1 Awed chuwaʼn eɏgew ked Piyastaʼn Lallausan ya Piyastan chi Tilapay un achipun lakamsan si yeast.* 14:1 Exodus 12:1-27 Ked cha ap-apun cha papachi ya cha mimistulun chi lintog, ked lansingitcha si lalimod un in-ilonchaʼn malokma ya mamatoy kan Jesus. 2 Kalancha, “Achipun taku iyaspuɏ koon si timpun chi piyasta, langked lu manggulu cha tagu.”

3 Inggew cha Jesus ud Bethany si byeɏoy cha Simon un lalepprosy. Manga-mangancha pun, lilumlok chi osaʼn byebyai un ooglela biletun butinya un ngadloncha alabaster un lakoan si mambyangun apɏus chi nardo un amod chi ngilala. Ot pilut-udla uɏun chi butinya ot isiitla apɏus si uɏun Jesus.

4 Ngim illinggew cha uchum un summanga ot kalancha si kacha osa, “Kenga apɏus! 5 Lu milaku otyan si lasuɏuk si tiɏungasut un pilak ked maatod kan cha kakapus.” Ot ilom-omɏancha byebyai.

6 Ngim kalan Jesus, “Achiyu biyangan siya! Payuggey chillawon chi byebyaiʼn alla? Bibiɏu mit chi killingwala kan sakon. 7 Sigud un alla cha kapus kan chikayu ked makwa un tuɏunganyu chicha. Ngim sakon, chakampun un pasigak awed kan chikayu.† 14:7 Deuteronomy 15:11 8 Killingwala kabyeeɏala. Insiitla mambyanguʼn apɏus si long-egku ta mangisagalaala si miimbolak. 9 Tuttuwa allaʼn ibyegak kan chikayu, losan un lugeɏʼn mibyegbyeg-an chi Bibiɏuʼn Chameg si intilun chi lubung, ha allaʼn kingwala ked mibyegbyega ta malomsomkan cha tagu kan siya.”

10 Ot si Judas Iscariot, osa kan cha lasawaɏan si chuwaʼn disipulus Jesus, ummoyla inyibit si Jesus kan cha ap-apun cha papachi. 11 Latetteɏokchaʼn langngeɏ si imbyegala ot ingkaricha un idchencha siya si pilak. Ot illugilaʼn lansingit si wayalaʼn mangiyibit kan Jesus.

12 Si chamun eɏgew chi piyastan chi Tilapay un achipun lakamsan si yeast, ked ichatuncha ayyubun chi keɏlilu para si Piyastaʼn Lallausan. Kalan cha disipulusla kan siya, “Udma piom un ingkami mangisagalaan si mangalan taku si Piyastaʼn Lallausan?” 13 Ot imbuunla chuwa un disipulusla, ot kalala kan chicha, “Ingkayu si suidad ked abtonyu leɏaki un mambubukud si maaammutuʼn chelum. 14 Tun-uchonyu siya, ked ibyegayu si singkuwa si byeɏoy un lumlokala, ‘Kalan chi Mistulu, udma awechen chi kuwetuʼn mangalanmi kan cha disipulusku si Piyastaʼn Lallausan?’ 15 Ked ipailala eɏwaʼn langingngatuʼn kuwetu si byeɏoyla, lisagala ya wechewed cha losan un masapuɏ. Udchi mangisagalaanyu si mangalan taku.”

16 Ot lummibbyat cha disipulus, ot ummoycha si suidad ot inchesancha losan cha imbyegan Jesus kan chicha. Ot insagalacha mangalancha si Piyasta un Lallausan.

17 Lummaschom pun, gummatong cha Jesus kan cha lasawaɏan si chuwaʼn disipulusla si hachiʼn byeɏoy. 18 Langkakakancha pun, kalan Jesus kan chicha, “Tuttuwa ibyegak kan chikayu, osa kan chikayuʼn miyubung kan sakon chi mangiyibit kan sakon.”‡ 14:18 Psalm 41:9

19 Chummauycha losan ot lasin-ossacha ilimus kan siya, “Sakon kamma ibyegbyegam?”

20 Kalan Jesus kan chicha, “Osa kan chikayuʼn lasawaɏan si chuwa un mangisawsaw si tilapay si chuyug. 21 Sakon un Alak chi Tagu, mapatoyak ti siya liigili si ugud Apudyus, ngim kadchegu taguʼn mangiyibit kan sakon. Un-ulloy chi achipun liyalak chi taguʼn hachi!”

