas bo refo kʼanu mfi fo anu beta ku wojõ ro jõ tatmof. Jõ ksoh tawe anu noo nhaf wanu nee kʼamu si ye.
14 Raa ro smot Yesus fee to, nno irat ranu nsya ana to matak ma. Raa ro ja mari bo ro Tuhan yawe, tna msya raa ro ja mno bo ro mkair-kar to, ewok weto to mnan anya fee. Raa ro mhau mam kek ro Tuhan to, mhaf wana sau su msya raa ro mhau mam wore wo mamur to fee. 15 Kristus yhaf rAit mnan anya msya Belial fee.* Belial to mai ro Ibrani, mawe 'ro mkair'. Mam bokom ro bose roto taro, soh raa mkyas Iblis to, ana mtu yasom rait Belial. Yhaf rAit hayah sai. Feto ye raa ro smot Kristus ja mhaf wana to mhau hayah msya raa ro smot Ait fee. 16 Berhala msya bo ro tabam ja raa skabuk to hayah. Tna Samu ro Allah reto hayah. Mfo refo anu beta fo haberek bmo samu ro Allah yhau oh meto. Allah tait Allah ro yaam.
Tiwya Tuhan Allah yawe,
“Meen Jõ thau su tsya raa woJõ. Jõ oh mi tesait thau tatam ana. Ana weto meen smot Jõ. Tna kbe ana mamo raa mana woJõ.”
Yehezkiel 37:27
17 Feto to Allah yawe,
“Tufrok mbam raa ro wase Jõ. Nhau su nsya ana weto ma. Nbo bo wana ro mkair aro ye to ma. Nno feto tna Jõ thaf reo to, titrah thaf tawe Jõ ksoh anu nma no kʼJõ.”
Yesaya 52:11
18 Tuhan Allah tait Raa ro yase ybo bombra beta. Tna Ait yesait ykyas yawe,
“Nno feto tna kbe Jõ tfi anu Nja ranu ye. Tna kbe anu nfi ku sme woJõ msya ku ro ano woJõ ye oh meto.”
2 Samuel 7:14
*6:15 Belial to mai ro Ibrani, mawe 'ro mkair'. Mam bokom ro bose roto taro, soh raa mkyas Iblis to, ana mtu yasom rait Belial.