ሆሴዔ
ዓይፆ ካሮ
ፆኦሲ ማሊፆ ኬኤዜ ሆሴዔ ኪሪስቶሴ ሾይንታንዳሢኮ ቤርታ ሳማሪያ ካታማ ላንካይ ፄኤታና ላማታሚ ፔቴ ሌዔይዳ ሻሂንታንዳሢኮ ቤርታ ፆኦሲ ማሊፆ ኬኤዚ ማዼ ዓሲኬ። ዬኖ ዎዶና ኮሺ ሜቶ ዎዴታንቴ ፆኦሲ ማሊፆ ኬኤዜ ዓሞፄፓ ሄሊሳዖ ዒስራዔኤሌኮ ኬዴኖ ካኣቶ ዓጮይዳ ፆኦሲ ማሊሢ ዒዚ ኬኤዜኔ። ሆሴዔ ዒማና ዴራ ሜሌ ፆኦዞ ካኣሽኪ ፆኦሲም ጉሙርቂንቲባኣያ ማዒፆ ዛሎ ኮሺ ዶዲሺ ኬኤዜኔ፤ ዒዚ ዴሮኮ ዬያ ጉሙርቂንቲፆ ባይሱሞ ፔጋሲ ዔርዛኒ ጉሙርቂንቱዋያ ማዔ ጎሜሮ ጎዖ ላኣሊስኬኖ ዒዛኮ ኮኦኪንሢ ማሂ ጌስቴኔ፤ ዬና ላኣሌላ ዒዛም ጉሙርቂንቲባኣያ ማዔሢጉዲ ናንጊና ናንጋ ጎዳኮ ዴራ ፆኦሲም ጉሙርቂንቲ ናንጊፆ ሃሼኔ፤ ዬያ ዛሎና ሜታ ዒስራዔኤሌ ዓሶይዳ ሙካንዳሢ ዒዚ ኬኤዛኔ፤ ዬይ ያዺ ማዔቴያ ፆኦሲ ፔኤኮ ዴሮ ናሽካ፥ ጋፑዋ ናሹማ ኮሺ ዶዲ ማዔሢሮ ዴሮ ዒዚ ፔ ባንሢ ማሂ፥ ዒዛና ዒዛኮ ዴሮና ባኣካ ዓኣ ፔቱሞ ጊንሣ ዓካሳንዳሢ ሆሴዔ ኬኤዜኔ፤ ዬይ ፆኦሲኮ ዼኤፖ ናሹማ ዓይ. 11፡8ይዳ «ዒስራዔኤሌ! ታኣኒ ኔና ዎይቲ ኬኤራንዳይ? ዎይቲ ታ ኔና ሜሌም ዓኣሢ ዒንጋንዳይ?… ታ ኔና ናሽካ ናሹማ ኮሺ ዶዲታሢሮ ዬያ ቢያ ታኣኒ ማዹዋጉዲ ታ ዒና ታና ባሼኔ!» ጌይንቲፆና ፔጋዺ ዔርቴኔ።
ማፃኣፔላ ዱማ ዱማ ዓርቄ ባኮ
ሆሴዔ ዔኬ ላኣሌሎና ናኣቶና ጉሙርቂንቱዋያ ማዔ ፆኦሲ ዴሮኮ ኮኦኪንሢ ማዒፆ (1፡1—3፡5)
ፆኦሲ ዒስራዔኤሌንታ ዪሁዳንታ ዔያቶኮ ሱኡጎዋ ዞሪ ጎሬያ ማዒፆ (4፡1—5፡15)
ዴራ ፆኦሲ ባንሢ ማዔያ ማሊሲ ጌሼ ጌሺፆ (6፡1—7፡12)
ዒስራዔኤሌ ዴራ ፆኦሲ ጉሙርቂፆ ሃሼሢ (7፡13—8፡14)
ዒስራዔኤሌ ዴራ ኮይሳያ ማዔ ሜቶ ዔካንዳያ ማዒፆ (9፡1-17)
ዒስራዔኤሌ ዴራ ዔራንዳጉዲ ላቲ ኬኤዚንቴ ባኮ (10፡1-15)