22 Si manga-mangalancha, langaɏà Jesus si tilapay, lanyaman kan Apudyus, pilispis-igla ot illidchola kan cha disipulusla ot kalala, “Aɏanyu, allaya long-egku.” 23 Ot illaɏala bo latatasaʼn byeyas un leɏpu si grapes, ot lanyaman kan Apudyus ot illidchola kan chicha. Ot losancha ililum. 24 Ot kalala kan chicha, “Allaya chaɏak un mibukbuk ked manguɏas si byasuɏn cha achuʼn tagu ya siya bo mampaloklok si ingkarin Apudyus.§ 14:24 Exodus 24:8; Jeremiah 31:31-34 25 Tuttuwa ibyegak kan chikayu, chakpun kasin umilum si byeyas inggala si eɏgew un umilumak si baruʼn byeyas si Mampangatan Apudyus.” 26 Ot langkantacha si pangchaychayaw kan Apudyus, ot lummawacha ummoy ud Bilig Olivo.

27 Ot kalan Jesus kan chicha, “Losan kayu umikas ked telanyu sakon ti siya liigili si ugud Apudyus un kalala,

29 Kalan Peter, “Ulay lu losan chika telan, achipunku sika telan.”

30 Kalan Jesus kan siya, “Tuttuwa allaʼn ibyegak kan sika, si salaʼn labi, sakbyey un mamidwa malullakuk chi kawitan, pilitlum sakon piluklitan.” 31 Ngim impatut Peter un kalala, “Chakpun pulus puklitan sika, ulay lu makakatoyak kan sika.” Ot katchi bo imbyegacha losan.

32 Gummatong pun cha Jesus si lugeɏ un ngadloncha Gethsemane, kalala kan cha disipulusla, “Umamuy kayu yan utla ta inyak malluwalu.” 33 Inyawitla cha Peter, James ya John. Ot lanchaleg ya maas-asusu angosla. 34 Ot kalala kan chicha, “Amod chi sigeb chi somsomokku ked isun chi ikatoyku. Inggew kayu utla ta mambyentay kayu.”

35 Ummachayù akit ot mallukbub si pita un lalluwalu, lu makwa otyan, achipun mituɏuy chi ligat un makwa kan siya. 36 Kalala, “Ama, Ama, kabyeeɏam un koon cha losan. Ilisim otyan kan sakon cha allaʼn ligat. Ngim chakampun un ha piok chi makwa, ngim ha piom chi matungpeɏ.”

37 Ot langulin si inggewan cha disipulusla ot inchesala chicha un masusuyop. Kalala kan Simon Peter, “Simon, ha lasusuyopka? Ha achipun gey makwa lu makabyentay kayu kan sakon ulay masin uras? 38 Achi kayu masusuyop ngim malluwalu kayu ta achi kayu masulisug. Ti ha somsomokyu ked ustu ngim lakapsut chi long-egyu.”

39 Ot kasin bo ummoy lalluwalu un isun chi chamu un lalluwaluwala. 40 Kasin bo langulin ot inchesala chichaʼn lasusuyop, ti amod chi suyopcha. Ked lappun ammucha si ibyegacha kan siya. 41 Pitlula pun un langulin kan chicha, kalala, “Ha sissiya kayu gey un masusuyop ya umiillong? Ustun, gummatong chi timpun Sakon un Alak chi Tagu si awi, miyibitak si iman cha malagbyasuɏ. 42 Bumangon kayu ta intakun. Itullongyu, gummatong chi taguʼn mangiyibit kan sakon!”

43 Sissiyan man-ugu-ugud si Jesus ot gummatong si Judas, osa kan cha lasawaɏan si chuwaʼn disipulusla. Litun-ud kan siya cha amod un taguʼn mampapadchin ya mampapang-ok, un imbuun cha ap-apun cha papachi, cha mimistulun chi lintog, ya cha pallakayon cha Judio. 44 Ked ha langiyibit langatod kan chicha si sinyeɏ, un kalala, “Ha taguʼn kikisok, siya chokmaanyu ya itallayyu ked ammanyu achugen.” 45 Gummatongcha pun, kakma ummoy si Judas kan Jesus, ot kalala, “Mistulu!” ot kikisola siya. 46 Ot chilokmaancha si Jesus ot impugodcha. 47 Ngim ha osa kan cha summisiked, lilukpusla pachinla ot liwasola ingan chi musassun chi kangatuwan un pachi.

