ፒዜ ዎጌ ታኣም ዎጊንታንዳጉዲ

ታ ሺኢቃ ሺኢጲፆ ዋይዜ፤

ዒላቶዋ ታኣኮ ዒና ዔኬ፤

ኔኤኒ ሌሊ ታኣም ዎጋኒ ዳንዳዓኔ።

ዋንቶ ኔ ታና ሙኪ ዖኦጬቴያ

ታ ዎይታቴ ኔኤኒ ዛጌቴያ

ፑርቱሞ ታኣፓ ኔኤኒ ዴንቃዓኬ፤

ዻንጋ ታኣኮ ዻቢንታያቱዋሴ።

ኔኤኒ ኬኤዛ ቃኣሎ ጎይፆና

ታኣኒ ታና ካፔኔ።

ቶካ ታኣኮ ኔ ጎይፃፓ ኬስኪ ዣኣሊባኣሴ።

ሺኢጲፆ ኔ ታኣኮ ዋይዛሢሮ

ኔና ታኣኒ ሺኢቃኔ፤

ዋዮ ኔኤሲ ታ ባንሢ ማሄ፤

ታኣኒ ጋዓ ባኮ ዋይዜ።

ኔኤኮ ሚዛቆ ኩጮና ዓውሳ ፆኦዛሢዮ!

ናንጊና ናንጋ ናሹሞ ኔኤሲ ዲቃሢ ሄርሺሳ ጎይሢና ፔጋሲ ዻዌ።

ኔኤኮ ጋኣዞ ዴማ ታና ዓኣቼ።

ዎዻኒ ታና ማንጌ ታኣኮ ሞርካፓ ታና ዓኣቼ።

ዻንጋ ዔያቶሲ ዖቶርሙሞ ጌስታኔ።

ዎዺ ሳዓ ዔያታ ታና ሚጫኒ ጎዚ ዔቄኔ።

ዓኣሺንቲ ካቲ ዴዔ ሃጊ ዔቃ ዞቢጉዲኬ።

ኔኤኮ ጬንቾ ዓፓሮና ፑርቶ ዓሶፓ ታና ዓውሴ።

ዔያታ ናንጋ ናንጋ ሃያ ዓጮ ባኣዚም ሌሊ ማዔ

ኔኤኒ ናሽካ ዓሶም ሙኡዚ ዒንጌ፤

ናኣታ ዔያቶኮ ሚርጎንጎ፤

ናኣቶኮ ናኣቶም ማዓንዳ ሙኡዚ ዔያቶም ዒንጌ።

ጊንዓሢፓ ታኣኒ ጴጫዖ ኔኤኮ ዓውካሮ ዛጊ ዎዛዻንዳኔ።