2
1 अ परमेस्वरए उमिनताव ङाबाबुज़ार, जे पाप मादान्याए जूँनी आव पाँर सर्द ङायाचिज़्या। खाली सुवाराए कैताराक पाप जेदोकिन परमेस्वर गेबाबुस पाँद्याज़्याव गेत्याला तोबो लिज़्या — नो ओखत माल्यो छैंव येसु ख्रीस ज़। 2 नोए गेपापए सजा ओल ज़ फो·द्याद परमेस्वरस सखैसिज़्याव। नो गेलाई वाज़ माःक, मानुवाताव मिँ भरिरालाई मनी ज़।
परमेस्वरए ओपाँ दाज़्याव मिँ
3 परमेस्वरए ओपाँ गेदोकिन वाज़ ‘परमेस्वरलाई ङासरेस्के’ लिन्या गेसैंज़्या। 4 ओयाःए वाज़ ‘परमेस्वरलाई ङासरेस्ज़्या’ है लिज़्याव मिँए परमेस्वरए ओपाँ ओमादोकिन नोस साचो पाँ माले, धुत वाज़ लिज़्या। 5 खाली परमेस्वरए ओपाँ दाज़्याव मिँए ते परमेस्वरए ल्योदाङाव ओमया ओसयो·धुव मिताव ज़ लिज़्या। है जैद परमेस्वरस गेखैव गेमाखैव ननी ज़ रैंःज़्या। 6 है जैद जोए ‘ङा परमेस्वरस खैव ङालिज़्या’ है उलिकिन नो मिँए ख्रीसए ओदोज़्याव मिताव ब दाव परिके।
पलाँवल लिज़्याव मिँ
7 ङायुँलाव ङानैं ङामेंर, आव सर्द ङायाचिज़्याव, जेमाथैताव साःरो पाँ माःक। ङ़ादाकिनकाव जेस लिज़्याव एकतार जेथैज़्याव पाँ ज़। 8 हैदी ब ङा ङासर्ज़्याव पाँ ते साःरो लिज़्या। आव ख्रीसए ओक्याँत रैंःद ले, जेक्याँत मनी रैंःज़्या, काराव ल्यो ताकिन नो पाँए ज़ चुम चुमोलाई सम़ैद पलाँ जैहुक्यो। 9 है जैद जोए ‘ङा नो पलाँवल ङालिज़्या’ है लिद परमेस्वरए उमिनताव ओनैंलाई ओसोकिन, नो मिँ आःपै चुम चुमोल ज़ लिज़्या। 10 जोए परमेस्वरए उमिनताव मिँलाई मया दोज़्याव, हो पलाँवल ओतावए नोलाई कान्त ज़ पर्दप्न्या ओछ्यास माले। 11 नैंलाई सोज़्याव मिँ चुम चुमोल परिद ‘आदा ङाबाज़्या’ लिन्या ब मासैंव। नोलाई माचाव ओय़ेनए मुन्दुक्यासो जैद नैव।
मानुवाताव पाँरादा युँ माझाःन्या
12 जे बाबुज़ारालाई सर्द ङायाचिज़्या।
ख्रीसए उमिनए जूँनी परमेस्वरए जेपाप क्याल्द्याचिक्यो।
13 जे बाबुरालाई सर्द ङायाचिज़्या।
जे भाःकिन ज़ लिज़्यावलाई जेसरेस्ज़्या।
जे धापाज़ाकावरालाई सर्द ङायाचिज़्या।
जे सैतानलाई हारैद जेनै।
जे ज़िम्ज़ा ल़ुज़ारालाई सर्द ङायाचिज़्या।
जे स्वर्गताव जेबाबुलाई जेसरेस्ज़्या।
14 जे बाबुरालाई सर्द ङायाचिज़्या।
जे भाःकिन ज़ लिज़्यावलाई जेसरेस्ज़्या।
जे धापाज़ाकावरालाई सर्द ङायाचिज़्या।
परमेस्वरए ओपाँ जेयुँल बास ओदोवए
जे थ॰रिद सैतानलाई हारैद जेनै।