48 Kalan Jesus kan chicha, “Ha wantechak kamman un mampapadchin ya mampapang-ok kayuʼn umali malokma kan sakon? 49 Ileɏgew un awechak kan chikayu si templo un pin-a mantudtuchu, ked achipunyu sakon chilokmaan. Ngim makwa losan cha alla ta matungpeɏ liigili si ugud Apudyus.” 50 Ot ummawid losan cha disipulusla ot tilelancha siya.

51 Si hachi, inggew chi osaʼn bumaru un litun-ud kan Jesus un mangkakaggoy si manyapit un luput. Chilokmaancha siya, 52 ngim lapuksay kagoyla ot ummawid un mampatpatiwayway.

53 Illiyoycha si Jesus si inggewan chi kangatuwan un pachi. Ot lachagup cha ap-apun cha papachi, cha pallakayon cha Judio ya cha mimistulun chi lintog. 54 Byetbyettawaan Peter un maluntun-ud kan Jesus inggala si paway chi byeɏoy chi kangatuwan un pachi. Ot lakaamuy kan cha man-aachug ot man-alichu.

55 Cha ap-apun cha papachi ya losan cha kukunsiseɏ, lansingitcha si ipabyasuɏcha kan Jesus ta otoyoncha siya, ngim lappun inchesancha. 56 Achu cha tilutuli un chiɏumcha kan siya ngim achipun man-uulud cha imbyegacha.

57 Summiked cha uchum un lantultulli mipanggop kan siya. Kalancha, 58 “Chingngeɏmi imbyegala un, ‘Ikosobla allaʼn templo un kingwan cha tagu ked lu tiɏuʼn eɏgew pauchola bo osa, un chakampun un kingwan cha tagu.’ ” 59 Ngim ulay chi imbyegacha, achipun bod man-uulud ti mansabsabyali.

60 Summiked chi kangatuwan un pachi si sangwalan cha losan ot ilimusla kan Jesus, “Ha lappun misongbyatlu si allaʼn ipabyasuɏcha kan sika?” 61 Ngim gummigillok si Jesus un lappun songbyatla. Kasin bo lan-imus chi kangatuwan un pachi kan siya, “Sika kamman si Kristu, un Alak chi machaychayaw un Apudyus?”

62 “O, sakon!” kalan Jesus, “Ked mailayu Sakon un Alak chi Tagu un umaammuy si machuwalan chi Mallakabyelin un Apudyus. Mailayu bo sakon un umali un mipati kan cha libuu.”

63 Chingngeɏla pu hachi, pilissayla silupla gapu si sangala ot kalala, “Achipun taku masapuɏ cha uchum un mansistigu si byasuɏla. 64 Chingngeɏyu imbyegala un iyisula long-egla kan Apudyus. Himma somsomokyu si hachi?” Ot losancha kilodchongan siya un lobbonglaʼn matoy.

65 Ot tiluptuppaancha siya ot bilungutcha atala ya chilalugcha siya. Kalancha, “Pugtuwam lu silu lalalug kan sika?” Ot tilampakan bo cha guwecha siya.

66 Illinggew si Peter si paway ot lummaus chi osaʼn byebyai un bubùulon chi kangatuwan un pachi. 67 Illilala pun si Peter un man-aallichu, ammala illonglong siya ot kalala, “Sika osaʼn biɏun Jesus un iNazareth.”

68 Ngim piluklitala un kalala, “Lappun ammuk si halat ya chakpun maawatan chi ibyegbyegam.” Ot ummoy si liwangan chi paway. Si hachi, lalullakuk chi kawitan.† 14:68 Ha kawitan, lappun si uchum un manuscript chi Greek

69 Intullong bo kasin chi bubùulon siya, ot imbyegala kasin kan cha summisiked, “Siya osaʼn biɏun Jesus!” 70 Ngim ingkasinla bo piluklitan.

Umooli pun, kalan cha summisiked kan Peter, “Tuttuwaʼn sika osa kan chicha, ti iGalileeka.”

71 Ot mansapata si Peter un kalala, “Ulay chusaolak kan Apudyus, lappun ammuk si halat un tagu un ibyegbyegayu!”

72 Ot kakma lalullakuk chi kawitan si mikadwa. Ot laslasmok Peter imbyegan Jesus kan siya, “Chaampun chi kawitan ipidwa malullakuk, ked pilitlum sakon piluklitan.” Ot man-ibi-ibin si Peter un amod chi byabyawila.