1 ዒዮዓታሜኮ ሌዓ ላማታሚ ዶንጎ ማዓኣና ካኣታዼኔ፤ ዒዚ ዬሩሳላሜይዳ ናንጊ ታጶ ላሆ ሌዔ ዎይሤኔ፤ ዒንዳ ዒዛኮ ዪሩሻ ጌይንታያ ሳዶቄ ናዎኬ። 2 ዒዮዓታሜ ዓዴ ማዼ ጎይፆ ናንጊና ናንጋ ጎዳ ዎዛሳ ባኣዚ ማዼኔ፤ ዓዴ ጌኤዦ ማኣሮይዳ ዑንጆ ጩቢሺ ማዼ ጎሞ ማዺባኣሴ፤ ዴራ ጋዓንቴ ጎሞ ማዺፆ ሃሾ ዒፄኔ።

3 ዒዮዓታሜ ጌኤዦ ማኣሮኮ ኬዶ ዛሎ ካሮ ላሚ ዓካሲ ኮሼኔ፤ ሃሣ ጊንሣ ዖፔሌ ጌይንታ ጌሜራዻ ቤዞ ዙሎ ኬልቂ ዲርቂ ሚርጌ ማዾ ማዼኔ፤ 4 ዬያጉዲ ሃሣ ዪሁዳ ዓጫ ጌሜራ ዓኣ ካታሞ፥ ዴኤሎ ካያ ሚርጌ ዓኣ ቤዞኮዋ ዋርዲያንታ ኬኤሌ ዲሢያ ኮሼኔ። 5 ዒዚ ዒማና ዓሞኦኔ ካኣቲንታ ዖሎ ዓሶዋ ዖሊ ባሼኔ፤ ዬያሮ ዓሞኦኔ ዓሳ ሃይሦ ሌዔ ጉቤ ሌዓ ሌዓ ሃይሦ ሺያና ዖይዶ ፄኤታ ኪሎ ማዓ ሹቺ ቢራ፤ ፔቴ ሚሎኔ ኪሎ ማዓ ዛርጌና ፔቴ ሚሎኔ ኪሎ ማዓ ዔልዓኣ ጊኢሬኔ። 6 ዒዮዓታሜ ናንጊና ናንጋ ጎዳ ማዔ ፔኤኮ ፆኦዛሢም ጉሙርቂንታያ ማዔሢሮ ዎልቄ ዴንቂ ዶዲ ዶዲ ዓኣዼኔ። 7 ዒዮዓታሜ ካኣታዼ ዎዶና ማዺንቴ ሜሌ ባካ ቢያ፥ ዒ ዖሌ ዖሎንታ ዒ ዎይሤ ዎይሢፃ ቢያ ዒስራዔኤሌንታ ዪሁዳንታ ካኣቶ ሃይሳ ፃኣፒንታ ማፃኣፓ ፃኣፒንቴኔ፤ 8 ዒዮዓታሜ ካኣታዻኣና ሌዓ ዒዛኮ ላማታሚ ዶንጎኬ፤ ዒዚ ዬሩሳላሜይዳ ናንጊ ታጶ ላሆ ሌዔ ዎይሤኔ፤ 9 ዬካፓ ዒዚ ሃይቂ፥ ዳውቴ ካታማ ዱኡቴኔ፤ ዒዛ ቤዛ ዒዛኮ ናኣዚ ዓካኣዜ ካኣታዼኔ።