Lenavolo Lovoang Kaala Maxat La Sam Epesas 1

Epesas

Lovoang At Ne Pol
Ti Limixin Nunu To Epesas

Levelinga Loklox Axasep

Lamaares 62 A.D.

Pol gak lok at loogu xokoxo to Rom. Neni ga malagan i na lovoang tinedi limixin to Epesas, kusu nedi diba utus avot be i la melemu nedi limixin nunu mo diga nemen to at lentaba levenmenemen silok dinaba exes box i. Epesas neni lemenemen doxodok to at lenep Asia. Mo limixin diga nemen go diga vavara aleng lapnovos silok la diga raba aleng lorooro atdi ti lotu parap lomoroa xaxarang laasen teren ne Diana (Atemis). Buaang atnedi na limixin nunu boro Epesas kopmen di me Judaia, ketla kusuk mun goxo buaang nedi lentaba me Judaia mo diga nemen eburu minedi. Pol ga anasa nedi do keneng mun at ne Iesu, limixin me Judaia la nedi kopmen di me Judaia di ru buru nunuan. At na levenaleng limixin axap dina ru buru nunuan eburu mi ne Karisito la dina lok ngan mun legesa binam tadi.

Lengkot silok keneng at na lovoang

1:1-2 Lurutu kaxat at levelinga.

1:3–3:21 Lorotoro ri limixin la lununu atdi saparap ne Iesu.

4:1–6:9 Loklok at lorooro maxat.

6:10-20 Atana esep at lenep at Leeme Silok.

6:21-24 Pol ga lox axap levelinga ren.

Lavapaase Axasep

1 *Nenia ne Pol, lun pavang at ne Iesu Karisito. Moroa ga soxolik ka ia ri na lugugu.

Nia a malagan na levelinga rinemi limixin nunu boro Epesas, mi nunu ruturun keneng at ne Iesu Karisito. 2 *Letaba nabalamu mi lenmila rinemi boro at ne Temen dik la Leeme Silok ne Iesu Karisito.

Leveloklox Anarong At Loroonan Kaala Ri Limixin Nunu

3 *Nedik ata emi asu mi ne Moroa, Temen ne Iesu Karisito, Leeme Silok atdik. Neni gara lox anarong pam nedik mi leveloklox anarong axap boro vana at laxalibet tinedik limixin at ne Karisito. 4 *Ni ga soxolik ka nedik mumu ne Karisito, avot ti luruntudum li at lavatbung menemen, kusu dik tana dadat basinge laxakapmek la tanan manton tino at lemeren. Neni i umsu mi labalamu la kerepmo, 5 *ga paase ali do ne Iesu Karisito naba lok tomtom buru ka nedik axap ngan luvutnitna, i ngan lomomo la lodoxoma ren kuren.

6 *Kuren la nedik axap ata emi asu mi ne Moroa ri letaba nabalamu ren i nunuan aleng. Ni ga raba gamasa dik min, maxeneng at lugugu at ne Nitna, mo ne Moroa i balamu i. 7 *Ni ga met la lada ren ga sen su kusu ti un ka amlong dik, la kusu ne Moroa naba doxoma xepe leveloklok kakapmek atdik. Kerepmo ne Moroa ga lox asuusu letaba nabalamu ren i silok aleng, 8 mo ni ga lox aumsu dik min eburu mi lodoxoma avukat la lakleklen teren.

9 *La at lavavara ren ni ga tong axasep dik mi lodomdoma ali ren, mo ga nemen alipe la ni ga doma ali i do ne Karisito ni lavasuun teren. 10 *La at laaleng mokmokso ne Moroa naba lox epovo nom lodomdoma ali la naba sat tomtom buru ka lempanga axap, mo ik lok to vana at laxalibet la ik lok bok nade xopok at lavatbung menemen, kusu ne Karisito naba nemen ngan Lamgomgo atdi.

11 *Maxeneng at ne Karisito, Moroa ga soxolik ka dik do ateren. Ganoxa ni ga tong li i xuren, la na i epovo mi lodomdoma ali at ne Moroa, mo ik lok lempanga i ngan lodoxoma la lavavara ren. 12 Ni ga lox i xuren kusu nema avot leme Judaia maga nunu at ne Karisito, manaba emi asu mi ne Moroa la mana lox aurut laasen teren.

13 *La nemi bok miga ravasu ngan limixin at ne Karisito at loxonaleng miga ronga xisip levelinga ruturun teren. Ni Lagale Lavavang i vaase axasep loklox arooro ri limixin. Ap mo loxonaleng miga ruka lununu saparap ne Karisito, Moroa ga lok li nimi ngan limixin teren la ga raba nimi mi loklok katling teren. Ni Loroonan Kaala, mo ne Moroa ga paase ali min ti limixin teren. 14 *Na Loroonan Kaala i lok ngan lampinebeng ti loklox arooro atdik kusu nedik tanaba lok ka mo leventamtaba ne Moroa gara vaase ali vam min ti limixin teren. La nabak lok kuren se at laaleng ne Moroa naba lox epovo loklox arooro ridik. Ata emi asu mi ne Moroa i silok aleng.

Lisingising At Ne Pol

15 *Nia aga ronga levelinga mumu lununu atnemi maxeneng at Leeme Silok, ne Iesu, la labalamu atnemi ri limixin axap at ne Moroa. 16 *Kuren la, nia xopmen na xap korop ti tong loklox avukat ti ne Moroa mumu nimi. La at levesingising tarak a doma mumu nimi, 17 *la a sing amisik lagale lo Moroa, ne Temen Leeme Silok atdik, Iesu Karisito, ti song araba nimi mi Loroonan teren, mo naba suxa nimi mi lodoxoma nunuan la laxasep kusu nemi minakleklen avukat ne Moroa. 18 *Nia a sing bok ne Moroa do lodoxoma atnemi na rem suang kusu mina xasep ap mo leveloklox anarong, neni ga ro ka nimi ri lok ka i. Mo leveloklox anarong i ngan lapnovos silok i lox avukat aleng la i nemen tangais limixin axa ren.

19 *La minaba xasep ap mo lolos teren i silok aleng, mo i lok tooro nedik limixin nunu. Mo lolos i ravasu at lolos silok at ne Moroa, 20 *mo ni ga lox asu i ap mo laaleng neni ga lox axatu ne Karisito basinge lanmet la ga vaxaxis i saparap lekngen tino ro vana at laxalibet. 21 Neni ga lok li ne Karisito tim gomgonga leventoonan eburu mi lubungangelo la luvuttadi amgomgo atdi la limixin lolos kerepmo. Laasen teren i silok ti levenasen atdi, la ik lok kuren at na levenaleng la nabak lok bok kuren ap mo levenaleng mo naba vot. 22 *Moroa ga lok li lempanga axap maxopok at luxangkedek at ne Karisito la ga lok li i ngan Lamgomgo at lempanga axap at lotu. 23 *Limixin at lotu nedi di lok ngan labantuxu at ne Karisito, mo i nemen ampana atnedi axap la i nemen ampana bok at lengkot axap at na lavatbung menemen.