31
ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ
ሜቶ ዎዴና ፆኦሲ ጉሙርቂ ሺኢቂንታ ሺኢጲሢ
1 ናንጊና ናንጋ ጎዳሢዮ!
ኔኤኒ ታኣኮ ፑኖ ካያሢ ማዓንዳጉዲ
ታ ኔ ባንሢ ሙኬኔ፤
ዬያሮ ታና ቦርሲሲፖ፤
ኔኤኮ ፂሉሞና ታና ዓውሴ።
2 ዋዮ ኔኤኮ ታ ባንሢ ማሂ ታኣም ዋይዜ፤
ዑካዺ ሙኪ ታና ዓውሴ፤
ታኣኮ ጌኤቂንቲ ዔቆ ላላሢ ማዔ፤
ታና ዓውሳኒ ታኣኮ ዶዶ ዋርዲዮ ቤዛሢያ ማዔ።
3 ኔኤኒ ታኣኮ ዓኣሺንቶ ዋርዲዮ ቤዛሢኬ፤
ኔኤኮ ሱንፆሮ ጌዒጋፓ ታና ዔኪ ዓኣዼ፤
ታኣኒ ዓኣዻንዳ ጎይፆዋ ኔ ታና ቤኤዜ።
4 ኔኤኒ ታኣኮ ፑኖ ካያሢ ማዔሢሮ
ታ ሞርካ ታኣም ዓኣቺ ፒሬ ፒራሢዳፓ ታና ኔ ቶሊሴ።
5 ጎኑሞ ፆኦሲ ማዔ ናንጊና ናንጋ ጎዳሢዮ!
ታኣኮ ሼምፓሢ ታ ኔኤም ሃሼኔ፤
ታና ኔኤኒ ዓውሴ። ሉቃ. 23፡46።
6 ዔኤቢ ፓሡዋያ ማዔ ሜሌ ፆኦዞም
ዚጋዞንሢ ቢያ ኔኤኒ ዒዒፃኔ፤
ታኣኒ ጋዓንቴ ኔና ጉሙርቃኔ።
7 ኔኤኮ ናንጊና ናንጋ ናሹማ ታና ዎዎዛሳኔ፤
ሚርጌናኣ ታ ዎዛዻኔ፤
ሜታሢ ኔ ታኣኮ ዛጌኔ፥ ዋኣዪፆዋ ታኣኮ ኔ ዔራኔ።
8 ሞርኮም ዓኣሢ ኔ ታና ዒንጊባኣሴ፤
ጋዓንቴ ኔኤኒ ታኣም ዳልጊ ጎይሢ ጲሼኔ።
9 ናንጊና ናንጋ ጎዳሢዮ! ታኣኒ ሜቶይዳታሢሮ
ታና ሚጪንቴ፤
ዓኣፓ ታኣኮ ዖዪፆና ላቤኔ፤
ሼምፓሢንታ ዑፆንታ ታኣኮ ዶጬኔ።
10 ታኣኮ ናንጋ ሜቶና፥ ሌዓኣ ታኣኮ ዚኢሊንቲሢና ጋፔኔ፤
ሜታ ታኣኮ ሚርጌሢሮ ዎልቄ ታኣኮ ባይቄኔ፤
ሜጌፃኣ ታኣኮ ላቤኔ።
11 ታኣኒ ታኣኮ ሞርኮም ሚኢቺ
ታኣኮ ዓሺኖማኣ ዲቃሣያ
ታና ዔራ ዓሶም ታኣኒ ዒጊቻያ
ጎይፃ ታና ዔያታ ዴንቃዖ ታ ጋይቴ ዓዓኣሺንታኔ።
12 ዓዳ ሃይቄ ዓሲጉዲ ታኣኒ ዋሊንቴኔ፤
ሃይቄም ኬኤሮና ቦኦቆና ዖቲናጉዲ ታ ማዔኔ።
13 ሚርጌ ዓሲ ካሽካሻንቴ ታኣኒ ዋይዜኔ፤
ጉቤ ባንፆና ዒጊቻያ ማዔኔ፤
ታና ባይዛኒ ዔያታ ዎሊና ጌስታኔ፤
ዎዻኒያ ዎላ ዔያታ ዞርታኔ።
14 ናንጊና ናንጋ ጎዳሢዮ! ኔኤኒ ታኣኮ ፆኦዛሢኬ፤
ታኣኒ ኔና ጉሙርቃኔ።
15 ታኣኒ ቢያ ዎዴ ኔ ኩጫኬ፤
ታኣኮ ሞርኮና ዒፂ ታና ዳውሳዞንሢናፓ ቢያ ታና ዓውሴ።
16 ኔኤኮ ዓይላሢ፥ ታና ጌኤሺ ዓኣፒ ካራና ዛጌ፤
ኔኤኮ ጋፑዋ ናሹሞና ታና ዓውሴ።
17 ናንጊና ናንጋ ጎዳሢዮ!
ታኣኒ ኔና ዔኤላ ዎዶና ኔ ታና ቦርሲሲፖ፤
ፑርቶ ማዻ ዓሳ ጋዓንቴ ቦርሲንቶንጎ፤
ዔያታ ዓጊፁዋያ ማዒ ሊካ ዹሞ ዔታ ሎኦሞንጎ።
18 ፂላሢዳ ዔያታ ሆኦሊንቲሢና ዖቶርሙሞና ጌስታሢሮ
ዔያቶኮ ሉኡቃ ዻንጎ ዚቲዴ።
19 ኔ ዴማ ዓታኒ ኔ ባንሢ ዑካዞንሢም
ዓሶ ቢያ ቤርታ ኔ ዒንጋ
ኔና ዒጊጫዞንሢም ኔ ጊኢጊሼ ኮሹማ
ዎዚ ዼኤፓይ!
20 ዓሳ ዔያቶ ባይዛኒ ዞርታሢዳፓ ኔ ማኣሮ ዴማ ኔ ዔያቶ ዓኣቼኔ፤
ማርማሢዳፓ ዔያቶ ዓውሳኒ ኔ ኬኤፆ ጋሮ ኔ ዔያቶ ጌልዜኔ።
21 ማንጊንቴ ካታሜሎ ጋራ ታኣኒ ዓኣንቴ
ዲቃሢ ሄርሺሳ ናሹሞ ኔኤኒ ታና ዻዌኔ፤
ናንጊና ናንጋ ጎዳ ዓንጂንቶንጎ!
22 ታኣኒ ሚርጌና ዲቃቴሢሮ
ኔ ዓኣፓፓ ኔ ታና ጋፒ ሂዔያ ታኣም ማሌኔ፤
ጋዓንቴ ታ ኔ ባንሢ ማኣዳሢ ኮዒ ዒላታዛ
ዒላቶ ኔ ታኣሲ ዋይዜኔ።
23 ዒንሢ ዒዛም ዱማዼ ዓሳ ቢያ
ናንጊና ናንጋ ጎዳ ናሽኩዋቴ፤
ዒዚ ጉሙርቂንታዞንሢ ካፓኔ፤
ዖቶርቃዞንሢም ጋዓንቴ ሜቶ ዒ ዓጋኔ።
24 ዒንሢ ናንጊና ናንጋ ጎዳ ሃጋኣ ዎዛ ማሂ ጌሣ ዓሳ ቢያ
ዒጊጪፖቴ፤ ዒናኣ ዒንሢኮ ዶዶንጎ።