Atham woMarkkoc
Lon iloporot loKapik ammakka oMarkkoc pokurrot
Lon lonothon
Atham enni waMarkkoc akkokat pokurrot, ipokat pinako cakuruk ngkꞌran itti oIuanna oMarkkoc. Kwokat popuꞌrit caꞌri ica oIeccuo pokat nokaꞌran koUruccelim, ana kwothakkakathe pul ipammakot oIeccuo. Kwokat akwommakot pul pothothïlettat poIeccuo oPoluc ana kwittarathe oPoththuruc. Ilon elli lothikkoik thoIeccuo, kwere lon loppot loul woIouth ana thathuma then ittina. Likkoik ere kwokurrot lon len othakka itti akwittarot ul iokat wannoka woIouth occokot lon loMiccie.
Iatham enni, oMarkkoc perenthet ton lon ila oIeccuo pokkothe cannan nolon ila kweret. Oron thakatha tat akka oIeccuo pokkothe lon ilommaththik loppot, kwittiethe ul woppot, ana okïcce puꞌran pouꞌrupa iokithak nti iakin ana occïkïnthet kin lon len ilokithak. Lon elli lakene ngili ngoIeccuo ammakka pul ipaat noKapik. Akwethet thikkoik thung akwelikko nti ipuꞌran polon ilokithak.
OMarkkoc pereneron lon lothikkoik thoIeccuo ana ngre ngung nci ammakka kwoccot mamuthie nti ikkun woIuanna. Kwereneron kicce lon ilocothothe akkwarthuk okkwettat nothapak, ana kwacothot lon lung ntheret thuroko thoIeccuo nti ithio ana thukuꞌrot thoIeccuo tothiꞌrot cakuruk.
1
OIuanna pomamuthie pakuccet kathar cik
(Maththa 3.1–12; Lukka 3.1–18; Iuanna 1.19–28)
1 Thokuꞌre lon ncik tholon iloporot loIeccuo oMiccie, ukul woKapik.
2 Lokurrakot iatham woIccaia pul pothernte lon loKapik itti,
“Mpathïot pul pothothïlettat pin tokït kang,
ook ipathokuccenthung kathar cik.” 1.2 Malakki 3.1
3 “Poꞌre popul paik pakkakkaro nti ithampang itti,
‘Nokuccenthet Ili kathar cik,
noceꞌrenthok athar cik.’ ” 1.3 Iccaia 40.3
4 Ittina oIuanna pomamuthie pakkakathe akwikket ul mamuthie ithampang ithonthomat ana akwongkene ul lon lomamuthie mothokkaprttako nti ilon ilokithak ana thoccïkarnthet lon ilokithak. 5 Ana nci cïnang ul wonoththok poIouthia appik ana wonokaꞌran koUruccelim woingkanthok, ana okin thokat akin itto lon len ilokithak akin occo mamuthie nti ikkun wung norue toÜrüthün. 6 OIuanna pakukkot eret wokkattathe norua tothamla ana ïꞌrïkakot kuꞌrat ikin ana kwokat cik akwïkïkko aun ana oꞌrko kat. 7 Ana akwerene ul itti, “Pul paik panthan ponu puꞌran prïk naun ana mpakannekko nan manna itti mpee ungku ncik tokït kung anokꞌro loꞌrak lowok wung. 8 Mpethet non mamuthie ngngꞌri, anaruk kwathethet non ngKanang ikupupure.”
Mamuthie ana thennekketta thoIeccuo
(Maththa 3.13—4.11; Lukka 3.21–22; 4.1–13)
9 Ana nomaꞌri men oIeccuo pakkakathe nnokaꞌran koNaccir noththok poCelïl, ana oIuanna pekathok mamuthie irue toÜrüthün. 10 Anakka oIeccuo pokat cik akwoppot thapat nti iꞌri, akwimmakat tothiꞌrot attanyattatheik ana Kanang ikupupure akorpot cik naak karkko cülükkür. 11 Ana poꞌre pakkakathe nci tothiꞌrot apiꞌre itti, “Oung ukul win, ia mpongothe ana mpopiranet noka.”
12 Nci cïnang Kanang koKapik kothïathok ithampang ithonthomat, 13 ana kwikkatheik than maꞌri arrial weꞌra (40), apul pothopulut ennekkek, ana kwokat cik naꞌrupu woripira ana uꞌrupa wothothïlettat woKapik wakkakathe ana wittarathok.
Thakkaro thoul worokït iammakothok
(Maththa 4.12–22; Lukka 4.14–15; 5.1–11)
14 Manakka oIuanna ponekkettathe ikorrkkor, oIeccuo poingkathe noththok poCelïl, akwongkene ul lon iloporot loKapik. 15 Kwiꞌrekathe itti, “Caꞌri caat ana ngili ngoKapik ngakko napuththut ana nthapaꞌrine lon ilokithak cik annoccokot lon loKapik iloporot.”
16 Anakka oIeccuo pokat cik akwokko nokuthut korok irapangka toCelïl, akwimmakat oCcamaan ana opang Anthrauc akin orre loꞌrok lape irok irapangka, akka okin thokat ul iacciccokot ape. 17 Ana oIeccuo piꞌrekathekin itti, “Nanthan, annomakothin ana mpathikkienon ul iacciccokot ul ionyi.” 18 Akin oththekat noloꞌrok len lape akin omakathok accokkot.
