1 ሚናኣሴ ናይ፥ ማኪሬ ናይ፥ ጌሌዓዴ ናይ፥ ሄፔሬ ናይ ማዔ ፄሎፒሃዴኮ ዉዱሮ ናኣቶንሢ፦ ማሂላ፥ ኖዓ፥ ሆግላ፥ ሚልካንታ ቲርፃ ጌይንታያኬ፤ ዬያታ ዮሴፔ ናኣዚ ሚናኣሴ ቶኦኪ ማዔያኬ። 2 ዓፒሎና ማዢንቴ፥ ፆኦሲ ዴሮና ካኣማ ማኣሮ ካሮ ዔያታ ሙኪ ዴሮ ጉቤሢና ዴሮኮ ሱኡጎና፤ ሃሣ ሙሴና ዓላዜሬና ቤርቶ ሺኢኪ፦ 3 «ኑ ዓዳሢ ፔቴታዖ ዓቲንቄ ናይ ሹውዋዖ ዓሲ ናንጉዋ ዳውሎይዳ ሃይቄኔ፤ ዒዚ ፆኦሲም ዓይሢንቲፆ ዒፄ፥ ቆራሄ ዓሶና ዎላ ፔቴ ማዔያቱዋሴ፤ ዒዚ ሃይቄሢ ፔ ጎሜናኬ። 4 ዓካሪ፤ ዒዚ ዓቲንቄ ናይ ሾዒባኣሢሮ ሌሊ ዒስራዔኤሌ ዓሶ ባኣካፓ ሱንፃ ዒዛኮ ባይቃንዳያ ኮይሳ? ዬያሮ ኑ ዓዶ ፃጶ ባኣካ ኑም ማዓ ሳዓ ዒንጊንቶንጎ» ጌዔኔ።

5 ሙሴ ዬያ ዔያቶኮ ዖኦጪፆ ናንጊና ናንጋ ጎዳም ሺኢሻዛ፥ 6 ናንጊና ናንጋ ጎዳ ሙሴም፦ 7 «ፄሎፒሃዴ ናኣታ ዖኦጬ ዖኦጪፃ ፒዜኬ፤ ዬያሮ ዔያቶ ዓዶ ፃጶ ባኣካፓ ዔያቶ ሄላ ዛሎ ዔያቶም ዻካልሳኒ ኮይሳሢሮ ዔያቶኮ ዓዶ ሄላንዳ ባኮ ዔያቶም ዒንጌ። ፓይ. ማፃ 36፡2። 8 ዓቲንቄ ናይ ሹውዋዖ ሃይቄ ዓሲ ዓኣቶ ዉዱሮ ናይ ዓዶኮ ዓኣ ባኮ ዻካላኒ ኮይሳያታሢ ዒስራዔኤሌ ዴሮም ዔርዜ። 9 ዉዱሮ ናይ ባኣቴ ሃይቄሢኮ ጌርሲንሢ፥ ዒዛኮ ዓኣ ባኮ ዻካሎንጎ፤ 10 ጌርሲንሢያ ዒዛኮ ባኣቴ ዒዛኮ ዓዶ ጌኤዚታቴያ ዓዶ ዒሼ ዻካሎንጎ፤ 11 ዓዶ ጌኤዛቲታቴያ ዓዶ ዒሾ ማዓይ ባኣቴ ዑኬ ዒጊኒ ማዔ ዓሲ ዒዛ ባኮ ዻካላኒ ዳንዳዓኔ። ታኣኒ፥ ናንጊና ናንጋ ጎዳ ኔና ዓይሤ ጎይፆ ዒስራዔኤሌ ዴራ ዬያ ዎጎ ማዺ ማዺ ናንጋያ ማዖንጎ» ጌዔኔ።

