ጌኤዦ ማፃኣፖ ዔርሚያሴ ማፃኣፖ 47

ፒሊስፄኤሜ ዛሎ ኬኤዚንቴ ፆኦሲ ማሊሢ

1 ጊብፄ ካኣቲ ጋኣዛ ዖላንዳሢኮ ቤርታ ናንጊና ናንጋ ጎዳ ፒሊስፄኤሜ ዓጮ ዛሎ ሂዚ ጌይ ታኣም ኬኤዜኔ፤

2 ናንጊና ናንጋ ጎዳ ሂዚ ጋዓኔ፦

«ሃይሾ፥ ኬዶ ዛላፓ ዺቢ ዋኣሢ

ዎርዚ ኩኩሜ ዲጲጉዲ ዎታኔ፤

ዬይ ዋኣፃ ሳዖና ሳዖይዳ ዓኣ ባኮ ቢያ

ካታሞንታ ዒኢካ ናንጋ ዴሮንታ ቢያ ዔኤዻንዳኔ።

ዒማና ዴራ ቢያ ማኣዶ ዴንቃኒ ዒላታንዳኔ፤

ሳዖይዳ ናንጋ ዓሳኣ ቢያ ዒኔ ሜቂ ዬኤካንዳኔ።

3 ጳሽኪ ሙካ ፓራሢ ቶኮኮ ዑኡዞይዳፓ ዔቄያና፤

ሞርኮ ሳርጌሎ ዖይቶኮ ሺራሢ ዋይዚሳ ዑኡዞፓ ዔቄያና፤

ሃሣ ዬይ ሳርጌሎ ዖይታ ጎዒ ሙካሢ ዔያታ ዛጋዖ

ናኣቶኮ ዓዶንሢ ዎልቃ ዔያቶኮ ጌሌም ላባንዳሢሮ

ፔኤኮ ናኣቶታዖ ዓውሳኒ ሺሪ ጊንሢም ዛጋዓኬ።

4 ፒሊስፄኤሜ ባይቃንዳ ዎዳ ሄሌኔ፤

ሃይቁዋዖ ቶሊ ዓቲ ፂሮሴና ሲዶናና ማኣዳንዳ ዓሳ ቢያ

ካኣሙዋያ ማዒ ሃኬ ሃኬ ዴዓንዳ ዎዴ ዑኬኔ።

ታኣኒ፥ ናንጊና ናንጋ ጎዳ ሃይቦፓ ዓቲ ባዞ ዓጫ ዓኣ

ካፕቶኦሬ ዜርፆ ማዔ ፒሊስፄኤሜ ዓሶ ቢያ ባይዛንዳኔ።

5 ጋኣዛ ዓጮ ዴራ ዖዪ ፔኤኮ ቶኦኮ ሜኤዳንዳኔ፤

ዓስቄሎና ዓሳ ዚቲ ጋዓንዳጉዲ ማዺንታንዳኔ።

ፒሊስፄኤሜ ዶኦጮይዳ ባይሲንቶፓ ቶሊ ዓቲ ዓኣ ዓሳ

ዑፆ ፔኤኮ ቲሊንጎና ቲቂ ቲቂ ዖያሢ ዎማ ሄላንዳኣናዳዖ?

6 ‹ናንጊና ናንጋ ጎዳኮ ጬንቾ ዓራፓሦ! ማዾ ሃሺ ኔ ሃውሻንዳ ዎዳ ዓይዲዳይ?

ሃዳራ ኔኤኮ ጎንጎኖ ጋሮ ጌሊ ሃውሼ› ጌይ ጌይ ዒንሢ ዒላታንዳኔ።

7 ጋዓንቴ ታኣኒ፥ ናንጊና ናንጋ ጎዳ ዒዛም ዒንጌ ማዾ ኩርሱዋዖ ዎይቲ ዒዚ ሃውሻንዳይ?

ዓስቄሎናና ባዞ ዓጮናይዳ ናንጋ ዓሶ ኩርሳንዳጉዲ ዒዛ ታኣኒ ዓይሤኔ።»