15 जे आव मानुवाताव पाँरादा जेयुँ ताझाःच्यो। नितावदा उयुँ झाःज़्याव मिँए ओमया परमेस्वरए ल्योदा माले। 16 आव मानुवाताव पाँर आवर ज़ — जोत ब युँ मानैधुन्या, प़ाइँत ज़ मी तून्या, नैं मेंकिन कातानी ङाघ्योःके लिद युँ थू जैन्या। आव स़ोम्लो पाँ परमेस्वरनी हुव माःक, मानुवाताव पाँ ची। 17 आव मानुवा ते तछा ओपाँरास ज़ खेम्रिज़्या। परमेस्वरए उयुँलाव मिताव य़ेन दोज़्याव मिँ ते खर्क ज़ खेम्न्या माले।
ख्रीसकिन तँदाङावर
18 जे परमेस्वरए उमिनताव ङाबाबुज़ार, खेम्न्या बेला यो·नाद ले। हो बेला ओमाहुद ज़ ख्रीसकिन तँदाङाव हुरिज़्या लिन्या ब जेसैंज़्याखेहो। आज्याल ब नितावर कुधु ज़ ताधुकेर। है जैद आव बेला ओखेम्नाव ननी ब रैंःज़्या। 19 नो ख्रीसकिन तँदा जैसिज़्यावर गेनी हाइसिद बावर ज़। खाली नोर गेस साचो लिज़्यावर माःक ओल्यो। गेस साचो ल्योर ताकिन हाइसिद माबाखेरहो। है जैद याबावए नोर गेसकावर माःक ओल्यो लिन्या रैंःके।
20 जे ते नितावर माःक। जे ते ख्रीसनी छैंव पुरूस दैद साचो पाँ जेसैंज़्या। 21 आव पाँ जेमासैंए लिद ङासर्ज़्याव ते माःक, जेसैंज़्या लिद ज़ ङासरो ची। साचो पाँनी धुत मापुलुसे लिन्या ब तामेंःच्यो। 22 ‘येसु परमेस्वरए खतैद उपरींव ख्रीस माःक’ है लिद धुत पाँज़्याव सु? नो ‘येसु स़ोनो परमेस्वरनी ज़ा बाबुनी माःक’ है लिज़्याव ख्रीसकिन तँदाङाव मिँ ज़ सानी। 23 जोए ‘येसु परमेस्वरए ओज़ा माःक’ है लिज़्या, नोस ओबाबु परमेस्वर ब माले। जोए ‘येसु परमेस्वरए ओज़ा ज़’ है लिज़्या, नोस ओबाबु परमेस्वर ब लिज़्या। 24 जे ते ङ़ादाकिन ज़ जेथैव पाँलाई जेयुँल नैच्यो। नो पाँर जेयुँल जेनैकिन परमेस्वरए ओज़ा स़ोनो गेबाबु परमेस्वरसकावर तान्या जेले। 25 नो ओज़ा ख्रीसए ओल ज़ ‘अजम्बरी जुनी ङायाचिरिज़्या’ लिद य़ाका याद नैसिउ।
26 जेलाई बले·व पैंज़्यावराए ल्योनी कसाराक झुकिर्या लिद आव पाँर सर्द नैद ङायाचिए। 27 निताव उलिदी ब नो जेदैव परमेस्वरए उपुरूसए जेयुँल बास ओदोवए सुए ज़ जेलाई पैव मापरिए। होए साचो पाँ भरी ओल ज़ पैचिज़्याव, धुत पाँ मापैचिउ। है जैद होए ओपैचिउ मिताव ज़ जे ख्रीसए ओपाँत लिच्यो।
परमेस्वरए ओज़ार तान्या
28 है जैद बाबुज़ार, जे ख्रीसए ओक्याँत ज़ धिद ल्यो ताके। हो ताकिन ची फरी उहुव बेलाक होए ओङ़ाक लाज मोर्नो तान्या गेमाले। 29 ख्रीस छैंव लिज़्या लिन्या जे ज़ जेसैंज़्या। है जैद परमेस्वरए ओङ़ाक चाव य़ेन दोज़्यावर परमेस्वरनी जर्मिउ ओज़ार ताज़्यार लिन्या ब सैंव ताके।