1 Yini ngaa tjuṯaya Yiitju Kurayitjaku walytja tjuṯaya nyinangi. Yiitju Kurayitjanya mayutju Tapitaku walytja ngaṉṯitja nyinangi. Mayutju Tapitanya Yipuramaku walytja ngaṉṯitja nyinangi. 2 Yipuramalu katja Yatjikanya mantjiṉu. Yatjikalu katja Tjikupanya mantjiṉu. Tjikupalu katja tjuṯa mantjiṉu. Tjuutanya palumpa katja nguruṯitja nyinangi. 3 Tjuutalu katja kutjarra mantjiṉu. Piritjanya palumpa katja yurruntitja nyinangi, kutjupara palumpa katja nyinangi Tjiranya. Palumpa kutjarraku maama kungka Tamanya nyinangi. Piritjalu katja Yitjarunanya mantjiṉu. Yitjarunalu katja Ramanya mantjiṉu. 4 Ramalu katja Yaminitapanya mantjiṉu. Yaminitapalu katja Natjananya mantjiṉu. Natjanalu katja Tjalmananya mantjiṉu. 5 Tjalmanalu katja Puwatjanya mantjiṉu. Puwatjaku maama Rayapanya nyinangi. Puwatjalu katja Yuupitanya mantjiṉu. Yuupitaku maama Ruutjanya nyinangi. Yuupitalu katja Tjiitjiyinya mantjiṉu. 6 Tjiitjiyiku katja mayutju tiṉa, Tapitanya nyinangi. Tapitalu katja Tjalamunanya mantjiṉu. Tjalamunaku maama Tapitalu tjulyara kanyiṉingi, wati Yurayaku miiṯa. 7 Tjalamunalu katja Riyupumanya mantjiṉu. Riyupumalu katja Yapayitjanya mantjiṉu. Yapayitjalu katja Yiitjanya mantjiṉu. 8 Yiitjalu katja Tjiyutjapatanya mantjiṉu. Tjiyutjapatalu katja Tjurumanya mantjiṉu. Tjurumalu katja Yatjayanya mantjiṉu. 9 Yatjayalu katja Tjuutjamanya mantjiṉu. Tjuutjamalu katja Yiiyatjanya mantjiṉu. Yiiyatjalu katja Yitjikayanya mantjiṉu. 10 Yitjikayalu katja Manatjanya mantjiṉu. Manatjalu katja Yiimutjanya mantjiṉu. Yiimutjalu katja Tjutjayanya mantjiṉu. 11 Tjutjayalu katja tjuṯalpi mantjiṉu. Palumpa katja yurruntitja Tjikunayanya nyinangi. Palulanguru Papilunanya ngurrara tjuṯangku Yitjurilaku walytja ngaṉṯitja tjuṯa tjananya ngurra Papilunalakutu katirra kanyiṉingi.

12 Tjikunaya paluru katja Tjiltilanya mantjiṉu. Tjiltilalu katja Tjarapapulanya mantjiṉu. 13 Tjarapapulalu katja Yapiyutanya mantjiṉu. Yapiyutalu katja Yilayakimanya mantjiṉu. Yilayakimalu katja Yiitjuranya mantjiṉu. 14 Yiitjuralu katja Tjatakanya mantjiṉu. Tjatakalu katja Yiikimanya mantjiṉu. Yiikimalu katja Yiliyutanya mantjiṉu. 15 Yiliyutalu katja Yalitjanya mantjiṉu. Yalitjalu katja Matanya mantjiṉu. Matalu katja Tjikupanya mantjiṉu. 16 Tjikupalu katja Tjutjupanya mantjiṉu. Tjutjupalu miiṯa Miirinya mantjiṉu. Mirrilu katja Yiitjunya mantjiṉu. Yaṉangu tjuṯangku Yiitjunya yini kutjupa watjalpayi, Kurayitjanya, Katutjalu yirriṯi watjara wantirriyaṉutja. 17 Yalatji Yipuramaku walytja ngaṉṯitja tuwalpala nyinarra wiyarrinytjala mayutju Tapitanyalpi nyinangi. Palulanguru mayutju Tapitaku walytja ngaṉṯitja tuwalpala nyinarra wiyarrinytjala Papilunanya ngurrara tjuṯangku tjananya Yitjurilaku walytja ngaṉṯitja tjuṯa, ngurra Papilunalakutu katirra kanyiṉingi. Paluru tjanampa mayutju Tjikunayanya ngurra palula nyinangi. Palulanguru palumpa walytja ngaṉṯitja tuwalpala nyinarra wiyarrinytjala ngaṉṯi Tjutjupalu Miirilulpipula katja Yiitjunya Kurayitjanya mantjiṉu, Katutjalu irriṯi watjara ngalya wantirriyaṉutja.

