52
Tawkal pa Hodáay mehrá
Pa sázger o washáwázáni sálárá, Dáuday shayri gwashtánk, á wahdá ke Edumi Duig, Sháulay kerrá shot o á sahig korti ke “Dáud, Ahimelekay lógá shotag.”
1 Oo porzórén mard! Chiá badiay sará pahra kanay?
Hodáay mehr dáemi ent.
2 Oo prébkár! Tai zobán, tabáhi o barbádiay pandalána sázit,
almásén tégéay paymá.
3 Tará badi cha nékiá dóster ent o
dróg cha rástiá. Ósht...
4 Oo prébkárén zobán! Har bérán kanókén habará dósta dáray.
5 Bale Hodá tará abadia próshit.
Tará chakápit o cha tai gedáná gwajit o
cha zendagénáni zeminá tai risshagá kasshit. Ósht...
6 Pahrézkára gendit o torsit,
badkáray sará kandit o gwashit:
7 “Haw! Esh ent á kas ke Hodái wati kalát nakort.
Tawkali wati bázén mál o dawlatay sará bast o
wati barbád kanagá twáná but.”
8 Bale man zaytunay sabzén drachkéay paymá án,
ke Hodáay lógá sabza bit.
Mani tawkal Hodáay mehray sará ent
abad tán abad.
9 Pa tai kortagén kárán
modám tai shográ gerán o
Hodádóstáni démá
pa tai námá ométwár án,
chiá ke tai nám nék ent.