19 Anakka kweot papotteik, akwimmakat oIakup ukul woCepethi ana opang oIuanna akin thokat cik ikuppuꞌrung konoiꞌri akin okuccet loꞌrok len cik lape. 20 Ana kwakkarathekin cokoccokot ana okin thoththekathe naththan pen oCepethi ikuppuꞌrung konoiꞌri okin oul iporekinok ana okin thomakathe oIeccuo.
OIeccuo pakïcce uꞌrupa iokithak nti ipul
(Lukka 4.31–37)
21 Ana okin thoingkathe nokaꞌran koKapprnaum, anakka caꞌri caCcepith caat, oIeccuo poingkathe nocuththun caꞌrama ana kwikkatheik akwongkene ul. 22 Ana ul wokat cik aprttakinthet thongkene thung tit, akka kwangkenekin ere pul iponu ngili, annoka ammakka ul iangkene lon lothonceꞌret lon cik. 23 Ittina apul pꞌrek akkakat nocuththun caꞌrama iponat uꞌrupa iokithak apiꞌrekat lon mpoꞌre cittan itti, 24 “Ngintha akka akkot nanïn, Ieccuo poNaccir? Ngkwaat itti ngkwathongwo nïni? Mpina itti oung okkwen, oung ipupure poKapik.”
25 Ncïnang aIeccuo othirriekathok cik akwiꞌrekathok itti, “Angkik, oppothe thapat nti iaak.” 26 Uꞌrupa iokithak wolliekathe pul ikapa ana wekathe poꞌre cittan ana woppathe thapat nti ipul.
27 Ul appik woprttakatherit, ana okin thikkatheik akin ipittarot itti, “Nginthappu empi? Thongkene enthi thie ana ngngili. Akka manna kwangkie uꞌrupa iokithak cik, accïkathok.” 28 Alon lung opettakat cik noththok poCelïl appik.
OIeccuo pittiet ul woppot
(Maththa 8.14–17; Lukka 4.38–41)
29 Manakka oIeccuo ana ul wung thoththet nocuththun caꞌrama, okin thoingkathe akin oIakup ana oIuanna thoCcamaangon ana thAnthraucon. 30 Ana opïthe poCcamaan iopopari pokat iaꞌrangkal akkwongo akwangko ippa, ana okin therekanthet oIeccuo lon lung. 31 Ana oIeccuo poingkanthok akwoccokathok ukun akurokiekathok kapik. Lü lopaꞌratheik nti iaak ana kwikkatheik akwokkinthet kin thuꞌrit.
32 Ana cipin cen akka cïngkï corungkot, ul wonakanthet oIeccuo ul iongo appik ana ia uꞌrupa iokithak woꞌrot nan. 33 Ul wonokaꞌran appik waꞌrntakathe tocürük, 34 ana oIeccuo pittiekathe ul iongat mmio kurekkurek. Kwokïccekathe uꞌrupa iokithak woppot anaruk kwakanno okorronnat uꞌrupa iokithak itti were akka okin thinat itti ook okkwen.
OIeccuo pangkene noththok poCelïl
(Lukka 4.42–44)
35 Ana ingïꞌrïmak nothuput thorrot akka cik cokat carthuk okatto, oIeccuo purokathe nti inthe ana kwoththekathe nokaman ana kwoingkathe nokaꞌran pellek na kwaththaꞌrat ngaꞌrama. 36 Ana oCcamaan ana opurukon thoingkathe akin othokwariccathok. 37 Manakka okin thiothok akin iꞌrekathok itti, “Ul appik waik wakwariccathung.”
38 OIeccuo pothïanthet kin tit itti, “Ntun anteo nocik cꞌrek iccik kokaman ikaik cene anothongkene ul than cakuruk akka ilen akka mpainet.” 39 Ittina kwoingkathe noththok poCelïl appik akwongkene ul nomuththun maꞌrama. Ana akwokïcce uꞌrupa iokithak nti iapilingon.
OIeccuo pittiet pul iponat ïnyï noka
(Maththa 8.1–4; Lukka 5.12–16)
40 Apul pꞌrek akkakanthok ponat ïnyï noka apeekat ungku ncik apipittathok itti, “Amma oung akkongothe ana ngkwittiethin.”
41 OIeccuo pipathe thiak thung akwothiekat ukun akwothntat pul akwiꞌrekat itti, “Mpongothe itti mpittiethung, othakka poporot.” 42 Nci cïnang aïnyï ittakat accokkot ana kwothakkakathe poporot.
43 OIeccuo pothïathok ikathar llon lonthomat akwiꞌrekathok itti, 44 “Amma ngkweot akorronno iꞌret pul pꞌrek lon elli. Anaruk ngko athokene pul ponoppan toKapik ka kang, akiat papu pothokiot ngüccük cik ammakka oMucca piꞌret akenekin itti ngkwothakkat poporot.” 45 Anaruk kwoingkathe ana kwikkatheik akwere nuthuk ana opettot lon cik ana ittina oIeccuo pommakathe iꞌriko icarak coman ncinokkït anaruk kwikkatheik thomnther. Ana ul wokat cik warthuk aukkwinok nci nomoꞌrong ammakka maik.