4
Satan Ga Lok Tong Ne Iesu
(Mk 1:12-13; Lu 4:1-13)
1 * Ib 2:18; 4:15Melemu Loroonan Kaala ga lam ka ne Iesu uto at lamatbin kusu ne Satan na lok tong i. 2 * Pas 34:28; Lur 3:1-7Melemu at lumun anan teren at lavanuet sangaun aleng kangking la kanimin, neni ga roxo ba. 3 Satan ga vot pasa i la ga lok tin, “Mo do nenu ne Nitna ne Moroa, una tong i ri na laxanuat la dina vee xongkide.”
4 La ne Iesu ga vorang i rin keretna, “Lovoang Kaala i tong i do,
‘Laradi kopmen na rooro xusuk mun at loxongkide, ketla neni i rooro at levelinga axap at ne Moroa ik lok keneng at Lovoang Kaala.’ ” Lal 8:3
5 Melemu ne Satan ga lok ka ne Iesu uto at lemenemen kaala, Jerusalem la ga vaxaru li i ro vana at langkut at loogu laplavang. 6 La ga lok tin, “Mo do nenu ne Nitna ne Moroa, una los si ukopok, mila Lovoang Kaala i tong i do,
‘Moroa naba lok li lubung angelo ren, la dinaba rebeng aurur u mi lengkikngen di, kusu tuuat noxo sev asongot tekot at luxangkedek taram.’ ” Sam 91:11-12
7 Iesu ga lok tin keretna, “Lovoang Kaala i tong box i do,
‘Nemen uta lok li ne Moroa, Leeme Silok taram at loklok tong.’ ” Lal 6:16
8 Melemu ne Satan ga lok ka ne Iesu uto vana at lakaana ga nemen kasep pana la ga lox ase i mi laramenemen axap at na lavatbung menemen la lisisinang atdi. 9 La ne Satan ga lok tin, “Anaa axap lempanga anaba raba u min mo do una xis tiktikbu mi luvatgulom taram de melamgo rak la una lotu saparav ia.” 10 La ne Iesu ga lok tin, “Satan! Pas kaxat basinge ia. Lovoang Kaala i tong i do,
‘Una lotu saparap ne Moroa, Leeme Silok taram la neni xusuk mun una mumu asu i.’ ” Lal 6:13
11 * Ib 1:6,14La ne Satan ga on basinge i, la lubung angelo diga vot la diga lox alolos ne Iesu.
Iesu Ga Vaxaru Kaxat Lugugu Ren To Galili
(Mk 1:14-15; Lu 4:14-15)
12 * Mk 6:17; Lu 3:19-20Se ne Iesu ga ronga i do ne Jon mo diga lok li i at loogu xokoxo, neni ga vas kaxat bilong uto Galili. 13 * Jo 2:12Neni goxo nemen to Nasaret, ketla gat pas la ga nemen to Kaprenaum. Na lemenemen gak lok saparap lavatdan kis Galili at lapdopdo at lunep kangka Sebulon la Napitali. 14 Neni ga nemen to Kaprenaum kusu ti lox asoorun levelinga ne Moroa ga vaase asu i at leeme vapaase ali ne Aisaia ga tong i do,
15 “At lenep kangka Sebulon, la lenep kangka Napitali, langas uto at laras mo ik lok, la neni bok lenep kangka saparap Joridan, la lenep silok Galili, na ik lok la limixin kopmen di me Judaia di nemen go. 16 La limixin at na levennep mo dik lok at lamain, dinaba ven langsangan laxasep at ne Moroa. La tinedi limixin labaroonan atdi gara met pam laxasep naba soosoo ridi.” Ais 9:1-2
17 * Mt 3:2Ga ruka i ap mo levenaleng ne Iesu ga vavang ti limixin keretna, “Mina leeng basinge leveloklok kakapmek atnimi, mila langas ti Linintoo no vana at laxalibet monga ira auret!”
Iesu Ga Ro Xaka Lavanuet Luvuttadi Sepsep Mat
(Mk 1:16-20; Lu 5:1-11)
18 At lara laaleng Iesu gat pas saparap lavatdan kis Galili, neni ga ven lueton. Nedu luradi sepsep mat, Saimon (laasen bok teren ne Pita) la neton laasen teren ne Endru. Duga loloa mi laxatkat to at lavatdan kis. 19 * Lu 5:1-11; Mt 13:47La ne Iesu ga lok tidu, “Ude numu, muna emu minia la nia anaba lox ase numu mi langas ti sat kaka limixin i ngan tai mo, nemu mu loloa ka lenmat.” 20 * Mt 19:27La soso mun duga on basinge laxatkat la duga emu mi ne Iesu.
21 Neni ga vas mu manga loloxon la ga ven manga lara lueton petpes, Jems mi ne Jon, lunitna ne Sebedi. Dugak lok go at lesepang eburu mi ne temen du ne Sebedi. Digak lox agagas li levengkatkat atdi. La ne Iesu ga ro xaka du. 22 La soso mun duga on basinge lesepang eburu mi ne temen du, la duga emu mi ne Iesu.
Iesu Ga Anasa Ga Vavang La Ga Lox Aroo Limixin
(Lu 6:17-19)
23 * Mk 1:39; Mt 9:35; Gu 10:38Iesu gat pas at lengkot axap Galili, ga anasa limixin mi levenanasa at ne Moroa ro xeneng at laraogu singising atdi. La ga vavang mi Lagale Lavavang mumu Linintoo, la gak lox aroo limixin basinge laxanasen anmeres axap. 24 * Mk 6:55Levelinga mumu ne Iesu ga epeseves keneng at lenep silok axap Siria. Kuren la limixin diga lok kaka nedi luvuttadi digak meres mi levenasen anmeres axap, la nedi bok diga suma levesongsongot silok, la nedi luvuttadi mi lubunggas ga suxuna di, la nedi diga ruuna lanmeres diga so asen i do lobomet, la nedi labantuxu atdi ga molo axap. La ne Iesu ga lox aroo nedi axap. 25 * Mk 3:7-8Buaang nedi limixin diga mumu asu i, nedi boro Galili la boro bok Dekapolis, la boro Jerusalem, la Judaia, la boro bok at lenep silok Perea.