18 Yiitju Kurayitjanya yalatji mantangka yutitjarringu. Palumpa maama Miirinya wati Tjutjupaku pikatja walytja nyinangu. Ngurra kutjungka wiyapula nyinapayi, kutju iitjipula nyinapayi. Miiri paluru watiku ngurrpa nyinangu, paluru pikatja palumpa walytjaku paṯaṉingi. Palunyatjanu ngula paluru wiḻalirringu, Katutjaku kurrunpangku palunya puritjunanyingka. 19 Tjutjupalu Miirinya wati kutjupangka ngarringutjangkakutjura kuliṉu. Paluru Miiriku palya kutura nyinangi pikarriwiya. Paluru yalatji kuliṉingi, “Kutjupa tjuṯakutuṉa wiya watjalku Miirinyatjarra. Palunya kutjuṉa watjara wantirriyalku yarrkayarrkangku, tjuṯangku kulilpayingka. Ngaatja wiya ngayuku miiṯa nyinaku.”

20 Wangka palunya paluru yurrukulirinangi. Katutjalu ilkari ngurrara Tjutjupalakutu ngalya wantirriyaṉu, kutu yurrukulintjala. Tjutjupalu tjukurrpa nyangu ilkari ngurrara ngalya tjarukatingutja wangka watjalkitja. Paluru Tjutjupanya watjaṉu, “Tjutjupa. Nyuntu mayutju Tapitaku walytja ngaṉṯitja nyinanyi. Wangka ngaatjanya kulila! Miirinyatjarra nyuntu wiya puntura yurrukulintjaku. Palya nyuntu yankula yaḻṯirrapulan nyinanytjaku. Paluru tjunitjarralpi nyinanyi, Katutjaku kurrunpangku puritjunutjangka. 21-25 Paluru katja mantjilku. Katja palunya nyuntu yini watjala!, ‘Yiitjunya’. Yilta paluru tjananya Yitjurilaku walytja ngaṉṯitja tjuṯa ngulytjura kanyilku, kuya tjanampa waṉirra, kana kutu tjana nyinanytjaku.” Yalatji Katutjaku ilkari ngurrarangku Tjutjupanya watjaṉu.

Tjutjupanya yanku ngarrirra kanarringkula pakara yanu Miirinya yaḻṯingu, Katutjakuṉu ilkari ngurrarangku watjaṉutjangka. Nyinarrapula wiya tjungu ngarringi, ngula katja yutitjarringutjangka kutju ngaṉṯipula tjungu ngarringu. Pipirri paluru yutitjarringutjangka katja wiima paluru yini watjaṉu, “Yiitjunya”.

Yalatji Miirilu ilta katja mantjiṉu watiku ngurrpangku. Palunya nguwanpa Katutjaku wangka watjalpayingku yirriṯi watjaṉu yalatji,

“Ngula, kungka watiku ngurrpangku katja mantjilku. Yaṉangu tjuṯangku katja palunya yini yalatji watjalku, ‘Katutjakuṉu nganaṉala nyinanyi.’ ”