5
Ha Keɏlilu Ya Hachiʼn Lalulukut Un Papin
1 Awed bo intullongku un lalulukut un papin un ilooglen chi hachiʼn umaammuy si chuwalan un imala. Ked hachiʼn papin, losan lagiliyan chi lambilisak ya langampitu bobodla.* 5:1 Ezekiel 2:9-10 2 Ya awed bo intullongku un osaʼn mangkoscheɏʼn anghel un chilakeɏla gingala un kalala, “Silu sinlobbong un mangubyed ya mamukyed si allayaʼn lalulukut un papin?” 3 Ngim lappun sinlobbong un mamukyed si hachiʼn lalulukut un papin, ulay cha hachiʼn inggew ud langit ya utla pita, ya ulay bo cha losan un langkakatoy. 4 Ot lalluluwaak ti lappun laochesan si sinlobbong. 5 Ngim kalan chi osa kan cha hachiʼn mangipangpangu kan sakon, “Agey, achika man-ibin, ti anchiya laawagen si Layun un siya langatu un galak David ya galak bod Judah. Ilabyakla si Satalas ked siya sinlobbong un mamukyed si halat un papin un langampitu bobodla, ked bukyachola ya byesaola.”† 5:5 Genesis 49:9; Isaiah 11:10
6 Si hachi, awed chi intullongkuʼn Keɏlilu un summisiked si langgawaan cha hachiʼn mangipangpangu ya cha hachiʼn opat un parsua un lampalikwos si aammuyan Ari. Ked hachiʼn Keɏlilu, mamàila cha pilat si lapatoyala. Lasakguchen si pitu ya pitu bo atala un chicha miyaligen cha pituʼn Ispiritun Apudyus un libuun si losan un lugeɏ utla pita. 7 Oli ked ummacheli hachiʼn Keɏlilu si ummaammuy un Ari ot illaɏala lalulukut un papin un ilooglen chi chuwalan un imala. 8 Illaɏala pu papin, lampalintuming losan cha hachiʼn opat un parsua ya cha hachiʼn chuwampuɏu ya opat un mangipangpangu si sangwalan chi keɏlilu un malayaw kan siya. Ked kacha osa kan cha hachiʼn mangipangpangu, ilooglencha arpa un para tukeɏ ya chuyug un bilalituk ked laplu si byangbyangluʼn insenso, ked siya miyaligen chi luwalun cha losan un tagun Apudyus. 9 Ot kilantacha baruʼn kanta un kalancha,
“Sika abus chi sinlobbong un mangaɏa
si lalulukut un papin un langampitu bobodla,
ya sika alla kalobbongalaʼn
mamukyed ya mamasa,
ti sika lapatoy un libukbuk chi chaɏala.
Ked hachi imbyayedlu kan cha tagu
ta makwa un mantagun Apudyus chicha.
Ked cha hachiʼn silakam,
leɏpucha si kilapuun cha tagu si kaili-ili si allaʼn lubung,
awed bo cha leɏpu si losan
un mansabsabyalin ugud.
10 Ked impatim bo chicha si Mampangatam,
ya lambyalilom bo chicha pachi un mansimbi kan Apudyus.
Ked chicha mangituray utla pita
si umaliʼn eɏgew.”
11 Ot lallangɏangaak pun, chingngeɏk chi gingan cha achu-achuʼn angheles un achipun mabilang ti kalibulibucha, ot kilalliguchaʼn lasikesiked cha hachiʼn opat un parsua ya cha hachiʼn mangipangpangu ya hachiʼn umaammuyan Ari. 12 Ot chilakeɏchaʼn mangkankanta un kalancha,
“Allaya Keɏlilu un lapatoy,
siya abus chi alla kalobbongalaʼn
mipangatu ya machayaw,
ya lappun miyisuwan chi kilabyaklangla
ya kilalaingla ya ulay chi pallakabyelinla
ya kilabiɏula.”
13 Oli ked chingngeɏk bo langkankantaan cha losan un parsua, un inggew ud langit ya utla pita, ya losan un inggew si byeybyey, ya cha losan un inggew si awechen cha langkakatoy. Ked losancha mangkankanta un kalancha,
“Kan sika un ummaammuy un Ari ya hachiʼn Keɏlilu,
machaychayawcha si ing-inggala
ya mibyegabyega kilabiɏucha ya kilangatucha
ya pallakabyelincha si ing-inggala.”
14 Ked kalan cha hachiʼn opat un parsua, “Amen!” Ot lampalintuming cha hachiʼn mangipangpangu un lanchaychayaw.