ማንቆ ዓሶም ኮዦ ሃይሶ ታ ኬኤዛንዳጉዲ

ዒዚ ታና ዶኦሚ ቲሽኬኔ፤

ዒና ሜቄዞሢ ታ ኮኦላንዳጉዲ

ዲዒንቲ ዔውቴ ዓሶም ዓይላታፓ ኬስኪሢ

ቱኡቲ ዓኣ ዓሶም ቡሊንቲሢ

ሃይሴ ታ ኬኤዛንዳጉዲ ዒ ታና ዳኬኔ። ማቲ. 11፡5፤ ሉቃ. 7፡22።

ኑ ፆኦዛሢ ኮሞ ኮፃንዳ ኬሎ ዛሎዋ ታ ኬኤዛንዳጉዲ

ዬኤካ ዓሶ ቢያ ታ ዶዲሻንዳጉዲ ሉቃ. 4፡18-19።

ዲቢንፆ ቤዛ ሚዛጶ ቶኦካ ዓጎ ባኮ ታ ዔያቶም ዓጋንዳጉዲ

ዬኤፖ ቤዛ ዎዛሳ ዛይቶ ቲዦ ዔያቶ ቶኦካ ታ ዋሃንዳጉዲ

ዖያ ዓያኖ ቤዛ ጋላታ ዓይኑሞ ታ ዒንጋንዳጉዲ ዒዚ ታና ዳኬኔ።

ዔያታ ዒዛኮ ቦንቾ ፔጋሳያ ማዓንዳጉዲ

«ናንጊና ናንጋ ጎዳ ቱኬ ፂሎ ሻኣቢ» ዔያታ ጌይንታንዳኔ።

ቤርታዺ ጋፒ ባይቄ ባኮ ጊንሣ ዔያታ ኮሻንዳኔ፤

ኬስኬ ኬስኬ ሾይንቶና ሻሂንቴ ካታሞ ዔያታ ዓካሳንዳኔ።

ጎዦዋ ዒንሢኮ ዔያታ ጎሽካንዳኔ፤

ዎይኖዋ ዔያታ ኮሺ ኮሺ ካፓንዳኔ።

ዓሳኣ ዒንሢ «ፆኦሲም ማዻዞንሢ» ጋዓንዳኔ፤

ዴሮኮ ቆሎ ዔኪ ዒንሢ ዎዛዻንዳኔ፤

ዔያቶ ዖርጎቼ ባኮ ዒንሢሮ ማሂጋፓ ዒንሢ ቦንቺንታንዳኔ።

ዻውሲንቴ ቤዞዋ ዔያቶም ዒንጊቴ ባኮና ዎዛዻንዳኔ፤

ዔያቶኮ ቤርታኣ ሳዖፓ ጳንጬ ማዔ ሳዓ ዔካንዳኔ፤

ናንጊና ናንጋ ዎዛኣ ዔያቶም ማዓንዳኔ።

ቡሪሢና ፑርታ ማዾ ታ ዒዒፃኔ፤

ዔያታ ማዼሢ ዛሎ ዔያቶም ኮይሳሢጉዴያ ዒንጋንዳኔ፤

ዔያቶና ዎላ ናንጊና ናንጋ ጫኣቁሞ ታ ጫኣቃንዳኔ።

ናኣታኣ ዔያቶኮ ዴሮ ባኣካ ዔርቴያ ማዓንዳኔ፤

ዛጋ ዓሳ ቢያ ናንጊና ናንጋ ጎዳ ዔያቶ ዓንጄያታሢ ዔራንዳኔ።

ሼምፓሢ ታኣኮ ፆኦዛሢና ዎዛዻኔ፤

ዑኡታሢ ፔና ኮሻኒ ዓፒላ ቶኦካ ማራሢጉዲ

ዑኡቴላ ፔኤኮ ሚዛጶ ፓልማሢና ፓልሚንታሢጉዲ

ዻቂንታ ዓፒላ ታና ዒ ማይሴኔ፤

ፂሉሞ ማኣዖዋ ዒ ታ ዑፃ ቃሲ ቃሲ ኩሌኔ። ዮሃ. ፆፔዻ 21፡2።

ቱኮ ባኣዚ ቱኮ ጎዣ ዱማ ዱማ ሚፆ ዑጊሳሢጉዲ

ናንጊና ናንጋ ጎዳ ፂሉሞንታ ጋላታንታ

ዴሮፓ ቢያ ዓልቃንዳጉዲ ማሃንዳኔ።