147
ቢያ ባኮ ዳንዳዓ ፆኦሲም ሺኢካ ጋላታ
1 ናንጊና ናንጋ ጎዳ ጋላቱዋቴ!
ኑ ፆኦሲ ቦንቺ ጋላታ ዓይኑሞ ዓይናዺሢ ቃራኬ፤
ዒዛ ጋላቲፃ ዎዛሳያ፥ ሃሣ ኮይሳያኬ።
2 ናንጊና ናንጋ ጎዳ ዬሩሳላሜ ጊንሣ ዓካሲ ማዣኔ፤
ዒስራዔኤሌፓ ዳውሲንቲ ዴንዴ ዓሶ ጊንሣ ዒ ማሃኔ።
3 ዒኔ ሜቂ ዖዬ ዓሶ ዒዚ ዶዲሻኔ፤
ኪፆዋ ኑኡኮ ዒ ፓሣኒ ማራኔ።
4 ዦኦጋሢኮ ሚርጉሞ ዒዚ ፓይዲ ዔራኔ፤
ፔቴ ፔቴሢኮዋ ሱንፆ ዒ ጌሣኔ።
5 ናንጊና ናንጋ ኑ ጎዳሢ ዼኤፒ፥ ሃሣ ዎልቄና ዓኣያኬ፤
ዒዚ ዔራ ዔራታ ሃይማኬ ጌይንቱዋያኬ።
6 ዒኖ ሼሌዔ ዓሶ ዒዚ ቦንቺሲ ዼጊሳኔ፤
ፑርቶ ማዻ ዓሶ ጋዓንቴ ሳዓ ኬኤሪ ዻውሲሳኔ።
7 ናንጊና ናንጋ ጎዳ ቦንቺ ዓይኑሞ ዓይናዹዋቴ፤
ጎኦላ ዋርቂ ዋርቂያኣ ኑ ፆኦዛሢ ዓይናዺ ቦንቹዋቴ።
8 ዒዚ ሻኣሮ ጫሪንጮይዳ ሚጫኔ፤
ሳዖይዳ ዒርዚ ዋርቂሳኔ፤
ዹኮይዳ ማኣቲ ኬሲ ዓኣዒሳኔ።
9 ካዮ ቦዖንታ ቆሎንታም ቢያ ሙኡዚ ዒንጋኔ፤
ሙኡዚ ባይቄም ዒላታ ቁራኮ ናኣቶ ዒ ሙኡዛኔ።
10 ዒዚ ዎዛዻሢ ዶዶ ፓራሢንታ
ዖሎ ዓሶንታኮ ዎልቆ ዛጊቱዋሴ።
11 ዒዛ ዎዛሳሢ
ዒዛ ቦንቺ ዒጊጫዞንሢና
ናንጊና ናንጋ ናሹሞ ዒዛኮ ጉሙርቃዞንሢኬ።
12 ዬሩሳላሜ! ናንጊና ናንጋ ጎዳ ጋላቴ!
ፂዮኔ! ኔ ፆኦዛሢ ፑኡፒሲ ዒላሼ!
13 ዒዚ ኔኤኮ ማርሾ ካሮኮ ጋጋርዞ ዶዲሺ ካፓኔ፤
ኔ ጋራ ዓኣ ዴሮ ዒዚ ዓንጃኔ።
14 ዒዚ ኔ ዓጮኮ ዛጶ ኮሺ ማሂ ካፓኔ፤
ቃራ ዛርጌ ካፂሲ ኔና ዒ ሚሻኔ።
15 ሳዖ ፔ ቢታንቶና ዒዚ ዓይሣኔ፤
ዒዚ ጋዓ ባካ ኔጉዋዖ ማዺንቲ ኩማኔ።
16 ዼኤፖ ሻጮ ዎዺንቴ ፑኡታጉዲ ሳዓ ዒዚ ሚጫኔ፤
ሊኢሎጉዲ ላሃ ዖልኮዋ ዲቢንሢጉዲ ሳዓ ላኣላኔ።
17 ሻጮ ቃንፆጉዲ ሳዓ ዒዚ ዲኢኒሻኔ፤
ዬያ ኬዳ ሻጮ ቤርታ ዖኦኒያ ጫርቂ ዔቃኒ ዳንዳዑዋሴ።
18 ዬካፓ ዒዚ ዓይሥሢ ዓይሣኔ፤
ዬይ ላኣዳዺ ዴይ ዓኣ ሻጫ ዓልቃኔ፤
ዢባሬ ዒዚ ዢባርሺሴም ዋኣሢ ዒኢፓ ጎዓኔ።
19 ፔ ቃኣሎ ያይቆኦቤ ናኣቶም
ዒዛኮ ዎጎንታ ዳምቦንታ ዒስራዔኤሌም ፔጋሲ ዔርዛኔ።
20 ዬያ ቢያ ዒዚ ሜሌ ዓይጎ ዴሬማኣ ማዺባኣሴ፤
ዬያታ ዒዛኮ ዎጎ ዔሩዋሴ።
ናንጊና ናንጋ ጎዳም ጋላታ!