5
ዓይኑሞ ሱኡጋሢ ዓይሣ ጎይፆና ሹሉንጎና ዓይናዺንታ ዳውቴ ዓይኑሞ
ፆኦሲ ማኣዳንዳጉዲ ሺኢቂንታ ሺኢጲሢ
1 ናንጊና ናንጋ ጎዳሢዮ! ታ ዑኡዞ ዋይዜ፤
ጋርሲና ታ ዚኢሊንቲ ጋዓ ባኮ ዔኬ።
2 ታ ካኣቲዮ፥ ታኣኮ ፆኦዛሢዮ!
ታ ኔና ሺኢቃሢሮ
ታና ኔ ማኣዳንዳጉዲ ታ ዒላታ ዒላቶ ዋይዜ።
3 ናንጊና ናንጋ ጎዳሢዮ!
ጉቶ ጉቶ ታ ሺኢቃ ሺኢጲፆ ዋይዜ፤
ኔኤኒ ታኣም ዎዚ ጋዓቴያ ጉሙርቂ ታ ካፓኔ።
4 ኔኤኒ ፑርታ ማዾና ዎዛዻ ፆኦሲቱዋሴ፤
ፑርቶ ማዻ ዓሳኣ ኔኤና ዎላ ናንጉዋሴ።
5 ዖቶርቃ ዓሳ ኔ ቤርታ ዔቁዋሴ፤
ፑርቶ ማዻ ዓሶዋ ቢያ ኔኤኒ ዒፃኔ።
6 ሉኡዙሞ ጌስታ ዓሶ ቢያ ኔ ባይዛኔ፤
ዓሲ ዎዻ ዓሶንታ ጌሻ ዓሶዋ ኔኤኒ ሻኣኪንታኔ።
7 ታኣኒ ጋዓንቴ ኔኤኮ ዼኤፖ ማኣሪፆና ኔ ማኣሪ ጌላንዳኔ፤
ኔኤም ዱማዼ ጌኤዦ ማኣሮ ባንሢያ ቦንቾና ታ ዚጋንዳኔ።
8 ናንጊና ናንጋ ጎዳሢዮ! ታኣኮ ሚርጌ ሞርኬ ዓኣሢሮ
ኔ ፂሉሞና ኔኤኒ ታና ዔኪ ዓኣዼ፤
ኔ ጎይፆዋ ኔኤኒ ታኣም ኮሼ።
9 ዔያታ ጌስታ ጌኤዞይዳ ጎኑሞ ባኣሴ፤
ማሊፆ ዔያቶሲዳ ጌኔ ኩሜያኬ፤
ቆርጫ ዔያቶሲ ሲንሢንቲባኣ ዱኡፒ ዔቴጉዲኬ፤
ዻንጋ ዔያቶሲያኣ ዓሲ ጌሻያኬ። ሮሜ 3፡13።
10 ፆኦሲዮ! ዔያቶ ዒንሢ ዻቢንቴያኬ ጌዔ፤
ጌኖ ማዻ ዔያቶሲ ዔያቶ ባይዞንጎ፤
ዔያቶኮ ጎማ ሚርጌሢሮ ዔያቶ ባይዜ።
11 ኔና ፑኖ ካዮ ማሃዞንሢ ቢያ ዎዛዾንጎ፤
ናንጊና ዔያታ ዒላሾንጎ፤
ሱንፆ ኔኤኮ ናሽካ ዓሳ ቢያ ዒናፓ ዎዛዻንዳጉዲ
ኔኤኒ ዔያቶኮ ጊቲማ ማዒ ካፔ።
12 ናንጊና ናንጋ ጎዳሢዮ! ኔኤኒ ፂሎ ዓሶ ዓንጃኔ፤
ኔኤኮ ሚጪንቲፆና ጊቲማ ማዒ ኔ ዔያቶ ዓውሳኔ።