3
ዒምባቆሜኮ ሺኢጲፆ
1 ዒምባቆሜ ዓይኑሞና ፆኦሲ ሺኢቄ ሺኢጲፃ ያዺ ጋዓያኬ፦
2 ናንጊና ናንጋ ጎዳሢዮ! ኔኤኒ ማዼ ዲቃሢ ሄርሺሳ ባኮ ቢያ ታኣኒ ዋይዚ ሚርጌና ዒጊጬኔ፤
ሃሢ ኑ ዎዶና ሚናኣ ማዾ ኔኤኮ ላሚ ማዼ፤
ቢያ ዎዴና ዔርቲ ናንጋንዳጉዲ ማሄ፤
ኔኤኒ ዻጋዻ ዎዶናታዖ ሚጪንቲፆ ኔኤኮ ኑጊዳፓ ሃኪሲፖ።
3 ፆኦሲ ፔኤኮ ዱማዺፆና ቴማኔ ዓጮና
ፓኣራኔ ዹኮናፓ ላሚ ሙካንዳኔ፤
ዼኤፖ ቦንቻ ዒዛኮ ጫሪንጮ ዓኣቼኔ፤
ጋላታኣ ዒዛሲ ሳዖ ኩሜኔ።
4 ፖዓ ዒዛሲ ዓቢጉዴያኬ፤
ዎልቆ ዒዛኮ ካንቂ ዓኣ ኩጫፓ
ሼኤራ ፖዒ ፖዓኔ።
5 ዎዻ ዶርዓሢ ዒዛኮ ቤርታ ቤርታ ዒ ዳካኔ፤
ሃይቢያ ዒዛም ዓይሢንቲ ዒዛ ጊንፆ ሙካኔ።
6 ዒዚ ዔቃዛ ሳዓ ዓጊፃኔ፤
ዒዚ ዛጋዛ ሜሌ ዴራ ጎጋይቃኔ፤
ሚናኣፓ ዓኣ ዹካ ዲኢማዺ ዶዓኔ፤
ሚናንካፓ ዓርቃዖ ዒዚ ሃንታ ጌሜራ
ሊካ ዓርዲ ባይቃኔ።
7 ዒቶጲያ ዴራ ሜታዻንቴ
ሚዲያሜ ዓሳ ጎጋይቃንቴ ታ ዛጌኔ።
8 ናንጊና ናንጋ ጎዳሢዮ! ኔኤኮ ፓራሢንታ ሳርጌሎ ዖይቶንታ ባሻንዳጉዲ ኔ ማዼ ዎዶና
ኔኤኮ ዼኤፖ ዻጋ ዎሮይዳዳ?
ጊንሣ ሃሣ ባዞይዳ ኔኤኒ ዻጋዺያ?
9 ሂኢዦ ኔኤኮ ኔኤኒ ካቲላፓ ኬሴኔ፤
ዱካኒያ ኔኤኒ ዓኣሤኔ፤
ሳዖ ኔኤኒ ዳርዚ ዎርዚ ማዤኔ።
10 ዹካ ኔና ዛጋዖ ዒጊቹሞና ጎጋይቄኔ፤
ዒሮ ዲጳኣ ሳዖ ፒፂ ዓኣዼኔ፤
ዼኤፖ ባዛ ጉኡሚ ዋይዚንቴኔ፤
ባዞ ጉዳሢያ ሌካ ዼግ ዼግ ጌዔኔ።
11 ኔኤኮ ዱኪንታ ሂኢዦንታ
ዜኤሊንሢጉዲ ፖዓ ዎርፆ ፖዒፃፓ ዔቄያና
ዓቦንታ ዓጊኖንታ ዓኣ ቤዛ ዔቄኔ።
12 ሳዖይዳ ኔኤኒ ባይዛ ባኮና ዔቄኔ፤
ኔኤኮ ዻጎና ሜሌ ዴሮ ኔኤኒ ሄርቄኔ።
13 ዴሮ ኔኤኮ ዓውሳኒ፥ ኔኤኒ ዶኦሚ ካኣታሤ ካኣቲ ዓውሳኒ ኔኤኒ ኬስኬኔ፤
ጎሞ ዓሶኮ ሱኡጋሢ ኔኤኒ ሄርቄኔ፤
ዒዛና ዎላ ዓኣ ዓሶ ኔኤኒ ባይዚ ካሎ ኔ ዓይሴኔ።
ቶካፓ ቶኦኮ ሄላንዳኣና ዒዛ ኔኤኒ ካላሴኔ።
14 ዓልጎ ዢባሬጉዲ ኑና ላኣላኒ ሙኬ
ዖሎ ዓሶኮ ሱኡጋሢ ዒዛ ሂኢዦና ኔኤኒ ዱኬኔ።
ላቤ ቆልሞ ጫሃኒ ዓፃዻ ቦዖጉዲ
ዒዚ ዓኣሺንቲ ዓኣ ማንቆንሢ ባይዛኒ ጊኢጌኔ።
15 ኔኤኒ ኔ ፓራሢና ባዞ ሄርቃኣና
ዬይ ዼኤፖ ባዛ ዓዓጊፃኔ።
16 ዬያ ቢያ ታ ዋይዛኣና ዒና ታኣኮ ዲቃቴኔ፤
ሙሱራ ታኣኮ ዒዛ ዑኡዞ ዋይዛዖ ጎጋይቃኔ፤
ዒጊቹማ ዴንዲ ታኣኮ ሜጌፆ ጋሮ ጌሌኔ፤
ቶካኣ ታኣኮ ጎጋይቄኔ፤
ኑና ሜታሳ ዴሮ ዑፃ ሜታ ሙካንዳያ ሄላንዳኣና
ዬኖ ኬሎ ጊቢ ዳንዳዒሢና ታኣኒ ካፓንዳኔ።
17 ቤሌሶ ሚፃ ዎዚ ቡኒባኣያታቴያ
ዎይኖ ዑፆይዳ ዓኣፒ ባኣያ ማዔቴያ
ሃሣ ሪሚቶ ሚፃኣ ዓኣፒ ባኣታቴያ
ጎዦ ጋራ ካፄ ሃኣኮ ባይቄያታቴያ
ማራታ ቢያ ሃይቂ ጋፔታቴያ
ባርቶ ጋራ ባይ ባኣያታቴያ፤
18 ዬይ ቢያ ማዔቴያ ታኣኮ ናንጊና ናንጋ ጎዳ ዓኣሢሮ ታ ዎዛዻንዳኔ፤
ታ ፆኦዛሢ፥ ታኣኮ ዼኤሻሢ ዓኣሢሮ ታ ዒላሻንዳኔ።
19 ናንጊና ናንጋ ጎዳ ማዔ ፆኦዛሢ ታኣኮ ዎልቃሢኬ፤
ዒዚ ቶኮ ታኣኮ ዎሾ ሹቁሊጉዲ ዶዲሻኔ፤
ዒዚ ታና ዹኮ ዑፆይዳ ሃንታንዳጉዲ ማኣዳኔ። 2ሳሙ. 22፡34፤ ዓይኑ. 18፡33።