ፆኦሲ ፔኤኮ ዴሮ ናሽካ ናሹሞ (11፡1-11)
ፆኦሲ ፔ ዴሮ ዑፃ ዎጌ ዎጎ (11፡12—13፡16)
ጎማ ዓቶም ጌይንታንዳሢና ዓንጆዋ ሙካንዳያ ማዒፆ (14፡1-9)
1
ሆሴዔኮ ማቾንታ ናኣቶንታ ኮኦኪንሢ ማዒ ኬኤዚንቴሢ
1 ዪሁዳ ዓጮይዳ ዖኦዚያ፥ ዒዮዓታሜ፥ ዓካኣዜንታ ሂዚቂያሴንታ ዎሊ ሄሊሲ ካኣታዼ ዎዶና ቢያ፤ ዬያጉዲ ሃሣ ዮዓሴ ናኣዚ፥ ዒዮርቢዓሜ ዒስራዔኤሌ ዓጫ ካኣታዼ ዎዶና ናንጊና ናንጋ ጎዳ ቢዔሬ ናኣዚ ሆሴዔም ፔጋሲ ኬኤዜ ቃኣላ ሂዚ ጋዓያኬ። 2ካኣቶ. ማ 14፡23—15፡7፤ 15፡32—16፡20፤ 18፡1—20፡21፤ 2ፆኦሲ. ዓሃኬ 26፡1—27፡8፤ 28፡1—32፡33።
2 ናንጊና ናንጋ ጎዳ ሆሴዔ ዛሎና ዒስራዔኤሌ ዴሮም ፔኤኮ ቃኣሎ ኬኤዚፆ ዓርቃዖ ሆሴዔም፦ «ታኣኮ ዴራ ታና ሃሺ፥ ሻኣካያ ማዔ ዞኦስካ ኮኦሞ ኮኦሚሢ ዓርቄኔ፤ ሃሢ ኔኤኒ ዴንዲጋፓ ዞኦስካ ኮኦማ ላኣሊ ዔኬ፤ ዬያይዲ ዞኦዜ ናይ ሾዔ» ጌዔኔ።
3 ዬያሮ ሆሴዔ ዴንዲ ዲቢላዬ ናዎ፥ ጎሜሮ ጎዖዞ ዔኬኔ፤ ዒዛ ጎጳዺ ዓቲንቄ ናይ ሾዔኔ። 4 ዬካፓ ናንጊና ናንጋ ጎዳ ሆሴዔም፦ «ዒዩ ዒይዚራዔኤሌ ዶኦጮይዳ ዎዼ ዓሶኮ ሱጉፆ ማሃኒ ዒዛ ማኣሮ ዓሶይዳ ሜቶ ታኣኒ ዓጋንዳ ዎዳ ሃኬ ማዓዓኬ፤ ዒስራዔኤሌ ፔ ካኣቲ ዓጪ ማዒ ናንጋ ናንጎዋ ታኣኒ ባይዛንዳኔ፤ ዬያሮ ዬያ ናማኮ ሱንፆ ዒይዚራዔኤሌ * ዒይዚራዔኤሌ፦ ጌይፃ «ፆኦሲ ዜርቂ ባባይዛያኬ» ጌይሢኬ። ጌይ ጌሤ» ጌዔኔ። 2ካኣቶ. ማ 10፡11። 5 ዬማና ዒይዚራዔኤሌ ዶኦጮይዳ ዒስራዔኤሌኮ ዖሎ ዓሶ ዎዺ ታኣኒ ኩርሳንዳኔ።
