2 Pita
Lovoang Sepsev Agepura At Ne Pita
Levelinga Loklox Axasep
Lamaares 66 A.D.
Anai ni lovoang sepsev agepura at ne Pita ga malagan i ri limixin nunu mo diga nemen tangtagap at lengkot axap. La nai lovoang ni lempapaase aronga rinedi atla buaang nedi luvuttadi loklox ase xaxarang mo digat pas tangtagap. Na luvuttadi loklox ase xaxarang diga tong i do, leventaangas kapmek ni i lox avukat la diga lok dola ne Iesu noxomlong bok ba. Kuren la ne Pita ga vaase axasep nedi mi lakleklen tuturun mumu ne Iesu xusu keneng at ne Iesu nedi diba tu atmatkun. Lavasuun at lomlong at ne Iesu, kopmen noxomlong soso ni i lok keretna. Moroa i vara i xusu limixin axap diba leeng avot mun be la melemu neni namlong ba.
Lengkot silok keneng at na lovoang
1:1-2 Lempapaase momo.
1:3-15 Moroa ga soxolik ka dik kusu ti ruuna ka mo lorooro ren.
1:16-21 Levempapaase at lavaeme vapaase ali do ne Iesu ni i ruturun.
2:1-22 Lavapaase aronga mumu luvuttadi loklox ase xaxarang.
3:1-18 Lempapaase mumu lomlong at ne Iesu.
1
Lavapaase Axasep
1 Nenia ne Simon Pita, lasaxaruki la lun pavang at ne Iesu Karisito.
Nia a malagan i na levelinga rinemi limixin miga ruuna xaka lununu xeneng at loklok manmanton at ne Moroa atnedik, neni ne Iesu Karisito, Laradi Loklox Arooro. La mo lununu atnimi i nunuan ngan lununu atnama.
2 * Ju 1:2La mumu mun lakleklen atnemi xeneng at ne Moroa la ne Iesu Leeme Silok atnedik, a sing do letaba nabalamu eburu mi lenmila na suu silok keneng at lorooro atnemi.
Lorotoro La Losoksoxolik At Ne Moroa
3 * 1 Pi 2:9Lolos at ne Moroa gara raba vam nedik mi levempanga axap nedik dik pakes tin ti lok kaka lorooro avolo la ti ruuna ka luruptuvuk nunuan mumu lakleklen atnedik ti ne Iesu Karisito. Ni ga ro xaka nedik kusu atak lok eburu min keneng at lisisixam la luvukat teren. 4 Keneng at na lempanga, neni gara raba vam nedik mi leventamtaba i nunuan aleng. Neni ga xaape min tinedik, kusu na leventamtaba naba beng pe nemi basinge levendoxoma xapmek at na lavatkangka la lepneves kapmek, la kusu na leventamtaba naba lam kaka nemi la minaba ruuna xaka luruptuvuk nunuan la minan manton tino xerekngan neni.
5 Neni lavasuun ba ren la mina lolos tinotno xusu minak lox epasum luvukat ukeneng ti lununu atnemi. La minak lok epasum lakleklen ukeneng at luvukat atnemi. 6 * Ga 5:22-23La minak lox epasum lavatpas adoxoma at luruptuvuk atnemi ukeneng at lakleklen atnemi. La minak lox epasum lurutu lolos ukeneng at lavatpas adoxoma atnemi. La minak lok epasum loklok manmanton ukeneng at lurutu lolos atnemi. 7 La minak lox epasum luvukat ti luvutneton nemi ukeneng ti loklok manmanton. La minak lox epasum labalamu ukeneng at luvukat ti luvutneton nemi.
8 Do mina ruuna xaka i na levempanga la dina umsu xeneng at lorooro atnemi, dinaba lok nemi la mina lox asuusu leveloklok nunuan mumu lakleklen atnemi keneng at Leeme Silok atnedik ne Iesu Karisito. 9 Ketla nege do ixo ruuna i na leveloklok nunuan, neni i lok ngan laxatli main no ixo epovo xusu neni na reven la ira domampe nga i do Moroa gara gos adadat pam i basinge laxakapmek teren megano.
10 Kuren la luvutnetak mi luvurinuk, mina lolos kusu mina doma amuat lorotoro la losoksoxolik at ne Moroa rinemi. Do mina lox i na, kopmen tinotno mi noxo subu basinge lununu atnemi. 11 Do mina mu asu i na langas, lumusmaragu naba rem suang tinotno xusu mina vubeles ukeneng at Linintoo ik lox amisik. Neni Linintoo at Laradi Loklox Arooro atnedik, Leeme Silok ne Iesu Karisito.
12 * Ju 1:5Kuren la nenia anabak lox adoxoma amisik nemi ri na langas, keke i do miraklen pam i la mira tu atmatkun keneng at luruturun miga ruuna xaka i. 13 * 2 Pi 3:1Nia a lok do, ik mokso mun tia xusu anak lox axatu levendoxoma atnemi mi na levempanga at na levenaleng nenia move a rooro. 14 * 2 Ko 5:1; Jo 21:18-19Atla aklen i do, noxo lox abao la ana on basinge labantuxu at na lavatbung menemen, ngan levelinga at Leeme Silok atdik ne Iesu Karisito ga tong taba ia min. 15 Anaba lolos tinotno xusu ana vuse xaka tangas ti lok nemi xusu minabam doma aklen ti na levempanga at levenaleng melemu at lanmet tarak.
Nema Maga Reven Lisisixam At Ne Moroa
16 * Mt 17:1-5Nema ma goxo mumu asu mun leventetere gamasa boro at levendoxoma at limixin at levenaleng maga tong asu Lagale Lavavang tinimi mumu lolos la lovotpot at Leeme Silok atnedik ne Iesu Karisito. Ketla nema maga ven tinotno lisisilok teren mi levengkatli atnema. 17 At loxonaleng ne Moroa ne Temen ga raba i mi lasinorong la lisisixam, nema mo magak lok, la maga ronga laxaka tadi ga laa boro at lisisixam silok ga vaase xeretna,
“Neni na ne Nuruk, a balamu i la a momo min!” Mt 17:5
18 La nema xa maga ronga mo laxaka tadi ga ravasu boro vana at laxalibet at loxonaleng nema magak lok eburu min to vana at lakaana xaala.
19 La nema ma nunu rinotno at levelinga at lavaeme vapaase ali diga paase i. I lox avukat mina ronga ka avukat na levelinga, atla neni naba lok ngan lababao i soosoo at laxanimin la ira se at labarakoxot, la naba lok ngan lavatpentian i soosoo ro xeneng at lorooro atnemi. 20 La pana axap at levempanga axap, minakleklen box i do ixo epovo rinotno xusu tara naba lox asuusu lavasuun at levempapaase ali no xeneng at Lovoang Kaala mi lodoxoma axa ren atla, 21 * 2 Ti 3:16; 1 Pi 1:11kopmen tepempapaase ali ga ravasu mun at lodoxoma mene nga at taradi at na lavatkangka. Ketla lavaeme vapaase ali, diga vonon mumu mene nga Loroonan Kaala at levenaleng diga paase asu levelinga ga laala boro at ne Moroa.