63
Arwáhon tai tonnig ent
Dáuday Zabur, hamá wahdá ke Yahudáay gyábáná at.
1 Oo Hodá! Mani Hodá taw ay,
gón wati sajjahén del o jáná tai shóházá án,
arwáhon tai tonnig ent o
jesm o jánon tai hodónák,
béáp o hoshkén zeminéá.
2 Tai pákén jágahá, maná tai shobén butag,
tai shán o kodraton distag,
3 chiá ke tai mehr cha zendá sharter ent,
mani lonth tará názénant.
4 Tán zendag án tará názénán o
pa tai námá dastán borza kanán.
5 Arwáhon anchosh séra bit chó ke yakké wasshén waráké bwárt o
dapon gón shádmánén lonthán tará názénit.
6 Wati bestaray tahá ham tará yáta kanán o
shapáni pásán tai hayálá bán.
7 Tai bánzoláni sáhegá tará názénán,
chiá ke taw mani madatkár ay.
8 Arwáhon gón taw bandók ent o
rástén dastet mani posht o panáh.
9 Á ke mani koshagay pad o randá ant gár o gomsára bant o
zeminay johlánkián éra rawant.
10 Zahmáni dapá tarrant o
tólagáni waráka bant.
11 Bale bádsháh Hodáay dargáhá shádehia kant o
harkas ke gón Hodáyá sawgenda wárt pahra kant,
chiá ke drógbandáni dap chopp o bandaga bit.