12 ዬካፓ ናንጊና ናንጋ ጎዳ ሙሴም፦ «ሌካ ዓባሪሜ ዹኮ ኬስኪ፥ ዒስራዔኤሌም ታ ዒንጋ ዓጮ ቢያ ዛጌ! 13 ዬያ ኔ ዛጌስካፓ ኔ ዒሼ ዓኣሮኔ ሃይቄሢጉዲ ኔኤኒያ ሃይቃንዳኔ፤ 14 ዓይጎሮ ጌዔቴ ዒንሢ ላምዖንሢ ፂኢኔ ቦኦሎይዳ ሜሪባ ጎዖ ቤዛ ዴራ ታኣም ዓይሢንቶ ዒፄ ዎዶና ታኣኮ ዱማዼያ ማዔ ዎልቆ ፔጋሲ ዻዎ ዒፄሢሮኬ» ጌዔኔ። (ሜሪባ ፂኢኔ ቦኦላ፥ ቃዴሴይዳ ዓኣ ዋኣሢ ዓልቃ ቤሲኬ።) ላሚ. ዎማ 3፡23-27፤ 32፡48-52። 15 ሙሴ፦ 16 «ዓሲ ማዢንቲም ቢያ ሼምፖ ዒንጋ ናንጊና ናንጋ ጎዳ ማዔ ፆኦዛሢዮ! ሃያ ዴሮ ዔኪ ዓኣዻንዳያና፥ 17 ዖልዚ ሙኬቴያ ዖሊሳኒ ዳንዳዓ፥ ፔቴ ዓሲ ዶኦሬ፤ ኔ ዬያይዴቴ ኔኤኮ ዴራ ሄንቃ ዓሲባኣ ማራይጉዲ ማዓዓኬ» ጌይ ናንጊና ናንጋ ጎዳ ሺኢቄኔ። 1ካኣቶ. ማ 22፡17፤ ሂዚ. 34፡5፤ ማቲ. 9፡36፤ ማር. 6፡34።

18 ዬያሮ ናንጊና ናንጋ ጎዳ ሙሴም፦ «ዓያና ጌኤሺ ዎልቄ ዒዛና ዓኣ፥ ኔዊ ናዓሢ ዒያሱ ዔኪጋፓ ኔ ኩጮ ዒዛ ቶኦካ ጌሤ፤ ኬሲ. ማፃ 24፡13። 19 ቄኤሳሢ ዓላዜሬንታ ዴሮ ቢያሢ ቤርታ ዒዛ ዔቂሲ፥ ኔ ቤዛ ዒ ዶኦሪንቴያ ማዔሢ ዔርዜ። 20 ዒስራዔኤሌ ዴራ ቢያ ዒዛም ዓይሢንታንዳጉዲ ኔ ቢታንቶጉዴ ቢታንቶ ዒዛም ዒንጌ። 21 ቄኤሳሢ ዓላዜሬ ታ ማሊፆ ዱማሲ ዔርዛ ባኮና ታ ማሊፆ ዔራያታሢሮ ዒዚ ዒያሱ ማኣዳንዳኔ፤ ዬያይዲ ዓላዜሬ ዒያሱንታ ዒስራዔኤሌ ዴሮ ቢያሢ ዔያታ ማዻ ባኮ ቢያ ዻዋያ ማዓንዳኔ» ጌዔኔ። ኬሲ. ማፃ 28፡30፤ 1ሳሙ. 14፡41፤ 28፡6።

22 ናንጊና ናንጋ ጎዳ ዒዛ ዓይሤ ጎይፆ ሙሴ ማዼኔ፤ ዒያሱዋ ዔኪ ሙኪ ቄኤሳሢ ዓላዜሬንታ ዴሮ ቢያሢንታ ቤርታ ዔቂሴኔ፤ 23 ዬካፓ ናንጊና ናንጋ ጎዳ ዒዛ ዓይሤ ጎይፆ ፔኤኮ ኩጮ ዒያሱ ቶኦካ ጌሢ ዒዛ ቤዛ ዶኦሪንቴያ ማዔሢ ዴሮም ዔርዜኔ። ላሚ. ዎማ 31፡23።