6 ጎሜራ ሃሣ ጎጲ ዔኪ ዉዱሮ ናይ ሾዔኔ፤ ናንጊና ናንጋ ጎዳ ሆሴዔም፦ «ሃይካፓ ሴካ ዒስራዔኤሌ ዴሮ ሚጪንቲ ታኣኒ ቲኢራዓኬ፤ ዻቢንቶዋ ታ ዔያቶም ዓቶንጎ ጋዓዓኬ፤ ዬያሮ ኔኤኮ ናዖ ሱንፆ ‹ሎሩሃማ›† ሎሩሃማ፦ ጌይፃ «ጎሜ ዓቶም ጌይ ቲኢሪሢ ኮይሱዋ ዴሬ» ጌይሢኬ። ጌይ ጌሤ ጌዔኔ። 7 ዪሁዳ ዴሮ ጋዓንቴ ሚጪንቲ ታኣኒ ቲኢራንዳኔ፤ ታኣኒ፥ ናንጊና ናንጋ ጎዳ ማዔ ዔያቶኮ ፆኦዛሢ ዔያቶ ዓውሳንዳኔ፤ ታኣኒ ዔያቶ ዓውሳንዳሢ ዖልዚናቱዋሴ፤ ጬንቻ ዓራፖ፥ ሂኢሺ፥ ዬያጉዲ ፓሮንታ ፓሮና ዖላ ዓሲናኣ ዖሊቱዋሴ» ጌዔኔ።
8 ጎሜራ ሎሩሃማ ጉኡጲሼስካፓ ጊንሣ ጎጲ ዔኪ ዓቲንቄ ናይ ሾዔኔ። 9 ናንጊና ናንጋ ጎዳ ሃሣ ሆሴዔም፦ «ሃይካፓ ሴካ ዒስራዔኤሌ ዴራ ታኣኮ ዒጊኒቱዋሴ፤ ታኣኒያ ዔያቶኮ ፆኦሲቱዋሴ፤ ዬያሮ ኔኤኮ ናኣዚ ሱንፆ ‹ሎዓሚ›‡ ሎዓሚ፦ ጌይፃ «ታ ዴሬ ማዒባኣያ» ጌይሢኬ። ጌይ ጌሤ» ጌዔኔ።
ዒስራዔኤሌ ዴሮም ሃጋኣ ዎዛ ማሂ ኬኤዚንቴ ባኣዚ
10 ያዺ ማዔቴያ ዒስራዔኤሌ ዴራ ፓይዲንታኒና ማኪ ዔርታኒ ዳንዳዑዋ ባዚ ማኣሻላጉዲ ሚርጋንዳኔ፤ ሃሢ ፆኦሲ ዔያቶ፦ «ዒንሢ ታ ዴሬቱዋሴ» ጌዔቴያ ዒማ ቤዛ ጊንሣ «ናንጊና ባይቁዋዖ ናንጋ፥ ፆኦሲ ናኣቶ» ዔያታ ጌይንታንዳ ዎዴ ዬዓንዳኔ። ሮሜ 9፡26። 11 ዬኖ ዎዶና ዪሁዳ ዴሮንታ ዒስራዔኤሌ ዴሮንታ ዎላ ፔቴ ማዓንዳኔ፤ ዔያቶ ላምዓሢ ዎይሣንዳ ፔቴ ሱኡጌ ዔያታ ዶኦራንዳኔ፤ ጊንሣ ዔያታ ፔ ዓጮይዳ ዔርቴያ ማዒ ዳልጊ ዖርጎጪ ናንጋንዳኔ፤ ዬና ኬሌላኣ ዒይዚራዔኤሌም ዼኤፒ ኬሊ ማዓንዳኔ።
1:1 2ካኣቶ. ማ 14፡23—15፡7፤ 15፡32—16፡20፤ 18፡1—20፡21፤ 2ፆኦሲ. ዓሃኬ 26፡1—27፡8፤ 28፡1—32፡33።
*1:4 ዒይዚራዔኤሌ፦ ጌይፃ «ፆኦሲ ዜርቂ ባባይዛያኬ» ጌይሢኬ።
†1:6 ሎሩሃማ፦ ጌይፃ «ጎሜ ዓቶም ጌይ ቲኢሪሢ ኮይሱዋ ዴሬ» ጌይሢኬ።
‡1:9 ሎዓሚ፦ ጌይፃ «ታ ዴሬ ማዒባኣያ» ጌይሢኬ።