89
Adl o ensáp tai bádsháhiay bonyád ant
Itán Ezráhiay shayri gwashtánk.
1 Hodáwanday mehrá tán abada názénán
cha wati zobáná, tai wapádáriay kessahá sajjahén naslán sara kanán.
2 Man gwasht ke “tai mehr abadmán ent o
taw wati wapádári, ásmáná káhem kortag.”
3 Taw gwasht: “Man gón wati gechén kortagéná ahd o karáre bastag o
gón wati hezmatkár Dáudá pa sawgend kawl kortag:
4 ‘Tai padréchá tán abad barjáha dárán o
tai bádsháhi tahtá nasláni nasl.’ ” Ósht...
5 Oo Hodáwand! Ásmán tai ajabén kárán satá kant o
tai wapádáriá ham, pákénáni diwáná.
6 Ásmánán, kay Hodáwanay matth buta kant?
Choshén ásmáni hastié hast ke Hodáwanday paymá bebit?
7 Hodáay tors ásmáni hastiáni nyámá sakk mazan ent,
á cha wati chapp o chágerday sajjahénán bákamálter ent.
8 Oo Hodáwand, lashkaráni Hodá! Kay tai matth o darwar ent?
Taw zórák ay, oo Hodáwand, o tai wapádáriá tará chapp o chágerd kortag.
9 Taw mastén daryáyáni sará hokmránia kanay o
wahdé chawlesh chesta bant, taw éresha káray.
10 Taw Raháb,* 89:10 Raháb, bezán gorunák. Edá balkén pa Shaytáni tágatán gwashag butag. láshéay paymá drosht o
gón wati zórmandén báská wati dozhmen sheng o sháng kortant.
11 Ásmán taig ent o zemin ham,
jahán o eshiay tahá harché ke hast, taw addh kortagant.
12 Shomál o jonub taw addh kortagant,
Tábór o Hermónay kóh tai námá názénant.
13 Tai básk zórmand ent,
tai dast zóráwar ent,
tai rástén dast porwák o sóbén ent.
14 Adl o ensáp tai bádsháhiay bonyád ant,
mehr o wapádári tai hamráhiá, démá gám janán ant.
15 Oo Hodáwand! Bahtáwar hamá ant ke shádmániay áwázá pajjáha kárant o
tai bárgáhay nurá gáma janant.
16 Sajjahén róchá tai námay sará shádehia kanant o
cha tai adlá sarboland ant.
17 Chiá ke taw áyáni shán o shawkat o áyáni wák o twán ay o
cha wati mehrabániá may kánthᆠ89:17 Kánthay máná edá zór o kodrat ent. sarperáza kanay.
18 Béshakk, may bádsháh Hodáwandayg ent,
may espar Esráilay pákénay.
19 Yak wahdé taw, shobéná gón wati wapádárán habar kort o gwasht:
“Man jangólé madat kortag o
cha kawmá gechéni warnáé ródéntag.
20 Man wati hezmatkár, Dáud shóház kortag o
wati pákén, rógen per moshtag‡ 89:20 Rógen per moshag, bezán pa bádsháhiá gechén kanag..
21 Mani dast gón áiá góna bit o
mani báski zórmanda kant.
22 Dozhmen cha áiá bája nabárt o
badkár áiay sará sarzóra nabit.
23 Dozhmenán áiay démá prósha dayán o
harkas ke cha áiá naprata kant, prósháni.
24 Mani mehr o wapádári áiay hamráha bant o
mani námá áiay kánth borzáda bit.
25 Áiay dastá tán daryáyá sara kanán,
áiay rástén dastá tán kawrán.
26 Á maná gwánka jant o gwashit: ‘Taw mani Pet ay,
mani Hodá o mani nejátay talár.’
27 Man ham áiá wati masterén chokka kanán,
jahánay masterén bádsháh.
28 Wati mehrá tán abad áiay hamráha kanán o
gón áiá wati ahd o karárá mohra dárán.
29 Tán abad áiay naslá barjáha dárán,
áiay bádsháhiay tahtá ásmánay rócháni hesábá.
30 “Agan áiay chokk mani Sharyatá yalah bekanant o
mani parmánáni randgiriá makanant,
31 agan mani rahbandán bepróshant o
mani hokmán mamannant,
32 áyáni gonáhán pa latth sezá dayán,
náparmánián pa hayzarán,
33 bale áiay dóst dáragá bassa nakanán o
gón áiá wati kortagén kawlá napróshán.
34 Wati ahd o paymáná napróshán o
á habar ke cha mani dapá dar átkag, badalia nakanán.
35 Man yak baré mán wati pákiá sawgendé wártag o
gón Dáudá dróga nabandán,
36 ke áiay nasl tán abad barjáha mánit o
áiay taht mani dargáhá chó róchá abadi ent,
37 chó máhá tán abad barjáha mánit,
ke jambaráni tahá tachk o rástén sháhedé.” Ósht...
38 Bale annun taw wati dém tarréntag o á yalah kortag,
wati rógen per moshtagénay sará hezhm geptagay.
39 Taw gón wati hezmatkárá bastagén ahd o paymán pad tarréntag o
áiay táj, zeminá dawr dátag.
40 Taw áiay sajjahén diwál karótkagant o
áiay mohrén kalát próshtag.
41 Harkas ke cha ráhá gwazit, áiá pol o páncha§ 89:41 Pol o pánch, bezán zórbord, lotth o pol. kant o
á wati hamsáhegáni kalági jórh butag.
42 Taw áiay dozhmenáni rástén dast borzád bortag o
sajjahén badwáh shádmán kortagant.
43 Taw áiay zahm konth kortag o
jangá madat nadátag.
44 Taw áiay shán bortag o
taht hákán dawr dátag.
45 Taw áiay warnáiay róch kamm kortagant o
sharmendagiay kabáhéá póshéntag. Ósht...
46 Tán kadén, oo Hodáwand! Watá tán abad chéra dayay?
Tán kadén tai hezhm chó ásá róka mánit?
47 Hayálá bekap ke mani omray róch chón kamm ant,
taw bani ádam nákárén chizzé jórh kortag.
48 Kojám ensán ent ke marka nagendit,
kay cha kabray zórá rakketa kant? Ósht...
49 Oo Hodáwand! Tai á pésarigén mehr kojá ent
ke taw gón Dáudá sawgend wárt o kawl kort.
50 Oo Hodáwand! Hayálá bekap ke tai hezmatkárá chón shegána janant,
sajjahén kawmáni rishkandán wati delá dárán.
51 Oo Hodáwand! Tai dozhmenán mani sará rishkand kortag o
hamok gámá tai rógen per moshtagénesh kalág bastag.
52 Hodáwandá tán abad satá bát.
Anchosh bát. Ámin.